Romanos

1 Ñucaca Cristo Jesusta sirvij Pablomi capani. Paimi ñucataca apóstol* cachun agllahuashca. Taita Diospa ali villaicunata gentecunaman predicachunbashmi agllahuashca.* 2 Taita Diosmi cai ali villaicunataca, pai escribichishca shimicunapi pundamandapacha profetacunamanga* ña villashcarca. 3 Chai ali villaicunaca, Taita Diospa Churimandami parlajun. Paipa Churica cai alpapi nacirishca, Davidpa familiamandami carca. 4 Paica Taita Diospa Churipachami can. Porque Taita Diosmi paipa espíritu santota* utilizashpa paitaca huañushcacunapuramanda causachirca.* Chai Churimi ñucanchi Señor Jesucristo can. 5 Jesusmandami Taita Diosca ñucanchita ninanda juyashcata* ricuchirca. Jesusca, na judío gentecunapash paipi crichun, paita cazuchun, paipa shutita respetachunmi ñucataca apóstol cachun agllahuarca. 6 Chai llactacunamandami quiquingunapash Jesucristota catingapaj agllai tucushcanguichi. 7 Cai cartataca Roma llactapi caj huauquipanicunamanmi escribishpa cachamujupani. Taita Diosca quiquingunataca ninandami juyan. Quiquingunatami Taita Diosca paipalla separashca* cachun agllashca.

Ñucanchi Taita Diospash y Señor Jesucristopash quiquingunata ninanda juyachun* quiquingunaman tranquilo ali causaiguta carachunmi mañajupani.

8 Primeroca, quiquinguna crishcamandami Jesucristopa shutipi Taita Diostaca agradicipani. Quiquinguna Taita Diospi crishcataca mundo enteropimi parlanajun. 9 Ñucaca paipa Churimanda ali villaicunata tucui ladocunapi predicashpami, Taita Diostaca tucui shunguhuan* sirvijupani. Na shaijushpa, quiquingunamanda siempre mañajushcataca, Taita Diosca alimi yachan. 10 Taita Diospa voluntad cajpica, imashinapash quiquingunata visitagringapami Taita Diostaca rogajupani. 11 Taita Diospa bendicionmanda parlashpa, paihuan ashtahuan ali amigocuna tucuchun ayudashpa shinllichingapami, quiquingunataca ricungapaj munani. 12 Shuj shimipi nishpaca, canguna crishcamandapash, ñuca crishcamandapash randimanda ayudarishpa shinlli tucungapami, cangunataca ricungapaj munapani.

13 Shinapash huauquipanicuna, quiquinguna yachachunmi munapani, ñucaca shuj llactacunapishnallata, quiquingunapa llactapipash gentecunaman villachishpa, paicunapash discipulocuna tucuchunmi, quiquingunataca tauca viajeta visitangapaj munaparcani. Pero cunangamanga na rita ushapashcanichu. 14 Ñucaca, griegocunahuanbash* shuj llactamanda gentecunahuanbash, ali yachajushcacunahuanbash, na estudiashcacunahuanbash dibi tucushca cuendami cani. 15 Chaimi ali villaicunataca Roma llactapi quiquingunamanbash predicangapaj munajupani. 16 Ñucaca ali villaicunata predicanataca na pinganayachinichu. Porque cai ali villaicunaca, gentecuna crishcamanda paicunata salvangapaj Taita Dios poderta charishcatami ricuchin. Primeroca judiocunata, jipamanga griegocunatami salvaita ushan. 17 Ali villaicunahuanmi Taita Diosca, siempre alita ruraj* Taita Dios cashcata paipi crijcunamanga ricuchishca. Chaimi paicunaca, tucui shunguhuan ashtahuan crin. Porque Taita Dios escribichishca shimipica nijunmi: “Alita rurajca* tucui shunguhuan crishcamandami causashpa catinga” nishpa.

18 Taita Diosca, paita na cazuj gentecunaman y nalita rurajcunamanmi* pai culirashcataca jahua cielomanda ricuchijun. Chai gentecunaca, shujcuna Taita Diosmanda cabalta yachajuchunga na saquinajunllu. 19 Paicunaca Taita Diosmandaca yachanami can. Porque Taita Diosca ñami ashtaca cosascunata paicunamanga ricuchishca. 20 Aunque Taita Diosta na ricui ushashpapash, cai mundota imashina rurashcata yachajushpami paita rijsita ushashcanchi. Shinallata, Taita Dios imacunatalla rurashcata yachajushpami, pai imashina cajtaca yachai ushanchi. Paipa rurashcacunami, siempre poderta charishcata y Taita Diospacha cashcatapash ricuchijun. Chaimi paicunaca, na yachashcanchichu nishpa, imapash pretextota churaitaca na ushan. 21 Paicunaca, Taita Diosta rijsishpapash, na Taita Diostaca respetarcachu. Agradicitapash na agradicircachu. Chaipa randica, imapapash na sirvij pensamientocunatami charirca. Y nimata na intindircachu.* 22 Ali yachajushcacunami canchi ninajushpapash, juizu illacunami tucurca. 23 Nunca na huañuj Taita Diosta alabanapa randica, huañuna gentecunashnalla santocunata rurashpami alabanajurca. Shinallata, pajarocunashnalla santocunata, chuscu chaquiyu y llucashpa purij animalcunashnalla santocunatapash rurashpami alabanajurca.

24 Chaimi Taita Diosca paicunapa shungupi mapa munaicunata catishpa imatapash rurachun saquirca. Shinamandami paicunaca, pinganai cosascunata paicunapa cuerpohuan rurarca. 25 Taita Diospa cabal yachachishcacunata crinapa randica, llullacunatarami paicunaca crirca. Tucuita Ruraj Taita Diosta adorana y sirvinapa randica, Taita Diospa rurashcacunatarami adoranajurca y sirvinajurca. Taita Diosmi para siempre alabai tucuna can. Amén. 26 Chaimi paicunataca, pinganai mapa munaicunata charichun Taita Diosca saquirca. Porque huarmicunaca jarihuan cangapaca ñana munarcachu. Chaipa randica, huarmipurallata pinganai, nalicunata rurangapami munarca. Shina cachunga na Taita Diosca paicunataca rurarcachu. 27 Jaricunapash huarmihuan cangapaca ñana munarcachu. Chaipa randica, jaripurallatami nina japirinshna munarishpa ricurinajurca. Ashtahuangarin jaripurallatami, pingaipa millanai ruraicunata ruranajurca. Chashna nalita ruraimandami paicunaca castigai tucurca.

28 Ashtahuangarin, Taita Diosta rijsinaca na importantechu can yarcami. Shina pensajpimi Taita Diosca, paicunataca imapapash na sirvij pensamientocunata charishpa catichun saquirca. Chaimi paicunaca na ruranacunata rurarca. 29 Paicunaca nalita rurana, pecadota rurana, ansia imatapash munana, jatun nalita rurana, envidiana, huañuchina, macanajuna, umachina, shujcunata sufrichina munaicunahuan jundami carca. Paicunaca chismosocunami carca. 30 Paicunaca llullacuna, Taita Diosta na ricunayachijcuna, nipita na respetajcuna, cridoyashcacuna, jariyashpa parlajcunami carca. Nalita ruranatallami pensarin carca. Taitamamatapash na cazujcunami carca. 31 Na intindijcuna, imata ari nishcatapash na cumplijcuna, familiata na juyajcuna, na llaquijcunami carca. 32 Taita Diosca, chashna nalicunata rurajcunaca, huañunatami miricin nishcami. Chai gentecunaca chaitaca alimi yachan. Shina yachashca jahuapashmi, chai nalicunata rurashpa catinajun. Ashtahuangarin, chashna nalicunata rurashpa catinajujcunataca, cushijushpami ricunajun.