Jueces
2 Guilgal pushtumandami Jehová Diospa angelca Bokim pushtuman vichai rishpa cashna nirca: “Egipto llactamanda cangunata llujchishpami, cangunapa punda taitacunaman carasha nishpa jurashca alpacunaman apamurcani. Shinallata cashnatapashmi nircani: ‘Cangunahuan rurashca tratota* na cumplishpaca nunca na saquishachu. 2 Shinallata cangunaca cai alpamanda gentecunahuanga imapash tratotaca na ruranachu canguichi. Paicunapa altarcunatapash tucuchishpami saquina canguichi’ nircanimi. Pero cangunaca ñuca nishcataca na cazushcanguichichu. ¿Imashpata na cazuhuashcanguichi? 3 Chaimandami cashnatapash nircani: ‘Paicunataca cangunapuramandaca na llujchishpa cachashachu. Paicunaca cangunataca umachishpami charinga. Shinami cangunapash paicunapa yanga dioscunata sirvinguichi’ nircani” nircami.
4 Jehová Diospa ángel shina nijpimi gulpi israelitacunaca ninanda huacai callarirca. 5 Chaimi chai pushtutaca Bokim* nishpa shutichirca. Chaipimi paicunaca Jehová Diosmanga ofrendacunata cararca.
6 Josué israelitacunata cachajpimi, cada israelitacunaca paicunaman como herencia urmashca alpacunata dueñoyangapaj rirca. 7 Josué causajuj punllacunapimi israelitacunaca Jehová Diosta sirvishpa causarca. Shinallata Josué huañushca jipa, israelitacunata ñaupaman pushaj jaricuna* causanajushca tiempopipashmi israelitacunaca Taita Diosta sirvishpa causarca. Chai israelitacunata ñaupaman pushaj jaricunaca, Jehová Dios israelitacunamanda jatun cosascunata rurashcataca tucuitami ricurca. 8 Jehová Diosta sirvij Josueca 110 huatacunata charishpami huañurca. Paica Nun shuti runapa churimi carca. 9 Josuetaca, Timnat-Heres pushtupi pai como herencia japishca alpapimi pambarca. Chaica Gaas shuti loma norte ladopi, Efraín urcucunapimi carca. 10 Josuepa tiempopi causashca israelitacunaca gulpimi huañurca. Chai jipa nacirishca israelitacunaca Jehová Diostaca na rijsircachu. Shinallata israelitacunamanda imacunatalla rurashcatapash na yacharcachu.
11 Israelitacunaca Jehová Diospa ricuipi nali cosascunatami ruranajurca. Shinallata Baal yanga dioscunatapashmi adoranajurca.* 12 Israelitacunaca, paicunapa taitacunapa Jehová Diostami saquirca. Taita Diosmi paicunapa taitacunataca Egipto llactamandaca llujchirca. Shinallata paicunaca ladolla pueblocunapi tiaj shuj yanga dioscunata adorashpami chai dioscunapa ñaupapi cungurinajurca. Shinami Jehová Diostaca ninanda culirachirca. 13 Paicunaca Jehová Diosta saquishpami Baal yanga diosta y Astoret shuti yanga dioscunata sirvinajurca. 14 Chaimandami Jehová Diosca israelitacunahuanga ninanda culirarca. Chaimi paicunapa contracuna paicunata vincishpa, paicunapa charishca cosascunatapash apachun saquirca. Chaimi israelitacunaca paicunahuan macanajuitaca ñana ushanajurca. 15 Israelitacuna maiman rijpipash Jehová Diosca paicunapa contrami carca. Jehová Dios nishcashna y Jehová Dios jurashcashnami paicunamanga llaquicunata cachamurca. Chaimandami israelitacunaca llaqui apanajurca. 16 Chaimandami Jehová Diosca paicunapa contracunapa maquimanda salvachun juezcunataca* churan carca.
17 Pero paicunaca juezcunatapash na cazushpami shuj yanga dioscunata adorashpa, chai dioscunapa ñaupapi cungurin carca. Israelitacunaca paicunapa punda taitacuna catishca ñanda ñapash saquishpami causanajurca. Paicunapa punda taitacunaca Jehová Diospa mandamientocunataca cazushpami causan carca. Shinapash paicunaca, paicunapa punda taitacunashnaca na causanllu carca. 18 Jehová Diosca israelitacunapaman juezcunata cachashpaca, Jehová Diosca chai juezcunataca ayudanmi carca. Shinallata juezcuna causanajushca tiempopimi israelitacunataca, paicunapa contracunapa maquimandaca salvan carca. Israelitacunaca paicunapa contracuna llaquichijpi y maltratajpimi paicunaca ninanda huacan carca. Chaita uyashpami Jehová Diosca paicunata ninandapacha llaquishpa salvan carca.
19 Pero shuj juez huañujpica israelitacunaca, cutinmi paicunapa taitacunamandapash yali ashtahuan peor nalitapacha ruran carca. Paicunaca shuj yanga dioscunata catishpa, sirvishpami chai dioscunapa ñaupapi cungurin carca. Paicunaca chaicunata ruranataca nimamanda na saquingapaj munashpami paicunapa munaihuan yalin carca. 20 Chaimi Jehová Diosca israelitacunahuan ninandapacha culirashpa cashna nirca: “Cai llactaca paicunapa punda taitacunahuan ñuca rurashca tratotaca cazuitallapash na cazushpami yangapi churashca. 21 Chaimandami Josué huañushpa na mishai pactashca llactacunataca cangunapa ñaupamandaca na llujchishpa cachashachu. 22 Shinami israelitacuna ñuca ricuchishca ñanda cangunapa taitacunashna catinajushcata o na catinajushcata yachasha. Ñucami Jehová Dios cani” nircami. 23 Chaimandami Jehová Diosca chai llactacuna quidachun saquirca. Chai llactacunataca ñapashca na llujchishpa cacharcachu, ni Josuepa maquipipash na entregarcachu.