2 Samuel
4 Hebrón llactapi Abner huañushcata yachaj chayashpaca Saulpa churi Is-Bosetca ninandami manllanayachirca.* Y tucuilla israelitacunapashmi ninanda preocuparirca. 2 Saulpa churi Is-Bosetca shuacunapura tandanajushca grupocunatami charirca. Chai grupocunataca Baaná shuti y Recab shuti jaricunami mandanajurca. Chai jaricunaca Benjamín jatun familiamanda Rimón shuti beerotita runapa churicunami carca. (Beerot llactapashmi Benjamín jatun familiapa carca. 3 Beerotita gentecunaca escaparishpami Guitaim pushtuman rirca. Paicunaca shuj llactamanda shamushpami cunangaman chai pushtupi causanajun).
4 Saulpa churi Jonatanga Mefibóset shuti churitami charirca. Paica suchugumi carca. Mefibóset 5 huatacunata charijpimi Saúl y Jonatanga huañushcami can nishca noticiaca Jezreel llactamanda uyarirca. Chaimi Mefibosetta viñachij mamaca paita marcashpa pacajungapaj llujshirca. Shina apuro rijujpimi huahuaguca urmarca. Chaimandami Mefibosetca suchugu quidashcarca.
5 Rimón shuti beerotita runapa churicuna Recab y Baanaca Is-Bosetpa huasimanmi rirca. Paicunaca ninanda indijujpimi chaupi punlla Is-Bóset puñujuj horaspipacha chayarca. 6 Recab y paipa huauqui Baanaca Is-Bosetpa huasiman trigota mascangapaj yaicunshnami yaicurca. Shinami paicunaca Is-Bosettaca vijsapi cuchillohuan puñalarca. Chai jipaca escaparishpami chaimandaca llujshirca. 7 Recab y Baana huasiman yaicujpica Is-Bosetca paipa cuarto camapimi puñujushcarca. Chaipimi paicunaca puñalashpa paitaca huañuchirca. Chai jipami paipa umata cuchushpa apashpa rirca. Paicunaca Arabá pushtu ñandaca tuta enteromi purishpa rinajurca. 8 Paicunaca Hebrón llactaman chayashpami Is-Bosetpa umataca rey Davidpaman aparca. Paicunaca Davidtaca cashnami nirca: “Saulpa churi Is-Bosetpa umaca caipimi capan. Saulca quiquinba enemigomi carca. Paimi quiquindaca huañuchingapaj munajurca. Chaimi ñuca amolla, ñuca reylla cunan punllami Jehová Diosca Saulmanda y paipa familiamanda* quiquin vengarichun saquishca” nircami.
9 Shinapash Rimón shuti beerotita runapa churicuna Recab y Baanataca Davidca cashnami nirca: “Jehová Diosmi ñucapa tucui llaquicunamanda salvahuarca.* Chaimi Causajuj Taita Diospa shutipi jurani, 10 ‘Saulca huañushcami can’ nishpa villangapaj shamushca jaritaca japishpami Ziclag llactapi huañuchircani. Paica ali noticiacunata apamujuni yarcami. Pero shina villashcamanda imatapash paganapa randica paitaca japishpami huañuchircani. 11 Shinaca ¿nachu sin culpa jarita paipa huasipillata puñujujpi huañuchishca nali personacunataca chashnallata rurana cani? Canguna Is-Bosetta huañuchishcamandami ñucaca vengarisha. Cangunaca huañunami canguichi” nircami. 12 Shina nishca jipami Davidca paipa soldadocunataca Recabta y Baanata huañuchichun mandarca. Chaquicunata y maquicunata cuchushca jipami paicunataca Hebrón llactapa pozo ladopi huarcushpa saquirca. Pero Is-Bosetpa umataca Hebrón llactapi, Abnerta pambashca pushtupimi pambarca.