Leeqkunaq tapukusqan
¿Imaninmi Bibliapi juraymanta?
Juj diccionario nisqan jina, “jurayqa imatapas ruwananchispaq prometekuymi. Chaytaqa Jehová Diosta testigonchista jina churakuspan prometekunchis” (Diccionario de uso del español, de María Moliner). Wakin runakunaqa rimaspan juranku, wakintaq juj qelqapi churanku jurasqankuta.
Wakin runakunaqa mana allinpaqmi jurayta qhawarinku. Jesusmi niran: “Amapunin imaraykupas jurankichischu. […] Aswanpas arí nisqaykichisqa arí nisqallapuni kachun, manan nisqaykichistaq manan nisqallapuni kachun; chayman yapaykusqaqa Satanasmantan jamun”, nispa (Mat. 5:33-37). Kamachikuy simipi nisqanman jinaqa wakin Dios sonqo runakunapas jurarankun (Gén. 14:22, 23; Éx. 22:10, 11). Jehová Diospas mayninpiqa juraranmi (Heb. 6:13-17). Chhaynaqa Jesusqa manan “ama jayk’aqpas juraychischu” nispachu nisharan, aswanpas nisharanmi ama comunta jurananchispaq. Jurashaspaqa junt’ananchismi imachus prometesqanchista, Jehová Diosmi munan chayta ruwananchista.
Chhaynaqa, ¿imatan ruwawaq juranaykipaq pipas nisuqtiyki? Ñaupaqtaqa qhawarinaykin atinkichus junt’ayta icha manachus chayta. Sichus mana junt’ayta atinkichu chayqa manan juranaykichu. Bibliapin nishan: “Aswan allinmi kanman mana prometekuyniyki, prometekushaspa mana junt’anaykimantaqa”, nispa (Ecl. 5:5). Chaymantapas manaraq jurashaspan qhawarinayki Bibliapi kay yachachikuykunata. ¿Mayqenkunan chaykuna kanman?
Wakin juramentoqa Diospa munasqanman jinan kashan. Jehová Diospa testigonkunaqa casarakusqanku p’unchaypin prometenakunku, chayqa juj juramento jinan. Noviopas noviapas Diospa ñaupaqenpi jujkunaq ñaupaqenpin prometenakunku munanakunankupaq, sumaqta qhawarinakunankupaq, respetanakunankupaq ima. (Jujkunaqa manapaschá chay jinatachu ninkuman, chaywanpas Diospa ñaupaqenpin prometenakushanku). Chay qhepamanmi paykunaqa casarasqa warmi-qhari kapunku, chaymi kallpachakunanku tukuy kausasqanku p’unchaykunapi kuska tiyanankupaq (Gén. 2:24; 1 Cor. 7:39). Casarakuy p’unchaypi prometenakuyqa allinpunin, chayqa Diospa munasqanman jinan kashan.
Wakin juramentoqa manan Diospa munasqanman jinachu. Cristianokunaqa manan jurananchischu armata jap’ispa nacionninchista defiendenanchispaqqa, manataqmi Diostapas negananchischu. Chaykunata ruwasunman chayqa manan Diosta kasukushasunmanchu. Cristianokunaqa manan kay pacha runakuna jinachu kananchis, chaymi mana politicapi juj ch’aqwaykunapipas chhaqrukunanchischu (Juan 15:19; Isa. 2:4; Sant. 1:27).
Wakin juramentotaqa conciencianchisman jinan ruwasunman. Cristianokunaqa allintan piensananchis Jesuspa nisqanpi. Paymi niran: “Roma reypa kaqtaqa Roma reyman qopuychis, Diospa kaqtataq Diosman qopuychis”, nispa (Luc. 20:25).
Yaqapaschá juj cristianoqa juj nacionpi llaqtachakuyta munan, otaq pasaporte nisqata orqoyta munan. Ichaqa chayta orqonanpaqmi ninkuman: “Chay nacionpi autoridadkunata tukuypi kasukunaykipaq juray”, nispa. Yaqapaschá chayta ruwaqtinqa kamachinkuman Diospa contranpi imatapas ruwananpaq, ichaqa conciencianta kasukuspa chay hermanoqa mana jurayta munanmachu. Chhayna kaqtinqa yaqapaschá autoridadkunaqa chikanta chay juramentota cambiankuman hermanonchispa conciencianta respetasqankurayku.
Sichus chay juramento chikan cambiasqa kanman, jinaspa tupanman Romanos 13:1 textoq nisqanwan chayqa yaqapaschá jurallanman. Chaypin nin: “Autoridadkunataqa lliu runa kasukunan”, nispa. Chay hermanonchisqa yachanmi autoridadkunata kasukunan kasqanta, chaymi mana juchapaqchu qhawarinman chaypaq juraytaqa.
Mayninpiqa manaraq juj runa jurashaqtinmi payman espadata otaq juj cosastapas qonku chayta jap’ispa jurananpaq. Ñaupa tiempopiqa Roma runakunapas Escita runakunapas espadankuta jap’ispan diosninkuq yanapayninta mañakuspa juraqku. Griego runakunataq makinkuta janaq pachaman jaywarispa juraqku. Chayta ruwaspan rikuchisharanku diosninkuq rikumushasqanta, paykunaman cuentata qonanku kasqantapas.
Jehová Diosta serviqkunaqa manan banderata otaq ima simbolotapas jap’ispaqa jurananchischu. Ichaqa, ¿iman pasanman juj juez makiykita Biblia pataman churaspa “sut’illanta rimanaykipaq juray” nispa nisuqtiyki? Chhayna kaqtinqa yaqapaschá jurasunman. Ñaupa tiempopi Dios sonqo runakunapas jurarankun cheqaqllata imatapas rimanankupaq (Gén. 24:2, 3, 9; 47:29-31). Ichaqa jurashaspaqa yuyarinanchismi Diospa ñaupanpi jurashasqanchista, chaymi cheqaqllata rimananchis. Imaymanataña juezkuna tapuwasunman chaypas sut’illantan imatapas rimananchis.
Noqanchisqa Jehová Diosta kusichinanchispaq jinan imatapas ruwananchis. Chaymi manaraq jurashaspaqa allinta piensananchis, Jehová Diospa yanapaynintataqmi mañakunanchispas. Chaymantapas manaraq jurashaspaqa qhawarinanchismi Jehová Diospa munayninman jinachus kashan icha manachus chayta, chhaynapin conciencianchispas thaj kanqa. Ichaqa imataña juraspapas kallpachakunanchismi junt’ananchispaq (1 Ped. 2:12).