Atisunpunin wiñaypaq kausaytaqa

1. ¿Ima ruwananchispaqmi yanapawanchis Jehová Diospa promesankunapi yuyaymanay?

JEHOVÁ DIOSQA “wiñay kausay” suyakuytan prometen payta kasukuqkunamanqa (Rom. 6:23). Chay sumaq promesapi yuyaymanaspaqa astawanmi Jehová Diosta munakunchis. Jehová Diosninchisqa maytan noqanchistaqa munakuwanchis, chaymi payqa chay sumaq promesata juj regalota jina qowanchis paymanta ama jayk’aqpas t’aqakunanchispaq.

2. ¿Imaynatan wiñay kausay suyakuy yanapawanchis?

² Wiñay kausay suyakuymi yanapawanchis ima pruebapipas tarikuspa qaqata sayananchispaq, piña wañuchiyta munawasunman chaypas manan wañuytaqa manchakunchischu, astawanraqmi Jehová Diostaqa servinanchis. Wañunanchiskama junt’aq sonqolla Jehová Diosta servisunchis chayqa jujmantan payqa kausarichimpuwasun, chaymantaqa manañan jayk’aqpas wañusunñachu (Juan 5:28, 29; 1 Cor. 15:55-58; Heb. 2:15). Ichaqa, ¿imaynapin yachanchis wiñay kausay suyakuy mana yanqapaqchu kasqanta? Chaymantan kunan yachasunchis.

JEHOVÁ DIOSQA WIÑAY-WIÑAYPAQ KAUSAQ DIOSMI

3. ¿Qowasunmanpunichu Jehová Dios wiñay kausayta, imarayku? (Salmos 102:12, 24, 27).

³ ¿Qowasunmanpunichu Jehová Dios wiñay kausayta? Arí. Paymantan kausayqa paqarimun, jinaspapas payqa wiñay-wiñaypaq kausaq Diosmi (Sal. 36:9). Jehová Diosqa unay tiempomantaraqmi karqan, manataqmi payqa jayk’aqpas wañunqachu. Salmos 90:2 textopin paymanta nin: “Wiñay-wiñaymanta wiñay-wiñaypaqmi qanqa Dios kanki”, nispa. Salmos 102 textopipas yaqa chhaynatan nillantaq (leey Salmos 102:12, 24, 27). Profeta Habacucpas Jehová Diosmantan nirqan: “Jehová Diosníy, ¿manachu qanqa wiñay-wiñaymanta kausashanki? Ch’uya Diosnilláy, qanqa mana wañuqmi kanki”, nispa (Hab. 1:12).

4. ¿Llakikunanchischu Jehová Diosmanta mana llapanta entiendesqanchismanta?

⁴ Yaqapaschá noqanchispaqqa sasa entiendey kanman imaynapis Jehová Dios wiñay-wiñaypaq kausan chayta (Isa. 40:28). Ñaupa tiempopi runakunapas chaytaqa manapunin entienderqankuchu. Chaymi Elihupas nirqan: “Kausasqan watakunatapas manan yupayta atisunmanchu”, nispa (Job 36:26). Manaña llapantachu imatapas entiendenchis chaypas manan chayraykuchu nisunman “manan kanchu” nispaqa. Kaypi yuyaykusun, mayninpiqa manan entiendenchischu k’anchay imaynatachus funcionan chayta, ichaqa manan chayta mana entiendesqanchisraykuchu nisunman “k’anchayqa manan kanchu” nispaqa. Yachasqanchis jina k’anchayqa kanpunin. Chhaynan Jehová Dioswanpas, manapaschá jayk’aqpas runakunaqa entiendesunmanchu imaynatas Jehová Dios wiñaypaq kausan chayta. Manaña entiendesunmanchu chaypas Jehová Diosqa wiñay-wiñaypaq tukuy atiyniyoq Diosmi (Rom. 11:33-36). Jinaspapas manaraq kay jallp’a pachapas, ch’askakunapas, intipas kashaqtinqa payqa karqanpuniñan. Biblian niwanchis: “Paymi kay pachata kamaqqa, paymi atiyninwan ruwarqan, [...] paymi janaq pachata allin yuyaywan mast’arirqan”, nispa (Jer. 51:15; Hech. 17:24). Ichaqa kanraqmi juj razonkunapas wiñay kausay promesanta suyakunanchispaq, chaymantan kunan yachasunchis.

JEHOVÁ DIOSQA WIÑAYPAQ KAUSANANCHISPAQMI KAMAWARQANCHIS

5. ¿Ima suyakuytan Jehová Dios qorqan Adanmanpas Evamanpas?

⁵ Jehová Diospa tukuy kamasqankunaqa manan wiñaypaq kausanankupaqchu kamasqa karqanku, Adanman Evaman imallan chay sumaq regalotaqa qorqan; wiñay kausay suyakuyta. Ichaqa chayman aypanankupaqmi Jehová Dios Adanta kamachirqan allin kaqta mana allin kaqta reqsichiq sach’ata ama mijunankupaq. Jehová Diosmi payta nirqan: “Sichus mijunki chayqa, wañunkipunin”, nispa (Gén. 2:17). Sichus Adanpas Evapas chayta kasukunkuman karqan chayqa manan wañunkumanchu karqan. Kasukullankumanchus karqan Jehová Diosta chayqa yaqapaschá tiempowanqa jinallata Diosqa permitinman karqan chay sach’aq rurunta mijunankuta. Chayqa wiñaypaq kausay atisqankutan rikuchinman karqan (Gén. 3:22).b

6, 7. a) ¿Imaraykun nisunman: “Runaqa manan wañunanchispaqchu kamasqa karqanchis”, nispa? b) ¿Imakunatan ruwayta munawaq mosoq pachapi kashaspa? (Kay parrafopaq dibujota qhaway).

⁶ Allin yachaq runakunan ninku umanchisqa tukuy ima yachasqanchistapas ruwasqanchistapas waqaychananpaq may jatunpuni kasqanta. 2010 watapi juj periódico nisqan jina umanchisqa kinsa pachaj wata televisionpi qhawasqanchistas llapanta waqaychanman. Ichaqa umanchisqa mastapasraqchá waqaychanman. Manaña chayta allintachu yachakun chaypas chaykunan rikuchiwanchis Jehová Diosqa wiñayta kausananchispaq kamawasqanchista, chaymi ñusqhonninchisqa mana 70 otaq 80 watakunata kausanallanchispaqchu kamasqa karqan, aswanpas mayta kausakunanchipaqraqmi (Sal. 90:10).

⁷ Chaymantapas Jehová Diosqa kamawarqanchis wiñay kausay munaqtan. Bibliaq nisqan jinapas chay wiñay kausay munayqa llapa runaq sonqonpin kashan (Ecl. 3:11). Chayraykun llapa runapas wañuytaqa enemigonchista jina qhawarinchis (1 Cor. 15:26). Kaypi piensasun, ima millay onqoypas jap’iwaqtinchisqa, manan jinallachu kanchis, aswanpas usqhayllan hospitalman rinchis jampichikunanchispaq. Runaqa imaymanatan ruwanchis mana wañuyta munaspa ¿riki? Jinaspapas mayqen familianchispas wañuqtinqa, kuraqña wañunman karqan chaypas khuyaytan waqanchis, manan imanakuytapas atinchischu (Juan 11:32, 33). Sichus Jehová Dios mana wiñay kausananchispaqchu kamawasunman karqan chayqa manachá sonqonchis ukhumanqa churanmanchu karqan chay wiñay kausay suyakuytaqa. Chaykunan rikuchiwanchis Jehová Diosqa wiñaypaq kausananchista munasqanta. Chaypaq kunan yachasunchis imakunatawansi Jehová Dios ruwarqan chay promesanta junt’ananpaq chayta, imakunatawansi qhepa tiempomanpas ruwanqa chayta.

JEHOVÁ DIOSQA MANAN CAMBIANQACHU PROMESA RUWASQANTAQA

8. Isaías 55:11 nisqan jina, ¿junt’anqapunichu Jehová Dios prometesqanta?

⁸ Adanwan Evawan juchallikusqankuraykun noqanchispas juchayoq kanchis, chayraykun wañunchispas. Chhaynaña kaqtinpas Jehová Diosqa junt’anqapunin promesantaqa (leey Isaías 55:11). Payqa maytan munashan pay sonqo runakuna wiñaypaq kausanankuta, ¿imaraykun chayta ninchis? Jehová Diosninchis chayta ruwananpaq prometekusqanraykun. Jinaspapas Jehová Diosqa ñan imaymanataña ruwarqan chay promesanta junt’ananpaqqa.

9. ¿Imatan Jehová Dios prometewanchis? (Daniel 12:2, 13).

⁹ Jehová Diosmi llapa wañusqakunata kausarichinqa jinaspa wiñay kausay suyakuyta paykunaman qonqa (Hech. 24:15; Tito 1:1, 2). Jobqa allintan yacharqan Jehová Diosqa wañupuq runakunata mayta kausarichiyta munasqanta (Job 14:14, 15). Profeta Danielpas allintan yacharqan wañupuq runakuna jujmanta kausarimpunankuta jinaspa wiñay kausay suyakuyniyoq kanankuta (Sal. 37:29; leey Daniel 12:2, 13). Jesuspa tiemponpi judío runakunapas allintan yacharqanku Jehová Diosqa payta serviqkunaman wiñay kausay qoy atisqanta (Luc. 10:25; 18:18). Jesuspas askha kutipin kausarimpuy kananmanta rimarqan, jinaspapas pay kikintan Jehová Diosqa kausarichirqan (Mat. 19:29; 22:31, 32; Luc. 18:30; Juan 11:25).

10. ¿Imatan yachasunman Jehová Dios ñaupa tiempopi askha runakunata kausarichisqanmanta? (Kay parrafopaq dibujota qhaway).

¹⁰ Jehová Diosmi kausay qowaqninchisqa, chaymi payqa atiyniyoq wañuqkunata kausarichinanpaq. Profeta Eliasmanpas atiytan qorqan Sarepta llaqtapi tiyaq viuda warmiq churinta kausarichinanpaq (1 Rey. 17:21-23). Juj tiempo qhepamanpas Jehová Diosqa profeta Eliseomanmi atiyninta qorqan Sunem llaqtapi tiyaq warmiq wawanta kausarichinanpaq (2 Rey. 4:18-20, 34-37). Chaykunan rikuchiwanchis Jehová Diosqa atiyniyoqpuni wañuqkunata kausarichinanpaq kasqanta. Kay pachapi Jesús kashaspaqa askha runakunatan kausarichirqan, chaywanmi rikuchirqan taytanqa atiyniyoqpuni wañusqakunata kausarichinanpaq kasqanta (Juan 11:23-25, 43, 44). Kunanqa Jesusqa janaq pachapin kashan. Jinaspapas Diosmi paymanqa atiyta qorqan janaq pachapipas kay pachapipas kamachikunanpaq, chaymi payqa atin llapa sepulturakunapi kaqkunata kausarichimpuyta. Chayta ruwaspan payqa Diospa munayninta junt’anqa, jinaspapas chay kausarimpuq runakunaqa wiñay kausay suyakuyniyoqmi kausarimunqaku (Mat. 28:18; Juan 5:25-29).

11. ¿Imatan chaskikusunchis Jesuspa wañusqanrayku?

¹¹ ¿Imaraykun Jehová Dios jinallata qhawarqan wawan Jesús sinchita sufrispa wañunanta? Runakunata anchata munakusqanraykun. Chaymi Jesuspas nirqan: “Diosqa anchatapunin runakunata munakurqan, chaymi sapallan Churinta kachamurqan, pipas paypi iñisqanta rikuchiqqa ama wañunanpaq aswanpas wiñay kausayniyoq kananpaq”, nispa (Juan 3:16). Jehová Diosqa wawan Jesusta kay pachaman wañunanpaq kachamusqanraykun juchanchiskunamanta perdonasqa kanchis, wiñay kausaytapas chaskikuyta atinchis (Mat. 20:28). Apóstol Pablon Jehová Diospa munayninmanta rimaspa nirqan: “Wañuyqa juj runallawantaq rijurirqan chayqa, wañusqakunaq kausarimpuyninpas juj runallawanmi kanqa. Imaynan Adanpa causanpi lliu runa wañushanku, chhaynatan Cristorayku lliu runa kausarichisqa kanqaku”, nispa (1 Cor. 15:21, 22).

12. ¿Imaynatan Diospa munaynin junt’akunqa?

¹² Jesusmi kay pachapi kashaspa discipulonkunaman yachachirqan Diospa gobiernonmanta mañakunankupaq, Diospa munaynin kay pachapipas ruwakunanpaq (Mat. 6:9, 10). Jehová Diosqa munanmi runakuna kay pachapi wiñaypaq tiyanankuta. Chay munaynin junt’akunanpaqmi payqa wiraqochanchis Jesucristota reyta churarqan paypa gobiernonpi kamachimunanpaq. Jinaspapas 144.000 runakunatawanmi ajllashan Jesuswan kuska Jehová Diospa munayninta ruwanankupaq (Apo. 5:9, 10).

13. ¿Imatan Jehová Dios kay tiempokunapi ruwashan? ¿Imatan sapankanchispas ruwananchis?

¹³ Kay tiempopin Jehová Diosqa “mana piqpa yupay atinan ancha askha runakunata” yachachishan gobiernonpi sumaqta kausanankupaq (Apo. 7:9, 10; Sant. 2:8). Kay tiempopi runakunaqa guerrakunaq kasqanraykun t’aqanasqa kashanku, cheqninakushanku ima. Jehová Diosta serviqkunan ichaqa kallpachakunku juj nisqalla kausanankupaq, cheqninakuytapas qhawanakuytapas saqepunankupaq. Bibliaq nisqan jina paykunaqa manañan espadataqa jap’inkuñachu aswanpas thajpin tiyanku (Miq. 4:3). Diosta serviqkunaqa manapunin guerramanqa rinkuchu runamasinkuta wañuchinankupaqqa. Aswanpas llapa runakunamanmi cheqaq Diospa munayninmanta yachachishanku, chhaynapi paykunapas qhepa tiempoman cheqaq kausayta chaskinankupaq (1 Tim. 6:19). Chaymantapas paykunaqa Jehová Diospa gobiernontan yanapanku, chaymi familiankuña Diosta servinankupaq jark’akuqtinkupas qolqenkuña pisiyaqtinpas Jehová Diospa yanapayninpi confianku (Mat. 6:25, 30-33; Luc. 18:29, 30). Chaykunawanmi yachanchis Jehová Diospa gobiernonqa cheqaqpuni kasqanta. Jinaspapas chay gobiernon Diospa munayninta junt’anqa.

JUJ SUMAQ SUYAKUY

14, 15. ¿Imaynatan Jehová Dios wañuyta wiñaypaq chinkachipunqa?

¹⁴ Jesusqa ñan Diospa gobiernonpi kamachikushanña, pisi tiempollamantan payqa Diospa llapa promesankunata junt’anqa (2 Cor. 1:20). Jesusqa 1914 watamantapachan enemigonkunaq chaupinpi kamachikushan (Sal. 110:1, 2). Pisi tiempollamantan payqa 144.000 ajllasqa cristianokunapiwan kuska llapa Jehová Diospa enemigonkunata atipanqa (Apo. 6:2).

¹⁵ Waranqa wata Jesús kamachikushaqtinmi kikin Jesús llapa wañupuq runakunata kausarichimpunqa, jinaspa llapa kasukuq runakunata ch’uya kausayman aypanankupaq yanapanqa. Waranqa wata tukuytataq llapa Jehová Diosta munakuq “chanin runakuna kay jallp’ata jap’ikapunqaku, paykunan wiñaypaq chaypi tiyanqaku” (Sal. 37:10, 11, 29). “Último kaq enemigonchis wañuypas ch’usaqyachisqan kapunqa” (1 Cor. 15:26). ¡May kusikunapaqchá chayqa kanqa!

16. ¿Iman tanqawananchis Jehová Diosta servinanchispaq?

¹⁶ Llapanchismi munanchis wiñaypaq kausayta. Bibliapi yachamusqanchis jina chay suyakuyninchisqa cheqaqmi. Chay suyakuyninchismi yanapawanchis sasa tiempokunapi Jehová Diosta tukuy tiempo kasukunanchispaq. Sichus munanchis Jehová Diosta kusichiyta chayqa kallpachakunanchismi Jehová Diostapas Jesustapas qatikunanchispaq. Ichaqa manan kausayninchista salvayta munaspallachu kasukunanchis aswanpas tukuy sonqowan paykunata munakusqanchisraykun (2 Cor. 5:14, 15). Jehová Diosta munakuymi yanapawasun ejemplonta qatikunanchispaq, runakunamanpas paymanta suyakuyninchismanta willamunanchispaq (Rom. 10:13-15). Sichus kallpachakusunchis sumaq runakuna kananchispaq jujkunatapas yanapananchispaq chayqa Jehová Diosqa munanqan noqanchiswan amigontin kayta (Heb. 13:16).

17. ¿Imata ruwananchispaqmi sapankanchis kallpachakunanchis? (Mateo 7:13, 14).

¹⁷ Jehová Diosqa wiñay kausaytan qoyta munawanchis, ichaqa noqanchismantan chayqa kanqa. Chaypaqmi ichaqa kallpachakunanchis wiñay kausay ñanllata purinanchispaq (leey Mateo 7:13, 14). Ichaqa, ¿imaynan kausay kanqa mosoq pachapi? Chaymantan qatimuq yachachikuypi yachasunchis.