Nombrasqa iñiqmasikuna: Timoteo jina kaychis

QAYNA watallan pachantinpi askha iñiqmasikuna nombrasqa karanku umalliq kanankupaq yanapakuq kamachi kanankupaqwan. Sichus qanpas nombrasqa karanki chayqa, may kusisqachá kashanki.

Kusisqaña kashanki chaypas manchan-manchanpaschá kashanki. Chhaynan sientekusqa Jason iñiqmasipas, paytaqa waynallatan nombrasqaku umalliq kananpaq. Paymi nin: “Nombrawaqtinkuqa mana atiq jinan sientekuq kani”, nispa. Pay jinan Moisespas Jeremiaspas sientekuranku (Éx. 4:10; Jer. 1:6). Qanrí, ¿imatan ruwawaq ama chhayna sientekunaykipaq? Chaypaqmi yuyarisun Timoteoq ejemplonta (Hech. 16:1-3).

TIMOTEOQ EJEMPLONTA QATIKUSUN

Timoteoqa yaqachus jina 20 watanpi kashanman karan Pablo viajenkunaman invitaqtin. Qallariypiqa manchasqapaschá kasharan, mana atiqpaq jinapaschá qhawarikusharan (1 Tim. 4:11, 12; 2 Tim. 1:1, 2, 7). Chhaynaña karan chaypas payqa kallpachakuranmi, chaymi chunka wata pasayta jina Pabloqa Timoteomanta Filipos iñiqmasikunata niran: “Señor Jesús munaqtinqa apurayllan Timoteota kachamusaykichis, chhaynapi qankunamanta willawaqtin kallpachasqa kanaypaq. Manan pipas pay jinaqa kanchu”, nispa (Filip. 2:19, 20).

¿Iman Timoteota yanapanman karan allin umalliq kananpaq? Kunanmi yachasun soqta yanapaykunamanta.

1. Jujkunatan tukuy sonqo munakuran. Pablon Timoteomanta Filipos llaqtapi hermanokunata niran: “Payqa tukuy sonqowanmi qankunata qhawarisunkichis”, nispa (Filip. 2:20). Arí, Timoteoqa tukuy sonqowanmi hermanokunata munakuran, chaymi tukuy imaymanata ruwaran Dioswan allinpi kanankupaq.

William iñiqmasin 20 wataña umalliq jina kashan, paymi chayllaraq nombrasqakunata nin: “Hermanokunata tukuy sonqo munakuy, amataq iñiq t’aqapi ruwaykunallapichu yuyayniykiqa kachun”, nispa. Ama carro manejaq chofer jinaqa kaychu, paykunaqa carro phawachiyllapin yuyayninku kashan manan pasajeronkunapiqa piensankuchu.

2. Diospa llank’aynintan ñaupaqman churaq. Timoteomanta allinta rimasqan qhepamanmi Pablo niran: “Jujkunan ichaqa allinnillankuta maskhashanku, manataq Jesucristoq allinnintachu”, nispa (Filip. 2:21). Chay tiempopaqqa Roma llaqtapin Pabloqa kasharan. Romapi hermanokunaqa paykunaq interesllankutan maskhaqku. Timoteon ichaqa predicananpaq oportunidad kaqtinpas Isaías jinan niq: “Noqan kaypi kashani, noqata kachaway”, nispa (Is. 6:8).

¿Imatan ruwawaq iñiq t’aqapi ruwaykunatapas qanpa ruwanaykikunatapas allinta aparinaykipaq? Chaypaqqa, imachus ‘aswan allin kaqkunata’ ñaupaqman churay (Filip. 1:10). Arí, Dios serviyta ñaupaqman churay. Tiempoykita kallpaykitapas allin yuyaywan utilizay. Pabloq nisqan jina ‘ayqekuy wayna-sipaskunaq munapayayninmanta, kallpachakuy chanin, allin iñiq, munakuq, thaj kausaq kanaykipaq’ (2 Tim. 2:22).

3. Tukuy sonqon Diospaq llank’aq. Apóstol Pablon Timoteomanta niran: “Imaynan juj wawaqa taytanwan llank’an chhaynatan payqa [...] noqawan kuska llank’ashan allin willakuykuna mast’arikunanpaq”, nispa (Filip. 2:22). Chaypi nisqan jina Timoteoqa allin llank’aqmi karan. Chhaynapin Pablowan allin amigontin karanku.

Diospa llaqtanpiqa askhan llank’ana kashan. Chaytachus ruwanki chayqa, kusisqan kanki allin amigokunatan tarinkipas. Chaypaq ichaqa ‘Señorpa llank’ananpi tukuy tiempo imaymanata ruwashallay’ (1 Cor. 15:58).

4. Yachasqanman jinan ruwaq. Pablon Timoteota niran: “Qanmi ichaqa tukuy yuyayta churashanki imachus yachachisqayman, imaynachus kausasqayman, [...] imayna iñiqchus kasqayman, pacienciakuq kasqayman, munakuq kasqayman”, nispa (2 Tim. 3:10). Arí, Timoteoqa imachus yachasqanman jinan kausaran (1 Cor. 4:17).

Qanpari, ¿kanchu yanapaqniyki allin experienciayoq umalli? Manaraq kanchu chayqa usqhaylla maskhay. Chaytan Tom umalliqpas ruwasqa, paymi nin: “Allin experienciayoq umallin allinta yanapawaran consejokunatapas qowaran. Paypa niwasqanman jinan imatapas ruwaq kani”, nispa.

5. Kallpachakuqmi Dios sonqo kananpaq. Pablon Timoteota niran: “Kallpachakushallay Dios sonqo runa jinapuni purinaykipaq”, nispa (1 Tim. 4:7). Chaypi nisqan jina, Timoteoqa pay kikinmi kallpachakunan karan allin cristiano kananpaq. Pabloqa nillarantaqmi: “Leeshallaypuni jujkunaman Diospa simin qelqata, kallpachashallaypuni allin kaqta ruwanankupaqpas, [...] tukuy yuyayta chaykunamanqa churay, chhaynapi iñiypi allin poqosqa kasqaykita lliupas rikunanpaq”, nispa (1 Tim. 4:13-15).

Qanpas kallpachakushallay Diospa nisqanman jina ruwanaykipaq. Diospa llaqtanpiqa lloqsimushallanmi imaynatachus imapas ruwakun chaypaq yanapaykuna, chaytan kasukunayki. Allin experienciayoqña kawaq chaypas aman qanllapiqa confiankichu. Aswanpas Timoteo jina allinta qhawarikuy imaynatachus kausashanki imaynatachus yachachishanki chayta (1 Tim. 4:16).

6. Diospa espiritunpa yanapayninpin confiaq. Timoteoqa Diosmantan llank’anata chaskiran, chaymi chay llank’anata junt’ananpaqqa ‘santo espirituq yanapayninpi’ confianan karan (2 Tim. 1:14).

Donald iñiqmasin askha wataña umalliq kashan. Paymi nin: “Nombrasqa iñiqmasikunaqa Dioswan allinpi kasqankutan cuidananku, chhaynapin iñiypi allinta sayanqaku. Diospa espirituntachus mañakunqaku, Dios sonqotaqchus kanqaku chayqa, juj bendicionmi iñiqmasikunapaq kanqaku”, nispa (Sal. 84:7; 1 Ped. 4:11).

DIOSPA LLANK’ANA QOSQANTA VALORAY

May allinmi nombrasqa iñiqmasikunaq llank’asqankuqa. Jasonmanta yuyarisun, paymi nin: “Kay watakuna umalli jina servisqaypiqa imaymanatan yacharani, chaymi yanapawashan allinta imatapas ruwanaypaq. Maytan kusikuni umalliq kasqaymanta valoranitaqmi chaytaqa”, nispa.

Qanpas kallpachakushallay Dios serviypi. Chaypaqmi ichaqa Timoteo jina kanayki. Chaytachus ruwanki chayqa, juj bendicionmi iñiqmasikunapaq kanki.