2 Samuel
8 Tiempo jipaca Davidca filisteocunahuan macanajushpami paicunataca vincirca. Shinami Meteg-Amá pushtutaca filisteocunapa maquimanda quichurca.
2 Ashtahuanbash Moabita gentecunatapashmi vincishpa saquirca. Paicunataca alpapi sirichishpami quimsa grupopi chaupirca.* Ishcai grupotaca huañuchishpami saquirca, cutin shuj grupotaca causatami saquirca. Moabitacunaca Davidpa sirvientecuna tucushpami impuestocunatapash* pagan carca.
3 Rey Hadadézer Río Eufratespa alpacunata cutin dueñoyangapaj rijujpimi Davidca paitaca vincishpa saquirca. Hadadezerca Zobá llactapa rey y Rehob shuti runapa churimi carca. 4 Davidca rey Hadadezerpa caballocunapi tiarishca mil 700 soldadocunata y chaquilla rij 20 mil soldadocunatami japirca. Chai jipaca carretacunata aisashpa rij caballocunataca suchutami saquirca. Shinapash 100 caballocunatallami na suchuta saquirca.
5 Damasco llactamanda sirio soldadocunaca Zobá llactapa rey Hadadezerta ayudangapami shamurca. Pero cai soldadocunamandaca 22 mil soldadocunatami Davidca huañuchirca. 6 Chai jipami Davidca Siriapi tiaj Damasco llactapi soldadocunata churarca. Shinami siriocunaca Davidpa sirvientecuna tucurca y impuestocunatapashmi* pagan carca. David pihuan macanajujpipash Jehová Diosca mishachunmi ayudan carca. 7 Shinallata Davidca Hadadezerpa sirvientecuna charishca orohuan rurashca redondo escudocunatami quichurca. Y chaicunataca Jerusalén llactamanmi aparca. 8 Ashtahuanbash rey Davidca Bétah y Berotái llactacunamandaca ashtaca ashtaca broncetami aparca. Chai llactacunaca rey Hadadezerpami carca.
9 Rey Hadadezerpa tucuilla soldadocunata David vincishcatami Amat llactamanda Toi shuti reyca uyashcarca. 10 Chaimandami rey Toica paipa churi Joramdaca rey Davidpaman cacharca. Paitaca David imanalla cashcata tapuchun y Hadadezerhuan macanajushpa vincishcamanda felicitachunmi cacharca. (Rey Hadadezerca tauca viajetami rey Toihuanga macanajushcarca). Joramga orohuan, platahuan y broncehuan rurashca cosascunatami Davidmanga aparca. 11 Chaicunataca vincishca tucuilla llactacunata quichushca orota y platata separashcashnallatami rey Davidca Jehová Diosman separarca. 12 Chai platata y orotaca sirio gentecunata, moabita gentecunata, ammonita gentecunata, filisteocunata, amalequita gentecunata y rey Hadadezertapashmi quichushcarca. Hadadezerca Rehob runapa churi y Zobá llactapa reymi carca. 13 Shinallata Davidca Cachi shuti pambacunapi* 18 mil edomita soldadocunata huañuchishpa tigramushcamandapashmi ashtahuan rijsishca tucurca. 14 Ashtahuanbash Davidca Edom llactapica soldadocunatami churarca. Tucuilla Edom llactapimi soldadocunataca churarca. Y tucuilla edomita gentecunami Davidpa sirvientecuna tucurca. David pihuan macanajujpipash Jehová Diosca mishachunmi ayudan carca.
15 Davidca tucuilla Israel llactatami gobernashpa catijurca. Paica tucuilla llactatami alita rurashpa juzgajurca. 16 Zeruyá huarmipa churi Joabca soldadocunata mandajmi carca. Cutin Ahilud runapa churi Jehosafatca llactapi imacunalla pasajta escribijmi carca. 17 Ahitub runapa churi Sadoc y Abiatar runapa churi Ahimelecca sacerdotecunami carca. Cutin Seraya runaca secretariomi carca. 18 Jehoiadá runapa churi Benayaca keretitacunata y peletitacunatami mandajurca. Cutin Davidpa churicunaca funcionario principalcunami* carca.