Familiacunahuanga ¿imashinata ali llevari ushapangui?

Cazarashpaca shuj mushuj familiamanmi tigran. Taitamamacunata juyashpa respetashpapash, quiquingunapaca cusa o huarmimi tucuita yali pundapi cana can. Huaquin familiacunapaca pipash cazarashcata crinaca dificilmi can. Shinapash Bibliapi mandashcacunata cazunaca, familiacunahuan tranquilo cachun, cusahuarmi ali causachunbash ayudangami.

1 FAMILIACUNAHUAN IMASHINA TRATARINATA PARLARIPAICHI

BIBLIAPICA NINMI: “Taitata, mamataca ninanda alicachingui” nishpa (Efesios 6:2). Mashna huatacunata charishpapash siempremi taitamamacunataca ninanda alicachishpa, respetana capanguichi. Shinallata taitamamacunata chapagringapaj cusapash huarmipash asha ratoguta llujchina cashcataca na cunganachu canguichi. Juyaita charishpaca, cusa o huarmi familiahuan ali aparijta ricushpaca, ñucataca ñana juyanllu yashpaca na pensarijunachu canguichi (1 Corintios 13:4; Gálatas 5:26).

CAITA RURAPANGUI:

• Cai shimicunataca ama nipanguichu: “Canba familiaca huasha rimangapallami shuyajun” o “Canba mamaca nimapa na valichihuanllu” nishpa

• Chaipa randica cusa o huarmi imashina sintirijtami ricuna capangui

2 IMASHINA SINTIRISHCATACA PARLANALLAMI CAPANGUICHI

BIBLIAPICA NINMI: “Chaimandami jarica, paipaj taitata, paipaj mamata saquishpa, paipaj huarmihuan tandanajushpa, shujlla aicha tucushpa causanajunga” nishpa (Génesis 2:24). Taitamamacunaca, cazarashca jipapash churitapash ushitapash cuidashpa catinami cani yashpami, huaquimbica yapata satirin.

Taitamamacuna na yapata satirichun munashpaca, cusahuarmi parlarishpami aliguman, na culirashpa quiquinguna imashina sintirishcata paicunahuan parlanalla capanguichi (Proverbios 15:1). Na jariyashpa, ali shunguhuan, na ñapash fiñarishpaca, familiacunahuanbash juyarishpa, aguantarishpa aliguta causachunmi ayudanga (Efesios 4:2).

CAITA RURAPANGUI:

• Familiacuna quiquingunapa causaipi yapata satirijujpi na ali sintirijushpaca, cusahuarmimi na culirashpa aliguman parlarina capanguichi

• Imata ruranatapash ishcandillatami ricuna capanguichi