Lucas

9 Jesusca paipa 12 apostolcunata tandachishpami, gulpi demoniocunata llujchina poderta paicunamanga curca. Shinallata, ungushcacunata jambina ushaitapashmi curca. 2 Chai jipami paicunataca Taita Diospa Gobiernomanda ali villaicunata predicachun y ungushcacunata jambichunbash cacharca. 3 Paicunataca cashna nishpami cacharca: “Ñanda ringapaca na imatapash apanachu canguichi. Tauna caspiguta, micunahuan cara bolsoguta, tandaguta, culquita, ishcai churajunatapash na apanachu canguichi. 4 Shinallata shuj huasiman yaicushpaca, chai llactamanda rina horascamanmi chai huasipi quidana* canguichi. 5 Pero maijan llactapipash cangunata na chasquijpica paicuna nalita ruranajushcata ricuchingapami, chaimanda ña llujshinajushpaca, cangunapa chaquimanda polvota chafsirina* canguichi”. 6 Shina nijpimi apostolcunaca shuj shuj pueblocunapi ali villaicunata predicashpa rinajurca. Ungushca gentecunatapashmi tucui ladocunapi jambishpa rinajurca.

7 Galilea llactata mandaj Herodesca* tucui ima pasashcatami uyarca. Shinallata, huaquin gentecunaca, Juanmi huañushcacunapuramanda causarishca nishpami parlanajurca. Chaimi Herodesca, imata ruranatapash na atinajurca. 8 Shuj gentecunaca, paica Eliasmi can ninajurcami. Cutin shujcunaca, punda tiempo profetacunapuramanda causarishca* profetami canga ninajurcami. 9 Chaimi Herodesca* nirca: “Juandaca ñucami umata fitishpa huañuchichun cacharcani. Shinaca ¿maijan runamandashi chashna cosascunataca parlanajun?” nishpa. Chaimandami paita ricungapaj munajurca.

10 Apostolcuna tigramushpaca, paicuna imata rurashcatami tucuita Jesusman villanajurca. Chaimi Jesusca paicunahuanlla cangapaj, Betsaida nishca llacta ladoman paicunataca pushashpa rirca. 11 Shinapash chaita yachaj chayashpami ashtaca gentecunaca paita catishpa rirca. Chaimi Jesusca cushijushpa paicunataca chasquirca. Shinallata Taita Diospa Gobiernomanda ali villaicunata predicarca y ungushcacunatapashmi jambirca. 12 Ña amsayajujpimi, Jesuspa 12 apostolcunaca paipaman quimirishpa ninajurca: “Cai pushtuca chulunllamari. Gentecunataca maipi puñuna pushtuta mascachun, imapash micunaguta randigrichun ladolla pueblocunaman y shuj pushtucunamanbash cachapayari”. 13 Shinapash Jesusca nircami: “Cangunami paicunamanga micunaguta carana capanguichi” nishpa. Shina nijpimi paicunaca nirca: “Ñucanchica 5 tandagucunata, ishcai pescadogucunatallami charipanchi. Cai tucui gentecunaman micunaguta carangapaca ¿ñucanchillatachu randigrina capanchi?” nishpa. 14 Chaipica cazi 5 mil jaricunami carca. Shinapash Jesusca paipa discipulocunataca nircami: “Gentecunataca 50, 50 tandanajushpa tiarichun nipaichi”. 15 Chaimi Jesús mandashcashna gulpi gentecunata tiaripaichi nirca. 16 Jipamanga 5 tandagucunata, ishcai pescadogucunata japishpami Jesusca jahua cielota ricushpa, Taita Diosta mañashpa pagui nishpa tandagucunatapash pedaziarca. Chai jipami, tandagucunatapash y pescadocunatapash paipa discipulocunaman cui callarirca. Chaimi paipa discipulocunapash chai gentecunaman cararca. 17 Shinami tucuicuna vijsa pactajta micurca. Puchushcataca* 12 canasto jundatami tandachirca.

18 Chai jipami Jesusca Taita Diosta pailla mañajurca. Paipa discipulocuna quimirimujpimi Jesusca cashna nishpa paicunataca tapurca: “Gentecuna nishcashnaca ¿ñucaca pita cani?”. 19 Chaimi paicunaca nirca: “Huaquingunaca ninajunmi, paica Juan Bautistami can nishpa. Pero shujcunaca, Eliasmi can ninajunmi. Cutin shujcunaca, punda tiempo profetacunapuramanda causarishca* profetami cangui ninajunmi” nirca. 20 Chaimi Jesusca nirca: “Cutin cangunaca ¿ñucaca pita can nihuanguichita?”. Shina tapujpimi Pedroca nirca: “Quiquinga Taita Dios cachamushca Cristomi capangui” nirca. 21 Chaimi Jesusca nipiman na parlanachu canguichi nishpa paicunataca mandarca. 22 Chai jipaca nircami: “Runapa Churica* ashtaca llaquicunatami charinga. Paitaca judiocunata ñaupaman pushajcunapash, sacerdote principalcunapash y Leyta yachachijcunapash na ricunayachingachu. Ashtahuangarin huañuchi tucushpami quimsa punllahuanga causachi tucunga”.*

23 Chai jipami Jesusca tucuicunata nirca: “Ñucata catingapaj munajcunaca, ñana paicunapa munaita rurashpa causanachu can. Ashtahuangarin, cada punllami ñuca apajuj jatun racu caspita* apajunshna ñucata catishpa causana can. 24 Porque pipash paipa causaita* salvangapaj munashpaca, huañuitarami huañunga. Pero pipash ñucata catimanda huañushpaca causaringami. 25 Pipash cai mundopi tucuita charimanda paipa causaita* chingachishpa o paillata llaqui apashpaca ¿ima alitata rurajunman? 26 Ñucapa discípulo cashcata o ñucapa nishcacunapi crishcata canguna pinganayachijpica, Runapa Churipashmi* paipa poderhuan, paipa Taitapa ushaihuan y agllashca angelcunapa ushaihuan shamushpaca cangunata chasquinatapash pinganayachinga. 27 Ciertopachami cangunataca nini, cangunapurapi caipi cajcunamanda huaquingunaca Taita Diospa Gobiernota nara ricushpallataca, na huañungachu” nirca.

28 Cai shimicunata nishcamanda cazi 8 punllacuna jipami Jesusca Pedrota, Juanda y Santiagotapash pushashpa Taita Diosta mañangapaj shuj urcuman vichai rirca. 29 Taita Diosta mañajujpillatami paipa ñavipash punchapambata brillarca. Paipa ropapash yura yura punchapambami tucurca. 30 Ñapashmi Moisés y Elías Jesushuan parlanajuj ricurirca. 31 Moisés y Eliaspash punchapambami brillanajurca. Paicunaca Jesús cai alpamanda imashina rinatami parlanajurca. Chaica Jerusalenbimi pactarina carca. 32 Pedro, Juan y Santiagoca puñushpami quidashcarca. Shinapash ña ali rijcharishpaca Jesús punchapamba cajtami ricurca. Paipa ladopica Moisés y Elías shayanajujtami ricurca. 33 Jesuspa ladomanda paicuna anchurishpa ri callarijpimi, Pedroca Jesustaca nirca: “Yachachij, ñucanchicuna caipi cashcamandaca ninandami cushijupanchi. Quimsa carpa huasigucunata rurangapami munapanchi. Shujtaca quiquinba, shujtaca Moisespa, cutin shujtaca Eliaspami rurangapaj munapanchi” nirca. Imata nijushcataca Pedroca na cuenta japircachu. 34 Pedro shina nijujpillatami, shuj fuyu ricurishpa paicunataca quilpai callarirca. Paicunata chai fuyu quilpajpimi ninanda manllarirca. 35 Chai fuyumandaca cashna nijujmi uyarirca: “Caimi ñuca Churigu. Paitami ñucaca agllashcani. Paitami cazuna canguichi” nishpa. 36 Shina nijujhuanmi Jesustaca pailla shayajujta paicunaca ricurca. Paicunaca, imata ricushcatapash chai punllacunapica, pimambash na villarcachu, upallami quidarca.

37 Cayandi punlla urcumanda uriajunajujpica, ashtaca gentecunami Jesusta tuparingapaj rinajurca. 38 Chaipimi chai gentecunapuramanda shuj runaguca cashna nishpa caparirca: “Yachachij, ñuca churiguta ayudapayari nishpami rogapani. Paica ñucapa shujlla churigumi capan. 39 Ñuca churiguca shuj demonio* japijpimi, na yashcapi shinllita caparin. Chai demoniopa culpamandami ñuca churiguca ataque japishpa, babasta shimiman shitan. Chashna llaquichishca jipapash chai demonioca ñuca churiguta saquingapaca na munanllu. 40 Quiquinba discipulocunatami, ñuca churigumanda chai demoniota llujchipaichi nishpa mañaparcani. Pero paicunaca na usharcachu” nircami. 41 Chaimi Jesusca nirca: “Cai tiempopi gentecunaca* na crij gentecuna, nalicunami can. ¿Ima horacamanda cangunahuan cana tucuni? ¿Ima horacamanda cangunataca aguantana cani? Canba churiguta caiman apamupai” nirca. 42 Chai huambragu Jesuspaman ña quimirijujpimi, demonioca chai huambraguta alpaman shitarca. Chaimi chai huambraguca ataque japijpi, chujchushpa caiman chaiman shitarijurca. Shinapash Jesusca chai demoniota* rimashpami, chai huambraguta jambishpa paipa taitaman curca. 43 Taita Diospa ninan poderhuan Jesús imatalla rurashcata ricushpami, tucuicuna manllarinajurca.

Tucui imata rurashcata ricushpa gentecuna manllarinajujpimi, Jesusca paipa discipulocunataca nirca: 44 “Cai shimicunataca aliguta uyanguichi, yariami causana canguichi. Porque Runapa Churica* contracunapa maquipimi entregai tucunga” nirca. 45 Shinapash paicunaca Jesús imata nijushcataca na intindircachu. Paicuna ama intindichunmi chai shimicunaca pacashcashna carca. Paicunaca manllaimandami chai shimicuna imata ningapaj munashcataca tapungapallapash na munarca.

46 Chai jipami Jesuspa discipulocunaca, paicunapuramanda pi ashtahuan yali cashcata rimarinajurca. 47 Jesusca paicunapa shungupi imata pensanajujta yachashpami, shuj uchilla huambraguta japishpa paipa ladopi churarca. 48 Shina churashpami paicunataca nirca: “Cai huambragushna gentecunata ñucapa shutipi ali chasquijcunaca ñucatapashmi chasquinajun. Shinallata ñucata chasquijcunaca, ñucata cachamuj Taitatapashmi chasquinajun. Tucui cangunapurapi humilde cajcunami ashtahuan yali can” nirca.

49 Jesús shina nijpimi Juanga nirca: “Yachachij, shuj runa canba shutipi demoniocunata llujchijujtami ricurcanchi. Pero paica ñucanchihuan cumba tucushpaca na purijunllu. Chaimi chai runataca ama chashna rurajuichu nishpa jarcarcanchi”. 50 Shinapash Jesusca nircami: “Ama jarcanajuichichu. Na cangunapa contra cashpaca, cangunapa ladomi can” nishpa.

51 Jahua cieloman rina tiempo ña chayajujpimi Jesusca, Jerusalenman rinata imapash jarcachunga na munarca. 52 Chaimi Jesusca paita ñaupashpa richun paipa huaquin discipulocunata cacharca. Shina cachajpimi paicunaca, Jesús maipi mingarina pushtuta alistangapaj Samaria llactapi shuj puebloman rirca. 53 Jesusca Jerusalenman ringapapachami munajurca. Chaita yachaj chayashpami Samaria llactamanda gentecunaca Jesusta mingachingapaca na munanajurca. 54 Chaita ricushpami Santiago y Juanga nirca: “Señor Jesús ¿nachu jahua cielomanda nina urai shamushpa paicunata tucuchichun mañachun munapangui?” nishpa. 55 Pero Jesusca tigrarishpami paicunataca rimarca. 56 Jesusca paipa discipulocunandimi shuj puebloman rirca.

57 Ñanda rinajujpimi, shuj runaguca nirca: “Ñucaca quiquin maita rijtami catipasha”. 58 Pero Jesusca nircami: “Atujcunaca maipi causana pushtutapash charinmi. Jahua cielopi pajarocunapash tazinda charinmi. Shinapash, Runapa Churica* maipi puñuna pushtugutallapash na charinllu”. 59 Chai jipami Jesusca, shuj runagutaca nirca: “Ñucata catihuai”. Chaimi chai runaguca nirca: “Ñuca Señorlla, primeroca ñuca taitata pambangaparami* ringapaj munapani” nishpa. 60 Shinapash Jesusca nircami: “Huañushcacunallata huañushcacunata pambachun saquilla. Shinapash canga, tucui ladocunaman rishpa Taita Diospa Gobiernomanda predicagri” nirca. 61 Cutin shuj runagupashmi nirca: “Ñuca Señorlla, quiquinda catingapami munapani. Pero primeroca, ñuca huasipi causajcunatarami cayacaman nigringapaj munapani”. 62 Chaimi Jesusca nirca: “Alpata yapujushpa huashaman saquishca cosascunata tigrashpa ricujcunaca, Taita Diospa Gobiernopi cangapaca na sirvinllu” nishpa.