Esterca paipa llactatami salvarca

Judá llactamanda Ester joven huarmiguca Persia llactapi Susa nishca pueblopimi causarca. Esterpa familiataca ashtaca huatacuna huashamanmi rey Nabucodonosorca Jerusalenman prezu apashca carca. Estertaca paipa primo Mardoqueomi viñachirca. Mardoqueoca rey Asuerota sirvijmi carca.

Rey Asueroca shuj mushuj reinatami agllangapaj munajurca. Chaimandami paita sirvijcunaca chai llactamanda juyailla huarmicunata reypaman aparca. Chai huarmicunahuanga Estertapashmi aparca. Chai huarmicunamanda paipa reina tucuchunga Estertami reyca agllarca. Shinapash Mardoqueoca Estertaca: Judiami cani nishpaca ama villanguichu nircami.

Reypa cati mandajcunata mandaj Hamán runaca ninan jariyashcami carca. Tucuicuna paipa ñaupapi cumurichunmi munan carca. Shinapash Mardoqueoca na paipa ñaupapi cumurinllu carca. Chaimandami Hamán runaca ninanda culirashpa Mardoqueota huañuchingapaj munajurca. Hamán runa Mardoqueo judío cashcata yachaj chayashpaca, chai llactapi causaj tucuilla judiocunata imashina huañuchinatami pensarijurca. Chaimi rey Asueromanga: Judiocunaca nalicunami can. ‘Can jatun mandajpaj ali cajpica, tucuicunatami huañuchina’ canchi nirca. Shina nijpimi rey Asueroca: ‘Imata rurashpapash ali cana cajpica ruranguilla’ nirca. Shinami shuj mushuj leyta llujchichun permisota curca. Chai mushuj leypica cashnami nijurca, adar quillapa 13 punllapica gentecunaca tucuilla judiocunatami huañuchina can nishpa. Shinapash Jehová Diosca tucuitami ricujurca.

Reina Esterca cai mushuj ley llujshishcataca nimata na yacharcachu. Chaimi Mardoqueoca chai leymanda shuj copiata Esterman cachashpa: ‘Reypaman rishpa parlanami cangui’ nirca. Chaimi Esterca: ‘Maijan cashpapash rey na cayajpita ricungapaj yaicujpica huañuchi tucunami’. ‘Ñuca reyta ricuchunga, cai quillataca na cayahuashcachu’. Shinapash, ‘reyhuan parlangapaj yaicushami. Mandashcapi nijunshnallata na yaicunalla cajpipash, chaiman yaicujpi huañuchijpica, huañushatachari’ nirca.

Reina Esterca jatun mandajpa ucu patiomanmi yaicurca. Rey Asuero, Esterta ricushpaca ‘oro varata paipa ñaupaman chutashpami ricuchirca’. Reina Ester, reypaman quimirijpimi reyca: ‘¿Imatata munanpagui?’ nishpa tapurca. Shina nijpimi Esterca: ‘Can jatun mandaj ñuca rurashca jatun micuiman, Hamán runandi shamupanguichi’ nirca. Chai jipaca Esterca cutinmi shuj micuiman invitarca. Chaipica cutinmi reyca Estertaca: ‘¿Imatata munapangui?’ nishpa tapurca. Chaimi Esterca: ‘Ñucata huañuchingapaj y, ñuca llactamanda gentecunata huañuchingapami munanajun por favor salvahuai’ nirca. Chaimi reyca: ¿Pita cangunataca huañuchingapaj munajunyari? nirca. Shina tapujpimi Esterca: ‘Ñucanchita fiñaj, ñucanchita na ricunayachij runaca Hamán shuti runami’ can nirca. Chaita uyashpami rey Asueroca ninanda culirashpa chai rato Hamán runata huañuchichun mandarca.

Hamán Judiocunata huañuchingapaj rurashca leytaca ni pipash na cambiaita usharcachu. Ni rey Asueropash na cambiaita usharcachu. Chaimandami rey Asueroca paipa cati mandajcunata mandachun Mardoqueota churarca. Shinallata shuj mushuj leyta llujchichunbashmi permisota curca. Chai leypica cashnami nijurca, pipash judiocunata atacajpica paicunaca difindirinallami can nishpa. Adar quillapa 13 punllapimi judiocunaca paicunapa contracunata misharca. Chai punllamandami judiocunaca paicunapa contracunata mishashca punllata tucui huatacuna yari callarirca.