Ama yapata ufiangapaca ¿imatata rurai ushapanchi?

Primer temapica Tonymandami yachajuparcanchi. Paita ayudachun saquishpaca, paica na huañunmanllu carca. Paica ashtacata ufiashpapash na imapash pasahuangachu yanmi carca. Pero ¿imamandata shina pensashpaca pandarijurca?

Paica yapata ufiaimandami, trago pandachijpi shina pensarijurca. Paipa cuerpota y yuyaicunata trago afectajujtaca, na cuenta japircachu. Yapata tragota ufiashpa catimandami, juizu chingashpa nima nimata ñana yaipi cai ushan carca.

Tonyca tragota ufianata na saquingapaj munaimandami shina pasarca. Albertopash tragota saquingapaca na munanllu carca. Trago paita controlajushcataca na reconocingapaj munanllu carca. Albertoca ninmi: “Pacallami ufian carcani. Yapata ufiashpapash, ashagutallami ufiajuni ninmi carcani. Na imapash importantetashnami ricun carcani. Ufianataca na saquingapaj munanllu carcani” ninmi. Shina pensashpami tanto Tonypash como Albertopash pi imata nijpipash na imapash pasashunllu yan carca. Shinapash tragoca paicunataca controlajurcami. Shina situacionbi caj gentecunaca ¿imatata rurai ushan?

Tragota saquingapaj esforzaripangui

Ashtaca gentecunaca Jesuspa consejota cazushpami ufianataca saqui ushashca. Jesusca cashna nishpami consejarca: “Canba ali lado ñavi pecadopi urmachijujpica, llujchishpami caruta shitana cangui. Cuerpo entero tucuchi tucunapa randica, shuj ñavi illa quidashparapashmi ashtahuan ali canman” (Mateo 5:29, La Biblia, Traducción del Nuevo Mundo [TNM]).

Taita Dioshuan ali amigo canata na imapash jarcachun saquina cashcata intindichingapami Jesusca chai comparaciondaca nirca. Huaquinbica ufianata saquinaca ñucanchi cuerpomanda ñavita llujchijuj cuendami shinlli caita ushan. Pero shinapash ufianata saquishpami ñucanchi yuyaicuna ama huaglichun y alcoholismopi ama urmangapapash cuidarinajunchi. Shinaca, si pipash yapatami ufiajungui nijpica, ashatalla ufiangapami esforzarina capangui.a Y ashatalla ufiaita na ushashpaca mejor completamente ufianatami saquina capangui. Aunque tragota saquina sinlli cajpipash, quiquinba causaita huaglichinapa randica mejor tragota ufianatarapashmi saquina capangui.

Na alcohólico cashpapash yapata ufianata yachajpica ¿imata pasan? Ama yapata ufiangapaca ¿imatata rurai ushapanchi?

Caicunata rurapangui

1. Taita Diostami siempre mañana capangui. Taita Diospi crishpa y paipa ñaupapi ali ricuringapaj munajcunataca Bibliapica cashnami nin: “Ima illajpipash, na chaitalla yariashpa llaquilla causanachu canguichi. Ashtahuangarin Taita Diosmanmi, imatapash villashpa ninanda mañana canguichi. Tucui imamandapash pashi nishpa mañaichilla. Casilla ali causaitaca, Taita Diosmi caramunga. Chashna aliguta causanataca, pipash na yachajui ushanalla cajpimi, cangunapaj shungutapash, yuyaicunatapash, Cristo Jesushuan shujlla tucushcamanda huacaichijunga” nirca (Filipenses 4:6, 7). Pero casilla ali causaiguta Taita Dios carachunga ¿imatata Taita Diostaca mañana capangui?

Primeroca tragota yapata ufiajushcatami reconocina capangui. Y chai problema quiquinba responsabilidad cashcatami yaipi charina capangui. Shinallata, caitami ruragrini nishpa Taita Diosman parlajpica, paica tragota ufiana viciota saquichun y shuj jatun problemacunamanda caruyachunbashmi ayudanga. Porque Proverbios 28:13​pica ninmi: “Maijan cashpapash paipaj juchacunata pacaj runaca, ali causaitaca na ushangachu. Ashtahuangarin juchacunata villashpa, tucuita saquij runataca, Diosmi llaquinga” nijunmi. Jesuspash nircami, Taita Diostaca “juchata rurana munaicunamandapash jarcahuangui” nishpami mañana canguichi (Mateo 6:13). Shinaca Taita Diosta tucui shungu mañajushcata ricuchingapaca ¿imatata rurana capangui? Quiquinba oraciongunata Taita Dios uyashcataca ¿imashinata yachai ushapangui?

2. Biblia ayudachunmi saquina capangui. ‘Taita Diospa Shimica causaj cashpami, ninan ushaita charin. Shinallata yuyaicunatapash, shungu imata yarijujtapash, tucuitami rijsichijun’ (Hebreos 4:12). Yapata ufiana costumbreta charijcunaca, Bibliapi huaquin textocunata cada punlla liishpa, chaicunapi pensarishpami machana viciotaca saqui ushashca. Salmo librota escribij runaguca nircami: ‘Nali runacuna yuyaita cushcata na catijca, ninandami cushijun. Mandaj Dios mandashcata pactachishpami cushijun. Tutapash, punllapash chai mandashcataca aliguta yariajunllami’. Shina rurashcamandami ‘tucui imata rurajpipash ali llujshinga’ (Salmo 1:1-3).

Albertoca, testigo de Jehovacunahuan Bibliata estudiajuimandami ufiana viciotaca saquita usharca. Paica ninmi: “Bibliata estudiaimandami ufiana viciotaca saqui usharcani. Sinoca cunanbica huañushcami caiman carcani” ninmi.

3. Controlarinatami yachajuna capangui. Bibliapi nishca shinaca, huaquingunaca nara Jesuspa discipulocuna cashpaca machadorcunami carca. Pero ‘Taita Diospa espiritumandami’ limpiai tucurca (1 Corintios 6:9-11). Taita Diospa espíritu santo ayudajpimi paicunaca ña ama machangapaj, ña ama fiestacunaman ringapaj controlarinata yachajurca. Taita Diospa Shimi Bibliapica nin: ‘Na vinota ufiashpa machanachu canguichi. Ashtahuangarin Diospa espíritu jundami causana canguichi’ (Efesios 5:18; Gálatas 5:21-23). Ashtahuanbash Jesucristoca nircami: ‘Jahua pachapi cangunapa Taitaca, paipa jucha illa espirituta mañajpica’ carangami. Chaimandami Taita Diostaca mañana canguichi ‘paica carangallami’ nirca (Lucas 11:9, 13).

Shinaca Taita Diospa ñaupapi ali ricuringapaj munajcunaca controlarinatami yachajuna can. Y chaipaca Bibliatami liishpa, estudiashpa y Taita Diosta tucui shunguhuan siempre mañariajuna can. Y desanimarishpaca Bibliapi cai shimicunatami yarina can: ‘Maijambash paipa munaitalla catishpa tarpunshna rurashpaca, chai munaita rurashcamandami, chingaita chingagrinata japinga. Ashtahuangarin Diospa espíritu munashcata tarpunshna rurashpaca, Diospa espiritumandami causaita causagrinata japigringa. Imata cashpapash aliguta ruranataca, na shaijunachu canchi. Na cungashpa aligutalla rurashpaca, japina punllacuna chayamujpimi, granota tandachinshna japinajushun’ (Gálatas 6:8, 9).

4. Nali amigocunamandaca caruyanami capangui. Proverbios 13:20​pica ninmi: “Alipacha yachajushca runacunahuan tandanajuj runaca, alipacha yachajushcami canga. Ashtahuangarin shinlli shungu runacunahuan tandanajuj runaca, ninandami llaquichi tucunga”. Shinaca quiquinba amigocunamanga, ñana ufiagrinichu nishpami villana capangui. Shina nijpica, huaquingunaca talvez quiquinda rimanga o ufianataca ama saquichu ningami. Bibliaca advirtircami ‘machashpalla purishpa, amingacaman fiestata rurashpa causanata’ saquijpica ashtacacunami ‘manllarishpa, cangunataca rimashpa llaquichinga’ nishpa (1 Pedro 4:3, 4). Shina cajpica, mejor chai amigocunamandaca caruyanami capangui.

5. Maicamanlla ufiai ushashcataca alimi yachana capangui. Romanos 12:2​pica ninmi: ‘Na cai pachapajtalla rurashpa cushijushpa causanachu canguichi. Ashtahuangarin cangunapaj yuyaita Dios mushujyachishcamandami, mushujta causana canguichi. Shina causashpami, imami Taita Diospa munai cajta, paita cushichinata, ima pandatapash na rurashpa causanata yachanguichi’ ninmi. Shinaca ¿Taita Diospa ñaupapi ali ricuringapaj munapanguichu? Chaipaca, Bibliapa consejocunata catishpami maicamanlla ufiai ushashcataca ali yachana capangui y gentecuna ima nishcataca na catinachu capangui. Pero ¿imashinata maicamanlla ufiai ushashcataca yachai ushapangui?

Si trago umata japijpi y ña muspayashca cashpaca, ñami yapata ufiapashcangui. Shinaca, ufianata decidishpaca muspayangacaman, umata japingacamanga na ufianachu capangui. Honradamentemi maicamanlla ufiai ushashcataca ricuna capangui. Na imapash pasangachu yashpa ashaguta yapallaca na ufianachu capangui.

6. Na ushapanichu ninataca na manllanachu capangui. ‘Usharina cajpillami: “Ari” nina capangui. Na usharina cajpica: “Na” ninami capangui’ (Mateo 5:37). Shinaca si pipash aunque carana munaihuan ufiapai nijujpipash, na ushapanichu ninallami capangui. Pero siempremi aliguman nina capangui. Colosenses 4:6​pica ninmi: “Siempremi cachihuan mishquiyachishcashna, juyaillaguta parlana capanguichi. Shinami cada unoman imata ninata yachapanguichi”.

7. Ali amigocunatami mascana capangui. Espiritualmente ayudaj y ama yapata ufiachun ayudaj amigocunatami masana capangui. Bibliapica ninmi: “Shujlla causangapaj randica, ishcaipura causanami ashtahuan ali. Shina causashpami, imata rurashcamandapash ashtahuan japinata charin. Shuj urmajpipash, shujca paipaj cumbata jatarichingami” (Eclesiastés 4:9, 10; Santiago 5:14, 16,TNM). Estados Unidosmanda Instituto Nacional sobre el Abuso del Alcohol y el Alcoholismopash ninmi: “Ninanda ufiangapaj munajushca ratocunapica, quiquinba familiapa o amigocunapa ayudatami mascana cangui” ninmi.

8. Imata decidishcataca pactachinapachami capangui. Santiago 1:22 y 25​pica ninmi: ‘Diospa Shimitaca pactachijcuna caichi, na yanga uyashpalla purijcunachu cana canguichi. Uyashpalla purinajushpaca, cangunallatami umachirinajunguichi. Ashtahuangarin huatashcashna causanajujmanda cacharichij Diospa na pandashpa mandashca Shimita uyashcata shungupi alicachishpaca, na cungashpami pactachinga. Shina pactachishpaca, imata rurashpapash ninandami cushijunga’.

Ufiana viciota mishangapaca ¿imatata rurana capangui?

Tragota yapata ufiajcunaca na tucuicunachu alcoholicocuna tucun. Shinapash yapata ufiajcunaca, cuerpopipash y mentepipash ali sintiringapami tragota ufianatapacha minishtin. Chai viciota mishangapaca, saquina munaita charinalla o espiritualmente ayudata chasquinallaca na suficientechu can. Albertoca ninmi: “Tragota ufianata saquingapaj munajushca tiempopica, tragota na ufiashpaca imatapash ninanda nanajpishnami sintirin carcani. Chaimi intindircani que espiritualmente ayudata chasquishpapash doctorcunahuan tratamientota catinata minishtijushcata”.

Ashtaca alcoholicocunapash shinallatami pasashca.b Juizu cabal y Taita Diospa ñaupapi ali ricuringapaj munashpami huaquingunaca hospitalpi internai tucushca. Shinami tragota ufianata saquingapaj munajushca tiempopica, ninanda ufiangapaj munaicunataca aguantai ushan o controlaringapaj jambicunata ufian. Taita Diospa Churica milagrocunata ruraita ushashpapashmi nirca: ‘Nanaita na charijcunaca, jambij runataca na mascanllu. Huañujujcunallami jambijtaca mascan’ (Marcos 2:17).

¿Imamandata Taita Diospa consejocunata pactachinaca ali can?

Bibliapi tiashca ali consejocunaca, Taita Diosmandami shamun. Paica cunan punllacunapipash y shamuj punllacunapipash para siempre ali causachunmi munan. Albertoca ñami 24 huatacunata tragotaca ñana ufian. Paica pundacuna imashina Taita Dios ayudashcata yarishpami cushijushpa huacanalla cashna nin: “Ñuca causaipi cambiachun Jehová Dios ayudangapaj munajujta ricushpami ninanda cushijurcani. Paica ñucataca alimi intindihuan, ñucamandaca preocuparinmi y justo ayudachun minishtijuj horasmi paica ayudahuan. Ñucata ayudashcamandaca tucui shunguhuanmi ninandapacha agradicini”.

Shinaca yapata ufiangapaj munajushpa o alcohólico cashpaca ama desanimaripanguichu. Ashtacacunapashmi Albertoshna ufianata gushtashpapash yapata ufianata o nimata ña ufianataca saqui ushashca. Ufianata saquingapaj esforzarishcataca paicunaca na arripintirinllu. Quiquinbashmi ufianata saquitaca ushapangui. Shina rurashpaca na arripintiripanguichu.

Ashagutalla ufiangapaj o nimata na ufiangapaj decidishpapash Jehová Diospa cai shimicunatami yarina capangui. Paica ninmi: “¡Ñuca mandashcacunata canguna cazushca cajpica, jatun yacushnamari casilla aliguta causanaca, na tucurinman carca! [Alita] ruranapash, mama cucha yacu caiman chaiman cuyurinshnami canman carca” (Isaías 48:18).

[Notacuna]

[Dibujota y recuadrotapash ricupangui]

“Ñana controlari ushajushcataca ¿imashinata yachai ushani?”

Pensaripai:

• “¿Pundata yalichu cunanbica tragota ufiajuni?”

• “¿Ashtahuan seguidochu ufiajuni?”

• “¿Ashtahuan fuerte tragocunatachu ufiai callarijuni?”

• “¿Estresmanda ali sintiringapaj o problemacunamanda ali sintiringapachu ufiani?”

• “¿Shuj amigo o shuj familiarca yapatami ufiajungui nihuashcachu?”

• “¿Tragomandachu huasipi, trabajo o vacacionbi cashpaca problemacunata charishcani?”

• “¿Cada semanachu imatapash ufiangapaj munajuni?”

• “¿Shujcuna na ufiajpica ashata culiranillachu?”

• “¿Mashnata ufiashcataca shujcunaman pacanata yachanichu?”

Chai tapuicunamanda shujta o más tapuicunata ari nishca cashpaca, tragota ama yapata ufiangapaj na controlarita ushajunguichu yarin.

[Dibujota y recuadrotapash ricupangui]

Na arripintirijungapaj munashpaca

tragota nara ufiashpallatami caicunapi pensarina capangui:

• “¿Ashagutallaca ufianallachu cani o nimatachu na ufiana cani?”

Consejo: Na controlari ushana cashpaca, mejor nimata na ufiashparapashmi ali can.

• “¿Mashna copatata ufiagrini?”

Consejo: Yapata ufiashpaca na controlarita usharinllu. Chaimi mejor nara ufiashpallata mashnata ufianataca ña decidishcalla cana capangui.

• “¿Ima horata ufiagrini?”

Consejocuna: Manejagrijushpa, imapash peligroso trabajota ruragrijushpa, Taita Diosta adorangapaj imatapash ruragrijushpa, vijsayu cashpa o imapash pastillacunata ufiajushpaca na tragotaca ufianachu capangui.

• “¿Maipita ufiagrini?”

Consejocuna: Nalishnalla ricurij pushtucunapi o ufianata nalicachishpa ricuj gentecunapa ñaupapi o pacallaca na ufianachu capangui.

• “¿Picunahuanda ufiagrijuni?”

Consejocuna: Na yapata ufiaj familiacunahuan o amigocunahuanmi ufiaita ushanpangui. Pero yapata ufianata gushtajcunahuanga na ufianachu capangui.

[Dibujota y recuadrota ricupangui]

Shuj experienciapashmi tian

Supot shuti runaguca Tailandia llactapimi causan. Paica yapata ufiashpami causan carca. Callaripica tutacunallami ufian carca. Pero jipamanga asha ashami tutamandapash y jipamanga chaupi punllacunapash ufiai callarirca. Machangapami paica ufian carca. Pero jipamanga testigo de Jehovacunahuan estudiai callarishpami, Taita Diosca machanata nalicachishpa ricujta yachajurca. Shinami ufianata saquirca. Pero jipamanga cutinmi ufiai callarirca. Chaimi paipa familiaca ninanda llaquirirca.

Shinapash paica tucui shunguhuanmi Jehová Diostaca juyarca. Chaimi Jehová Dios munashcashna paitaca adorangapaj munarca. Congregacionbi huauquicunapashmi paitaca ayudashpa catirca. Paipa familiatapashmi Supottaca ayudashpami catina canguichi y paihuanbashmi ashtahuan tiempota yalina canguichi nishpa animarca. Chai tiempopimi Supot shuti runaguca 1 Corintios 6:10​pi shimicunata na pactachijushcata cuenta japirca. Chai textopica, machadorcunaca Taita Diospa Gobiernopi caitaca na ushangachu nijunmi. Chaimi Supotca nalita rurajushcata intindirca y yapata ufianatapash saquina cashcata cuenta japirca.

Cunan si Supotca ufianata saquitapacha saquingapami decidishcalla carca. Paica espíritu santopa, Taita Diospa Shimi Bibliapa, paipa familiapa y congregacionba ayudahuanmi ufianata saquitaca usharca. Supotpa familiaca pai Testigo cangapaj bautizarijta ricushpaca ninandami cushijurca. Cunanbica Supotca Jehová Diostaca pai munashcashnami sirvijun. Y shujcunatapashmi Jehová Diosta rijsichun ayudajun.