¿Wit’usqa sach’a hukmanta wiñanmanchu?

LÍBANO hallp’api cedrokunaqa hatun sach’akunan kanku, munayllañataq kanpas. Olivos sach’aqa manan imanpaschu ladonpiqa. Huch’uychallan millay q’ewe-q’ewetaq kanpas, ichaqa yaqa 1.000 watatan kawsan manataq faciltachu wañun. Saphinkunapas sinchi hatunmi. Wit’unkumanña chaypas, saphin kawsashallan chayqa hukmantan wiñamun.

Chaymi yuyarichiwanchis ñawpa tiempopi Diosta serviq Job runata. Paymi huk sach’amanta rimarqan, yaqapaschá olivos sach’amanta. Paymi nirqan wit’unkumanña chaypas, hukmanta wiñamunanta. Ch’akiriy tiempopipas mana wañusqanta, para chayamuqtin hina “qholla sach’a” hinaraq raphicharikusqanta (Job 14:7-9). Chaywanmi Jobqa nisharqan wañunmanña chaypas, Jehová Dios kawsarichimpunanta (Job 14:13-15).

Campesino runaqa huk sach’ata wit’usqata rikuspan hukmanta wiñamunanta munan. Chay hinatan Jehová Diospas munan wañusqa siervonkunata, askha runakunatawan kawsarimpunankuta (Mat. 22:31, 32; Juan 5:28, 29; Hech. 24:15). Ñoqanchispas maytan munanchis hukmanta kawsanankuta. Chay p’unchay chayamuqtinqa, ¡maytachá kusikusun!