Saulca Davidpa contrami tucurca

Goliat runata huañuchishca jipaca rey Saulca Davidtami paipa soldadocunata mandachun churarca. Davidca ashtaca macanajuicunata mishaimandami rijsishcapacha tucurca. Macanajuipi mishashpa soldadocunandi huasiman tigrajpica israelita huarmicunaca candashpa, danzashpami cashna nin carca: ‘Saulca mil contracunatami huañuchishca. Pero Davidca 10 mil contracunatami huañuchishca’. Chaimandami Saulca, Davidta ninanda envidiashpa huañuchingapaj munarca.

Davidca arpata alipachami tocanata yachan carca. Shuj punllaca Davidca Saúl uyachunmi arpata tocajurca. Chaipimi Saulca Davidpaman lanzata shitarca. Chaita ricushpa David uchalla urai cumurijpimi chai lanzaca pircapi clavarirca. Chai jipaca Saulca ashtaca viajemi Davidta huañuchingapaj munarca. Chaimi Davidca chaquishca pambacunapi pacajungapaj rirca.

Shina rijpimi Saulca 3 mil soldadocunahuan Davidta mascangapaj rirca. Saulca, David paipa soldadocunandi pacajushpa tianajuj cuevamanllata yaicurca. Chaipimi Davidpa soldadocunaca upallaguta: Cunanmi Saultaca huañuchita ushangui nirca. Shinapash Davidca Saulpa churajuna ropapa puntataca upallaguta cuchurca. Chai jipaca Davidca, Jehová Dios agllashca reyta na respetashcamandami ‘paipa shungu ucupi nali sintirirca’. Chaimandami paita cumba soldadocuna Saulta llaquichichunga na saquirca. Chaimi Saúl chai cuevamanda llujshijpica Davidca: ‘Canba causai ñuca maquipi cajpipash na huañuchircanichu’ nishpa caparirca. Imatata yuyangui, chai jipaca ¿Saulca Davidta alichu tratagrijurca?

Na, na ali tratarcachu. Saulca, Davidta huañuchingapapachami munarca. Shuj tutaca Davidca, paipa sobrino Abisái runahuanmi pipash na sintijta Saulpa carpa huasicunaman yaicurca. Saulta cuidaj Abner runapash puñujurcami. Chaipimi Abisái runaca Davidta cashna nirca: ‘Cunanmi Taita Diosca canba contrataca canba maquipi entregajun. Paitaca huañuchichun saquihuai’ nirca. Shinapash Davidca: Paihuan imata ruranataca Jehová Dios ricuchun saquilla, chaipa randica ‘paipa uma ladopi shayajuj lanzata y yacuta japingapaj jarrata japipai’ nirca.

Davidca chai ladollapi shuj urcuman vitsiashpami Saulpa carpa huasicunata ricurca. Chai urcumandami Davidca: Abner “¿imashpata canba reytaca na ali cuidajurcangui?” “¿Reypa uma ladopi cashca lanzapash y yacuta japingapaj jarrapash maipitayari?” nishpa caparijurca. Chaimi Saulca, David parlashcata rijsishpa: Ñucata huañuchita ushashpapash na huañuchircanguichu. Cunanmi cuenta japini, canmi ñucapa jipaca Israel llactataca mandagringui nirca. Chai jipami Saulca paipa huasiman tigrarca. Shinapash rey Saulpa huaquin familiacunaca Davidtaca juyanmi carca.