2 Samuel
5 Tiempo jipaca Israel llactapa tucuilla jatun familiacunami Hebrón llactapi Davidta ricungapaj shamurca. Paicunaca Davidtaca cashnami nirca: “Ricui, ñucanchica quiquinba familiami* capanchi. 2 Saúl ñucanchi rey cajpillatami quiquinga Israel llactapa macanajuicunapi dirigin* carcangui. Shinallata Jehová Diosca candaca cashnami nirca: ‘Canmi ñuca llacta Israeltaca cuidagringui.* Israel llactapa liderpashmi cagringui’ nircami” ninajurcami. 3 Chai jipami Israel llactata ñaupaman pushaj jaricunaca* Hebrón llactapi rey Davidta ricungapaj shamurca. Chaimi rey Davidca Hebrón llactapi, Jehová Diospa ñaupapi paicunahuan shuj tratota* rurarca. Chai jipami paicunaca Israel llactapa rey cachun Davidtaca agllarca.
4 Davidca 30 huatacunata charishpami rey tucurca. Paica 40 huatacunatami mandarca. 5 Davidca Hebrón llactamandami Judá jatun familiataca 7 huatacunata y 6 quillacunata mandarca. Cutin Jerusalén llactamandaca 33 huatacunatami tucuilla israelitacunata y Judá jatun familiataca mandarca. 6 Rey Davidca paipa soldadocunandimi Jerusalén llactaman rirca. Paicunaca chai pushtupi causaj jebuseo gentecunahuan macanajungapami rirca. Jebuseo gentecunaca “Davidca caimanga nunca na yaicungachu” nishpami pensan carca. Chaimandami paicunaca Davidmanda burlarishpa cashna nirca: “Canga nunca na caimanga yaicuita ushanguichu. Candaca ñausacunapash, suchucunapashmi calpachinga” nishpami burlarinajurca. 7 Pero Davidca jatun pircacunahuan muyundi pircashca Sion llactatami misharca. Jipamanmi chai llactataca Davidpa Llacta nishpa rijsi callarirca. 8 Chai punllami Davidca cashna nirca: “Ñuca na ricunayachishca jebuseo gentecunata atacangapaj rijcunaca, yacu túnel ucuta rishpa chai ‘suchucunata y ñausacunata’ huañuchingapaj richi” nircami. Chaimandami gentecunaca “suchucunapash, ñausacunapash huasimanga nunca na yaicungachu” nishpa parlan. 9 Chai jipami Davidca jatun pircacunahuan muyundi pircashca llactapi causangapaj quidarca. Chai llactataca Davidpa Llacta nishpami shutichishca* carca. Davidca chai llactapa shuj ladocunapi y Lomapipashmi* pircacunata y huasicunatapash shayachi callarirca. 10 Shinami Davidca ashtahuan ashtahuan alipacha gobernante tucurca. Y Tucuilla Angelcunata Mandaj Jehová Diosmi* Davidtaca ayudajurca.
11 Tiro llactamanda Hiram shuti reyca huaquin mensajerocunatami Davidpamanga cacharca. Shinallata cedro caspicunata, carpinterocunata y albañilcunatami Davidpamanga cacharca. Shinami paicunaca Davidman shuj huasita* shayachi callarirca. 12 Davidca paita Israel llactapa rey cachun Jehová Dios churashcatami cuenta japirca. Shinallata Taita Diosca paipa llacta Israelta ayudangapaj Davidpa gobiernota shinllichishcatami cuenta japirca.
13 Hebrón llactamanda shamushca jipami Davidca Jerusalén llactapica ashtahuan huarmicunahuan* cazararca y shuj huarmicunatapash* japirca. Y chai huarmicunahuanmi Davidca ashtahuan churicunata y ushicunata charirca. 14 Jerusalén llactapi David charishca churicunapa shuticunaca caicunami can: Samúa, Sobab, Natán, Salomón, 15 Ibhar, Elisúa, Néfeg, Jafía, 16 Elisamá, Eliadá y Elifeletmi can.
17 Israel llactapa rey cangapaj David agllai tucushcata uyashpami tucuilla filisteocunaca Davidta mascangapaj rirca. Chaita yachaj chayashpami Davidca pacajuna pushtuman rirca. 18 Filisteocuna chayashpami Refaím pambacunapi* jundamurca. 19 Chaimi Davidca Jehová Diostaca cashna nishpa tapurca: “¿Filisteocunahuan macanajungapaj rinachu capani? ¿Paicunataca ñuca maquipi entregagripanguichu?” nishpami tapurca. Shina tapujpimi Jehová Diosca cashna nirca: “Ari, rilla. Filisteocunataca sin faltami canba maquipi entregasha” nircami. 20 Shina nijpimi Davidca Baal-Perazim pushtuman rishpa filisteocunata vincirca. Shinallata Davidca nircami: “Yacucuna pircata urmachinshnami Jehová Diosca ñuca enemigocunataca mishashpa saquirca” nircami. Chaimandami chai pushtutaca Baal-Perazim nishpa shutichirca. 21 Chai pushtupi filisteocuna paicunapa santocunata saquijpimi Davidpash y paipa soldadocunapash chaicunata apashpa rirca.
22 Jipamanga filisteocunaca cutin tigrashpami Refaím pambacunapi* jundamurca. 23 Chaimi David Jehová Diosta tapujpi paica cashna nirca: “Paicunata de frente atacangapaca ama richu. Chaipa randica muyushpa paicunataca huashamanda atacangui. Paicunataca bekja nishca quirucunapa* frente ladomanda atacangui. 24 Shinaca bekja nishca quirucuna jahuamanda soldadocuna marchanajunshna uyarijpica, paicunata atacangapaj ringuichi. Porque Jehová Dios ñucami filisteocunata mishashpa saquingapaj ñaupashpa rijuni” nircami. 25 Shina nijpimi Davidca Jehová Dios mandashcashna rurarca. Shinami Gueba llactamanda Guézer llactacaman filisteocunata mishashpa saquirca.