Josiasca Jehová Diospa Leytami cazurca

Josiasca 8 huatacunata charishpallatami Judá llactata mandai callarirca. Chai tiempopi gentecunaca magiata rurashpa, yanga dioscunata adorashpami causan carca. Josías ña 16 huatacunata charishpaca Jehová Diosta ali adoranatami yachajungapaj munarca. Shinallata 20 huatacunata charishpaca Judá llactapi yanga dioscunata, chai dioscunapa altarcunatapashmi ñutushpa tucuchirca. Y 26 huatacunata charishpaca Jehová Diospa templo huasita cutin arreglangapami tucui ima minishtirishcata tandachichun mandarca.

Sumo sacerdote Hilquiasmi templo huasipica Jehová Dios escribichishca Leyta tarirca. Chaica Moisesllata escribishca libromi cashcanga. Josiaspa secretario Safán runaca chai librotaca, Josías uyachunmi liirca. Chaita uyashpaca Judá llactapi causajcunaca ashtaca huatacunata Jehová Diosta na cazunajushcatami Josiasca cuenta japirca. Chaimandami rey Josiasca Hilquiastaca: Jehová Diosca ‘ñucanchihuan ninandami fiñarishca’. Imata rurana cashcata yachangapaj Jehová Diosta tapugripai nirca. Huldá shuti profetisa huarmimanmi Jehová Diosca cashna nirca: Judá llacta ñucata saquishcamandami ‘cai llactamanbash, cai llactapi causajcunamanbash jatun llaquita cachamugrini’. Shinapash Josías humilde cashcamandami pai mandajui punllacunapica na llaquichishachu nishpa villachun mandarca.

Shina nishcata uyashpaca Josiasca Jehová Diospa templo huasiman rishpa Judá llactamanda tucuicunata tandachishpami, Jehová Diospa Leyta tucuicuna uyajta liirca. Chaimi Josiaspash, Judá llactamanda tucui gentecunapash Diostaca tucui shunguhuanmi cazushun ninajurca.

Ashtaca huatacunatami Judá llactapica ‘Diosta jatunyachingapaj nishpa, pascua punlla micuitaca’ na rurashca carca. Shinapash Josiasca Diospa Leypica cada huatami Pascua punllata yarina canguichi nishcatami yachajushcarca. Chaimi Josiasca: “Mandaj Diosta jatunyachingapaj, pascua punlla jatun micuita ruraichi” nirca. Chai jipaca Josiasca Jehová Diosta alicachingapaj ashtaca animalcunata huañuchichun. Templo huasipi candajcunapash candachunmi mandarca. Shinami ‘chaipi tandanajushca israelitacunaca pascua punllapi cushijushpa micunajurca. Shinallata levadura illaj tandata micuna jatun fiestatapashmi, 7 punllacaman’ rurarca. ‘Israel llactapica, pascua punllapi micuitaca, Samuel huañushcamandapacha ima horallapash na rurashcarcachu’. Josiasca Diospa mandashcacunataca tucui shunguhuanmi cazurca. ¿Quiquinbash Jehová Diosmanda yachajunata gushtanguichu?