Barac, Débora, Jaelpash Jehovatami cazurca

Josué runaguca israelitacunata ashtaca huatacunata ñaupaman pushashca jipami 110 huatacunata charishpa huañurca. Josué causajujpica israelitacunaca Jehovata cazurcami. Shinapash Josué huañushca jipaca israelitacunaca, Canaán llactamanda gentecuna shinami yanga dioscunata adorai callarirca. Chaimandami Jehová Diosca “paicunata jatunshna Canaán llactata jatun mandaj Jabín shuti runapaj maquipi” saquirca. Shina rurajpimi israelitacunaca Jehovata ayudahuai nishpa mañanajurca. Chaimi Jehová Diosca Barac shuti runa israelitacunata ñaupaman pushachun agllarca. Baracmi israelitacuna Jehovata cutin ali adorachun ayudagrijurca.

Débora huarmica Dios mandashcacunata villajmi carca. Paica Jehová Dios villashcatami Baracman cashna nirca: ‘Chunga huaranga runacunata canhuan tandachishpa’, ‘Cisón shuti jatun larca yacu ladocaman pushangui’. Chaipimi ‘Jabín shuti runapa soldadocunata mandaj Sísara runataca canba maquipi churasha’ nishpa. Shina nijpimi Barac runaca nirca: ‘Can ñucahuan rijpica ñucapash rishallami’ nishpa. Chaimi Débora huarmica nirca: “Shina cashpaca canhuan rishallami”. Shinapash Sísara runataca canga na huañuchinachu cangui. Jehová Diosca Sísara shuti runataca shuj huarmimi huañuchinga nishcami.

Shinami Débora huarmica, Barac runaguhuan, paipa soldadocunahuanbash Tabor urcuman rishpa macanajungapaj segurarinajurca. Sísara shuti runa chaita yachaj chayashpaca, ‘tucui paipa jirruta rurashca carretacunata, paipa tucui soldadocunatapashmi tandachirca’. Chaimandami Débora huarmica, Baractaca cashna nirca: Jatari cai punllami Jehová Diosca, “Sísara runataca cambaj maquipi churashca” nishpa. Chaimi Barac runaca, Tabor shuti urcumanda urai rirca. Paitaca, chunga huaranga runacunami, Sísara runapa soldadocunahuan macanajungapaj catishpa rinajurca.

Jipamanga Cisón shuti larca yacuta Jehová Dios mirachijpimi Sísara runapa tucui carretacunaca turupi pambarishpa quedarca. Chaimi “Sísara runaca, paipaj carretamanda uriajushpa pacajungapaj calparca”. Shinami Barac runaca, paipa soldadocunahuan Sísara runapa soldadocunata misharca. ‘Sísara runaca pacajungapaj calpashpami, Jael huarmipa carpaman’ yaicurca. ‘Chaiman yaicujpimi chai huarmica lecheta ufiachishpa jatanahuan quilparca’. Sísara runaca shaijushca caimandami puñushpa quedarca. Chaipimi Jaelca shuj estacata japishpa Sísara runapaman upalla quimirishpa chai estacataca alpaman yalijta umapi tacarca. Shinami Sísara runaca huañurca.

Chai jipaca ‘Sísara runata catishpa Barac shamujpimi Jaelca tuparingapaj llujshishpa can mascajushca runata ricuchisha nirca. Chaimi chai huarmipa huasiman yaicushpa Sísara runa huañushcata ricurca’. Chaita ricushpami contracunata mishachun Jehová Dios ayudashcamanda Baracpash, Deborapash Jehovata alabangapaj candarca. Chai jipaca 40 huatacunatami israelitacunaca tranquilo causanajurca.