Romanos

11 Quiquingunataca cashnami tapupani: ¿Taita Diosca paipa llactatachu rechazarca? Na shinachu can. Porque ñucapashmi israelita capani. Ñucaca Abrahanba familiamanda cashpami, Benjamín runagupa jatun familiapuramanda capani. 2 Taita Diosca pai primero agllashca llactataca na rechazarcachu. Israel llactamanda Elías quejarishpa Taita Dios escribichishca shimipi, shuj partepi imata nishcataca ¿nachu yachanguichi? 3 Eliasca nircami: “Jehová* Dioslla canba profetacunatapashmi huañuchishca, canba altarcunatapashmi* tucuchishca. Cunanga ñucallami quidapani.* Ñucatapash huañuchingapami munanajun” nishpa. 4 Shinapash Taita Diosca ¿imatata Eliasmanga nirca? Taita Diosca nircami: “7 mil jaricunami Baalpa ñaupapica na cungurishca. Paicunaca causanajunrami” nishpa. 5 Cai tiempopipashmi Taita Dios ninanda juyashcamandaca* agllashca huaquin gentecuna tian. 6 Shinaca, Taita Diosca paicunapa ruraicunamandaca na agllarcachu. Sino ninanda juyashcamandami* paicunataca agllarca. Paicunapa ruraicunamanda agllashca cashpaca, ñana Taita Dios ninanda juyashpa agllashcacunachu canman carca.

7 Shinaca ¿imatata nipanchiman? Israel llactamanda gentecunaca paicuna ansia munashpa mascanajushcataca na tarircachu. Pero Taita Diospa agllashcacunaca tari usharcami. Cutin chaishujcunaca rumi shungucunami tucurca. 8 Taita Dios escribichishca shimipi nishcashnami can. Chaipica nijunmi: “Cunan punllacamanmi Taita Diosca, paicunataca sumajta puñujunshna cachun saquishca. Chaimi paicunaca ñavita charishpapash na ricui ushan, rinrita charishpapash na uyaita ushan” nijunmi. 9 Davidpashmi cashna nirca: “Paicunapa jatun micuicunaca* tujllashna y trampashna tucuchun. Shinami paicunaca urmashpa castigai tucunga. 10 Shinallata paicuna ama imatapash ricuchun paicunapa ñavipash amsa amsa tucuchun. Paicunaca siempre shuj llasha quipita aparishcashna causanajuchun” nircami.

11 Shinamandami ñucaca tapupani, judiocuna nitijashpa y urmashpaca ¿cutinga ñanachu jatari ushana carca? Na shina carcachu. Pero paicuna pecadota rurashcamandami, na judiocunapash salvarita ushanga. Chaimi judiocunaca envidiashpa ricunga. 12 Judiocuna pecadota rurashcamandami gentecunaca bendiciai tucun. Shinallata judiocuna menos bendiciongunata chasquijpimi, na judiocunapash ashtahuan bendiciai tucun. Shinaca ¿nachu judiocuna completarijpicarin ashtahuan bendiciai tucunga?

13 Cunanga na judío gentecunatami nipani. Na judío gentecunapaman cachashca apostolmi capani. Taita Diosta sirvinataca ninandami valichipani. 14 Shinami ñucashnallata judío gentecunaca quiquingunata envidiashpa ricunga y huaquingunallapash salvarita ushanga. 15 Taita Diosmi paicunataca rechazarca. Chaimi cai mundopi gentecunaca Taita Dioshuan ali tucuita usharca. Pero Taita Dios paicunata salvajpica ¿imashi pasanga? Paicunaca huañuimanda causaiman tigrashcashnami canga. 16 Tandata rurana masamanda primer pedazoguta Taita Diospalla cachun carajpica tucuilla masami Taita Diospalla canga. Shinallata sapi alipacha cajpica, ramacunapashmi alipacha canga.

17 Shinapash olivos yuramanda huaquin ramacunataca faquishpami anchuchishca. Quiquingunaca sacha olivos cashpapashmi, tarpushca olivos yurapi cangapaj injertashca ramacunashna canguichi. Chaimi cunanga olivos yurapa sapimanda yacuta quiquingunapash chupanajunguichi. 18 Chaimandami chaishuj ramacunata yalimi cani nishpaca, na jariyajuna canguichi. Porque na cangunamandachu olivos yurapa sapica causajun. Sino olivos yurapa sapimi cangunamanga causaita cujun. Chaitaca yarinami* canguichi. 19 Cangunaca ninguichipashchari: “Chai yurapi ñucanchita injertangapami huaquin ramacunataca faquishpa anchuchishca” nishpa. 20 Chaica ciertomi can. Paicunaca na crimandami olivos yuramandaca faquishpa anchuchi tucurca. Pero cangunaca crishcamandami olivos yurapi injertai tucushcanguichi. Shinaca, jariyajunapa randica, Taita Diostami manllana canguichi. 21 Porque Taita Diosca olivos yurapa propio ramacunatapash na perdonashpaca, cangunatapash na perdonangachu. 22 Quiquingunaca Taita Dios ninanda llaquij cajta, culiraj Taita Dios cajtapash yachanguichimi. Urmashca ramacunahuanga Taita Diosca culiranmi. Pero quiquinguna paipa ñaupapi ali ricuringapaj esforzarijpica, cangunataca llaquingami. Na shina rurashpaca, cangunapashmi yuramandaca faquishpa anchuchi tucunguichi. 23 Pero judiocuna cutin cri callarishpaca, cutinmi yurapi injertai tucunga. Porque Taita Diosca cutinmi paicunataca injertangalla. 24 Quiquingunaca sacha olivo cuendami canguichi. Shina cashpapashmi, tarpushca olivo yurapi injertashcashna tucurcanguichi. Shinaca ¿nachu chai olivo yuramandallata ramacunatacarin cutin chai yurapillata ashtahuan facilllata injertai usharinman?

25 Huauquicuna, tucuitami yachani nishpaca ama pensapanguichichu. Ama shina pensachunmi, Taita Dios imata pacalla secretopi* charishcata yachachun munapani. Chai secretoca caimi can, Israel llactamanda huaquin gentecunaca na uyangapaj munarcachu. Na judiocunapuramanda Taita Diospa agllashca gentecuna completaringacamanmi shina pasanga. 26 Shinami tucuilla Israel llactaca salvaringa. Taita Dios escribichishca shimipica nijunmi: “Salvangapaj shamujca Sionmandami llujshinga. Paimandami Jacobpa huahuacunaca nalicunata ruranata saquinga. 27 Paicunapa pecadota perdonashpami paicunahuanga shuj tratota* rurasha” nijunmi. 28 Paicunaca, ali villaicunata na uyangapaj munaimandami Taita Diospa contracuna can. Shina pasanaca cangunapa alipallatami cashca. Pero Taita Diosmi paicunataca agllashca. Paicunapa punda taitacunamandami Taita Diosca paicunataca juyan. 29 Taita Diosca imata carashcatapash, picunata agllashcatapash na arripintiringachu. 30 Cangunaca Taita Diosta na cazushpa causajcunami carcanguichi. Pero cunanga judiocuna na cazushcamandami, Taita Diosca cangunata llaquishca. 31 Judiocuna na cazushcamandami Taita Diosca cangunata ayudajun. Shinami Taita Diosca judiocunatapash ayudaita ushan. 32 Paicuna na cazushcamandami, Taita Diosca prezocunatashna paicunataca tratashca. Taita Diosca tucuicunata llaquishcata ricuchingapami shina rurashca.

33 Taita Diospa bendiciongunapash, paipa ali yachaipash, pai imata yachashcapash sumajpachami can. Pai imashina juzgajtaca pipash na cabalta intindi ushanllu. Pai imata rurajtaca na tucuita ali yachai ushanchichu. 34 Porque “¿pita Jehová* Diospa pensamientocunataca rijsita ushashca? ¿O pita Taita Diostaca consejaita ushashca?”. 35 “Taita Dios randi tigrachijuchunga ¿pita Taita Diosmanga primero imatapash carashca?”. 36 Porque Taita Diosmi tucuita rurashca. Tucuimi paimanda tian. Tucuimi paipa cana can. Paitami para siempre alabana capanchi. Amén.