Jonás
1 Jonasca* Amitái shuti runagupa churimi carca. Paitami Jehová Diosca cashna nirca: 2 “Nínive jatun llactaman rishpa chai llactapi gentecuna tucuchi tucunata villagri. Porque ñucaca chai gentecuna nalita ruranajujtami ricushcani”.
3 Pero Jonasca Jehová Diosta na cazushpami mejor Tarsis llactamanrapash risha yarca.* Chaimi Jope shuti llactaman uriajushpa Tarsis llactaman rijuj barcota tarirca. Tarsisman ringapaca, pasajeta pagashpami barcoman vitsarca.* Jonasca Jehová Diosmanda pacajushpami rirca.
4 Chaipimi Jehová Diosca shinlli huairata mar yacuman cachamurca. Y mar yacupica ushashcatami* tamiarca. Chaimi barcoca ña pambarigrijurca. 5 Barcopi trabajadorcunaca ninanda manllarishcami carca. Chaimandami cada uno paicunapa dioscunata mañai callarirca. Barcota fangayachingapami, paicunaca barcopi cosascunata yacuman shitai callarirca. Pero Jonasca barco bodega ucuman rishpami huañujta puñushpa quidashcarca. 6 Chaimi barcopa capitanga Jonaspaman quimirishpa cashna nirca: “¿Puñuitarachu puñujungui? Ucha jatari. Canba diosta mañai. Talvez Taita Diosca* ñucanchita llaquishpa ama huañuchun salvangapashchari”.
7 Barcopi trabajadorcunaca cashnami ninajurca: “Pipa culpamanda cashna llaqui apanajushcata yachangapaca sorteota rurashunchi”. Sorteota rurajpica Jonaspimi urmarca. 8 Chaimi barcopi trabajadorcunaca Jonastaca nirca: “¿Pipa culpamandata cashna llaqui apanajunchiyari? Canga ¿imapita trabajangui? ¿Maimandata shamujungui? ¿Maijan llactamanda, maijan pueblomandata cangui? villayari”.
9 Shina ninajujpimi Jonasca nirca: “Ñucaca hebreo runami capani. Ñucaca jahua cielomanda Jehová Diostami adorani.* Paimi mar yacutapash y cai alpatapash rurarca”.
10 Jonasca Jehová Diosmanda pacajushpa rijushcatami, barcopi trabajadorcunamanga ña villashcarca. Chaimandami paicunaca ashtahuan manllanayachinajurca. Chaimi barcopi trabajadorcunaca ninajurca: “¿Imatata rurarcanguiyari?”. 11 Olascuna ashtahuan ashtahuan manllanaita jatarinajujpimi, barcopi trabajadorcunaca ninajurca: “Mar yacu calmarichunga ¿imatata candaca rurana canchiyari?”. 12 Shina ninajujpimi Jonasca nirca: “Ñuca culpamandami cashnapacha tamiahuan llaqui apanajunguichi. Ñucata mar yacuman shitahuaichi. Chaimi mar yacuca calmaringa”. 13 Shinapash barcopi trabajadorcunaca, mar yacu manñaman cutin tigrangapami barcotaca tucui fuerzahuan manejanajurca. Pero na ushanajurcachu. Porque mar yacupi olascunaca cada vezmi ashtahuan ashtahuan manllanaita jatarinajurca.
14 Chaimi barcopi trabajadorcunaca Jehová Diostaca cashna nishpa roganajurca: “Aij Jehová Dioslla, cai runapa culpamanda ñucanchicuna huañuchunga ama saquipanguichu. Jehová Dioslla, quiquinba voluntad cajpimi cashna pasanajun. Cai inocente runa huañushcamandaca ama ñucanchitaca culpanguichu”. 15 Shina nishca jipami Jonasta japishpa mar yacuman shitarca. Chaimi mar yacuca calmarirca. 16 Chaita ricushpami barcopi trabajadorcunaca Jehová Diosta ninanda respetaimanda shuj sacrificiota* Jehová Diosman cararca y paita sirvingapapashmi prometirca.
17 Jehová Diosca Jonasta langachunmi* shuj jatun jatun pescadota cacharca. Chai pescado langajpimi Jonasca quimsa punllata y quimsa tutata chai pescadopa vijsa ucupi carca.