Shinlli punllacunapica randimandami ayudarirca

NOEMÍ huarmiguca shuj shuj llaquicunatami charirca. Israel llactapi ninan yarjai tiempo callarijpica paipa cusaca Belén llactapi paicunapa huasimanda llujshishpa Moab llactaman rina cashcatami decidirca. Shuj punlla paipa cusa huañujpica Noemica paipa ishcai churicunahuanllami Moab llactapi quidarca. Jipamanga paipa churicunaca Moab llactamanda Jehovata na sirvij huarmicunahuanmi cazararca. Más o menos 10 huatacuna jipaca Noemica shuj jatun llaquitami charirca. Paipa ishcai churicunaca shuj huahuagutallapash na charishpallatami huañurca. Shinaca Noemica cusa illa, churicuna illami quidarca. Nietocunatapash ñana chari ushagrijurcachu.

Noemí huarmiguca: “Moab llactapica imapapash na quidanachu cani” nishpa pensarimandami Belén llactaman tigranata decidirca. Cai mayorlla huarmiguca Belenman chayangapaca más o menos shuj semanatami rina carca. Callaripica Rut y Orpá, paipa jachungunami paihuan rinajurca. Shinapash Noemica paipa jachunguna llactamanda, familiacunamanda carupi causachunga na munarcachu. Shinallata cutin cazarashpa huahuacunata charichun jarcangapaca na munarcachu. Shinaca paipilla pensarinapa randica, paipa jachungunamanda preocuparishpami paicunapa mamapa huasiman tigrachun cutin cutin nirca. Noemica Belén llactaman pailla ringapaj dispuesta cashpaca na manllaj cashcatami ricuchirca. Shinapash paipa jachungunaca ¿imatata rurarca? Ishcandi huacashpapash Orpá huarmica tigrarcallami. Pero Rutca Noemihuanmi quidarca.

Rutca Noemimanga: “Quiquinda saquishpa richunga ama nihuaichu. Ñucaca quiquin maiman rijpipash quiquinhuanmi risha y quiquin maipi pacarijpipash chaipimi pacarisha. Quiquinba familiapash ñucapa familiami canga. Y quiquinba Taita Diospash ñucapa Taita Diosmi canga. Quiquin maipi huañujpipash chaipimi ñucapash huañusha y chaipimi pambai tucusha” nircami. Rutca shinlli huarmi cashcata, shujcunata na saquijlla cashcatami ricuchirca. Shinallata Noemishnallata Jehovatalla adoranatami decidirca.

Rutca paipa costumbrecunata, familiata, Moab llactamanda dioscunata huashaman saquishpami Noemihuan Israel llactaman rirca. Belén llactaman chayajpica huaquin huarmicunaca Noemí ninanda cambiashcata ricushpami manllarirca. Noemica paicunamanga: “Jehová Dios tucuita quichushcamandami llaquillapacha cani” nircami. Rutca Noemita ayudangapaca ninandami esforzarishcarca. Chaimi Noemí nishcata uyashpaca llaquilla sintirishcanga. Shinapash Bibliapica Rut culirashcataca na ninllu. Chaipa randica, paipash, paipa suedrapash minishtirishca micunaguta charingapaca ladolla pambacunapi cozechadorcuna saquishca granocunata pallangapami rirca.

Rut pambapi shinllita trabajajushcatami Boaz runaguca cuenta japirca. Paica ashtaca culquita, alpacunata charij, Jehovata sirvij, Rahab huarmigupa churimi carca. Cai runaguca: “Chai huarmica ¿pita can?” nishpami tapurca. Shinami Noemita ayudangapaj Rut imatalla rurashcata yachaj chayarca. Shinallata Jehová paita y Noemita cuidachun saquishcamandami felicitarca. Ashtahuangarin paipa trabajadorcunataca Rutta ama molestachunmi mandarca.

Ña tutayashcapica Rutca Boaz paita ali ali tratashcatami Noemimanga parlarca. Chaita uyashpaca Noemica ninandami cushijurca. Chaimi Noemica: “Paihuan cazarangapashchari” nishpa pensarirca. Boazca Noemipa cusa Elimelecpa familia o parientemi carca. Y Taita Diospa Leypica joven viudacunata ayudangapami shuj ley tiarca. Viuda quidashpaca paipa cusapa pariente cercanohuanmi cazaraita usharca. Shinaca Boaz y Rut shuj huahuata charijpica chai huahuaguca Elimelecpa miraimanda o familiapura cuendallatami cana carca. Shinami Elimelecpa miraicunaca na chingarigrijurca. Paipa herenciapash familiapillatami quidagrijurca (Deut. 25:​5, 6). Jipamanga Noemica Ruttaca imata rurana cashcatami yachachirca.

Rutpa ñaupapi talvez nalishnalla ricurijpi, ashata manllarishpapash Rutca: “Noemí imata nishcataca rurashami” nircami. Chai tutaca Rutca granota trillana pambamanmi rirca. Jaricunaca cozechashca granocunata mundunashpa ladopimi puñun carca. Rutca Boazpaman upallaguta quimirishpa, chaqui pundapi jatanata ashaguta alzachishpami chaipi siririrca. Boaz rijcharijpica Rutca Taita Diospa Leypi ima nishcata aliguman yarichishpami paita ayudachun mañarca. Chai ali runaguca Rut manllai manllai, pingai pingai cajtami cuenta urmashcanga. Shinapash Rut huarmigu na manllaj cashcata, Jehová Diosta y Noemita na saquishpa tucui shunguhuan juyashcata ricushpaca manllarishcami quidarca. Boazca: “Ari, cazarashallami. Shinapash Taita Diospa Leypi nishcashna canhuan cazaraita o na cazaraita ushashcatami ricunara cani” nircami.

Cayandi punllaca Boazca Belén llactata ñaupaman pushaj ancianocunapaman rishpami Taita Diospa Leyta catishpa tucuita rurarca. Ruthuan cazarashpami Obed shuti churiguta charirca. Noemica paipa nieto Obedtaca ninandami juyarca. Jipamanga rey Davidca Obedpa familiamandami llujshirca. Ashtaca huatacuna jipamangarin Taita Dios agllashca Mesías o Jesuspashmi Obedpa familiamanda llujshirca (Mat. 1:​5, 6, 16). Noemí y Rut na manllaj cashcamandami Jehová Diosca paicunataca ninanda bendiciarca.

Bibliapi ima nijta liipai

• Rut 1:1–4:22

¿Imatata nipanguiman?

Noemí y Rutca ¿imashinata na manllashcataca ricuchirca?

1. 2. Rut huarmigu Boazpaman tuta rishpa relaciones sexualesta charingapaj na rishcataca ¿imashinata yachapanchi? (ia 47 párrs. 17, 18).

   Respuesta

2. 3. Boazca Ruttaca “ñuca huahualla” nircami. Boaz shina nishcamandaca ¿imatata paimandaca yachajupanchi? (Rut 2:8; w16.11 3).

   Respuesta

3. 4. Boaz runagu Ruthuan cazarangapaj ari nishpaca caishuj parientehuan ricujpica ¿imashinata na mitsa cashcata ricuchirca? (w23.03 14). B

   Respuesta

   

Imata yachajushcapi pensaripai

• Rutca shinllita trabajaj, agradicinata yachaj huarmigumi carca. Culqui faltalla cajpica ¿imashinata paipa ejemploca ñucanchitaca ayudaita ushan? C

  Respuesta

  

• Noemí yapa llaquilla cajpica Rutmi animashpa shinllichirca. Cutin Noemica humilde caimandami paipa ayudataca chasquirca. Paicunamandaca ¿imatata yachajupanchi?

  Respuesta

• ¿Imashinata Rut y Noemipa ejemplota catishpa na manllashcata ricuchita ushapangui?

  Respuesta

Ima pasashcapi pensaripai

• Cai historiaca Jehová Diosmandaca ¿imatata yachachihuan?

  Respuesta

• Cai historiaca Jehovapa voluntadhuan y Bibliapa temahuanga ¿imatata ricunata charin?

  Respuesta

• Noemí y Rut causarijpica ¿imatata paicunata tapungapaj munaiman?

  Respuesta

Ashtahuan yachajupai

Rut libropica ninanda juyanamandaca ¿imatata yachajupanchi? Chai libropi yachajushcacunataca ¿imashinata ñucanchi causaipi pactachita ushapanchi?

“Huauquipanicunataca ninanda juyashpa catipashunchi” (w21.11 8-13)

Rut y Noemimanda quiquinba familia yachajuchunga cai historiata utilizapai.

“Rut huarmiguca shuj ali amigami can” (ijwis tema 12)