Ancianocunaca tucuicunallata ali causachun, Jehová Diostapash cushijushpa sirvichunmi ayudanajun

1. ¿Pabloca ima noticiata uyashpata ninanda cushijurca?

ÑAMI huata 55 can. Apóstol Pabloca Troas llactapimi can. Shinapash Corinto llactamanda huauquipanicunapimi pensarijurca. Pabloca Corinto llactamanda huauquipanicuna paicunapura ninanda fiñanajushpa rimarinajushcatami uyashcarca. Chaimi imashina shuj taita paipa huahuacunamanda ninanda preocuparin shinallatami Pablopash Corinto llactamanda huauquipanicunamanda preocuparishpa paicunata consejangapaj shuj cartata escribirca (1 Cor. 1:11; 4:15). Shinallata, paipa amigo Titotapash paicunata visitangapaj richunmi mañashcarca. Chai jipami Corintopi ima cosascunalla pasashcata yachangapa Titohuanga Troas llactapi tuparina carca. Pabloca Tito chayamushpa Corintopi ima pasashcata villachun munashpami shuyajun. Shinapash Titoca na chayarcachu. Cunanga Pabloca ¿imatashi ruranga? Pabloca shuj barcopimi Macedoniaman rin. Chaipica Titohuan tuparishpami ninanda cushijun. Corintomanda huauquipanicunaca quiquin cushca consejotaca cushijushpami chasquirca. Shinallata quiquindaca ninandami ricunayachinajun nishpami Titoca villarca .Pablo chaita uyashpaca ashtahuanmi cushijurca (2 Cor. 2:12, 13; 7:5-9).

2. a) Pabloca ¿imatata crinamanda, shinallata cushilla causanamandaca Corinto huauquicunamanga escribirca? b) ¿Ima tapuicunatata yachajupashun?

² Tiempo jipami Pabloca segunda carta a los Corintiosta escribirca. Chaipica ninmi: “Cangunaca, ñami shinllipacha crijcuna canguichi. Shina cajpimi cashna, chashna crishpami catina canguichi nishpaca, na mandanchi. Ashtahuangarin canguna ninanda cushijushpa causachunmi ayudangapaj munanchi” ninmi (2 Cor. 1:24). Cai shimicunahuanga ¿imatata ningapa munarca? ¿Imatata cunanbi ancianocunaca cai shimicunamandaca yachajui ushan?

JEHOVA DIOSTA ALI SIRVINGAPACA FETA, CUSHIJUITAPASHMI CHARINA CANCHI

3. a) “Cangunaca, ñami shinllipacha crijcuna canguichi’’ nishpaca ¿imatata Pabloca ningapa munarca b) ¿Imashinata cunan punllacunapi superintendentecunapash Pablopa ejemplota catinajun?

³ Apóstol Pabloca Taita Diosta adorangapaca fetapash, cushijuitapash charina minishtirishca cashcatami nirca. Femanda o crinamanda parlashpaca cashna nishpami escribirca: “Cangunaca, ñami shinllipacha crijcuna canguichi. Shina cajpimi cashna, chashna crishpami catina canguichi nishpaca, na mandanchi”. Pabloca Corintomanda huauquipanicunaca Taita Diospi tucui shunguhuan crishcamanda Taita Diosta tucuipi cazunajushcatami nirca. Chaimanda huauquipanicunapa rurashcacunata controlana na minishtirishca cashcatami nirca. Huauquipanicuna alita rurangapa esforzarinajushcataca Pabloca alimi yacharca (2 Cor. 2:3). Cunan punllacunapi superintendentecunapashmi Pablopa ejemplota catishpa huauquipanicuna Taita Diosta tucui shunguhuan sirvingapa esforzarinajujta ricushpa ninanda cushijun (2 Tes. 3:4). Congregacionbi caita o chaitami rurana canguichi nishpa mandanapa randica Jehovapa organizacionbi nishcacunata, Bibliapa mandashcacunatami paicunaca catin. Imashinami yachapanchi pipash cashnami crishpa causana canguichi nishpa mandaitaca na ushanllu (1 Ped. 5:2, 3).

4. a) “Canguna ninanda cushijushpa causachunmi ayudangapa munanchi” nishpaca ¿imatata Pabloca ningapa munarca? b) Cunambi superintendentecunaca ¿imatata Pabloshna rurangapa munan?

⁴ Shinallata Pabloca: “Canguna ninanda cushijushpa causachunmi ayudangapa munanchi” nircami. Cai shimicunaca Pablopash, paipa cunbacunapash huauquipanicunata ayudangapa munashcatami ricuchijun. ¿Imashpata chaita nipanchi? Chai cartapillatami Pabloca cashna nishpa escribirca: “Ñucapash, Silvanopash, Timoteopash Taita Diospa churi Jesucristomandami, cangunamanga villachinajurcanchi” nishpa (2 Cor. 1:19). Ashtahuanbash Pabloca ayudangapa munanchi nishpaca Apolospash, Aquilapash, Priscapash, Timoteopash o Titopash huauquipanicunata ayudangapa listo cashcatami ricuchijurca (Rom. 16:3, 21; 1 Cor. 3:6-9; 2 Cor. 8:23). “Cushijushpa causachunmi ayudangapa munanchi” nishpaca, Pablopash paipa cumbagucunapash Corintomanda huauquipanicuna ashtahuan cushilla cachun usharishcata rurashpa ayudangapa munashcatami ricuchijurca. Cunan punllacunapi superintendentecunapashmi tucui huauquipanicunallata Jehová Diosta “cushijuihuan” aliguta sirvishpa catichun ayudangapa munan (Sal. 100:2; Filip. 1:25).

5. Shuj shuj llactamanda huauquipanicunataca ¿imatata tapuchirca? Ñucanchicunaca ¿imatata tapurina capanchi?

⁵ Chairallami shuj shuj llactamanda huauquipanicunataca “¿Jehovata ashtahuan cushilla sirvichunga ancianocunaca quiquindaca imashinata ayudashca?” nishpa tapuchirca. Cai huauquipanicunapa respuestacunapi pensarishpa, ñucanchita chashna tapuchijpica imatashi ninchiman carca nishpa pensaripashunchi. Shinallata ¿ñucapash congregacionbi Jehovata cushilla sirvingapaca imatashi ruraita ushani? nishpa tapurita ushapanchi.a

ÑUCANCHI JUYASHCA “PÉRSIDA SHUTI PANITAPASH” SALUDAPANGUICHI

6, 7. a) ¿Imata rurashpata ancianocunaca Pablopa, Jesuspa, Jehovata shuj sirvijcunapa ejemplocunata catinajun? b) ¿Huauquipanicunapa shutita yarinaca imashpata importante can?

⁶ Ashtaca huauquipanicunaca, ancianocuna ñucanchipi preocuparijpimi cushilla sintirinchi nircami. Cunan punllacunapi superintendentecunapashmi Davidpa, Elihupa y Jesuspa ejemplota catishpa shujcunapi preocuparishcata ricuchin (2 Samuel 9:6; Job 33:1, Lucas 19:5, liipangui). David, Elihú y Jesuspash shujcunataca shutipimi rijsin carca. Pablopaca huauquipanicunapa shutita yachana, paicunapa shutita utilizashpa parlanaca importantemi carca. Roma llactapi causaj huauquipanicunaman cartata escribijushpami veinticinco yali huauquipanicunamanmi shutipi saludocunata escribishpa cacharca. Por ejemplo, ñucanchi juyashca ‘Pérsida panitapash’ saludapangui nishpami escribirca (Rom. 16:3-15).

⁷ Huaquin ancianocunapaca congregacionmanda huauquipanicunapa shuticunata yarinaca dificilmi cashca. Pero huauquipanicunapa shuticunata yaringapaj esforzarishpaca: ‘Ñucapaca importantemi cangui’ nijunshnami can (Éx. 33:17). Anciano huauquicunaca congregacionbi huauquipanicunata comentachingapa shutipi nishpaca paicuna cushilla sintirichunmi ayudan (Juan 10:3​huan chimbapurashpa ricupangui).

PAIPASHMI JESUSPA MANDASHCATACA ALIGUTAPACHA PACTACHIJUN

8. Pabloca ¿imashinata Jehovapa, Jesuspa ejemplota catijushcata ricuchirca?

⁸ Shinallata Pabloshnami ñucanchi huauquipanicunataca shungumanda felicitana capanchi. Shinami paicunapash cushilla cachun ayudanchi. Pabloca segunda carta a los Corintiospimi cashna nishpa escribishpa saquirca: “Cangunamandami ninanda cushijuni” nishpa (2 Cor. 7:4). Cai shimicunata uyashpaca Corintomanda huauquipanicunaca ninandami cushijurianga. Shuj congregacionbi huauquipanicunatapashmi cashna shimicunata nishpa cushichirca (Rom. 1:8; Filip. 1:3-5; 1 Tes. 1:8). Roma congregacionman escribijushpaca Pérsida panigumanda parlashpaca cashnami nirca: “Paipash, Apunchij Jesuspajtaca ninandami aligutapacha rurajurca” nishpa (Rom. 16:12). Cai shimicunata uyashpaca seguromi ñucanchi Pérsida paniguca ninanda cushijurianga. Pabloca Jehovapa, Jesuspa ejemplota catishpami shujcunata felicitashpa cushichin carca (Marcos 1:9-11, Juan 1:47, liipangui; Apoc. 2:2, 13, 19).

9. Randimanda animarinaca ¿imashinata congregacionbi huauquipanicuna ashtahuan cushilla sintirichun ayudan?

⁹ Cunan punllacunapi anciano huauquicunapashmi, tucui huauquipanicunata imagutapash nishpa cushichina minishtirishcapacha cashcatami yachan (Prov. 3:27; 15:23). Shina felicitashpaca: “candaca juyanimi, tucuipimi ricujuni ninshnami can”. Ñucanchi huauquipanicunaca ancianocuna felicitashpa cushichichunga siempremi minishtin. 55 huatacunata charij mayorlla ñañaguca ninmi: “Trabajopica pipash alitami rurashcangui nishpaca na felicitahuanllu. Chaipica paicunalla ali cashcatami sintirin nircami. Chaimandami shuj anciano congregacionbi ali trabajotami rurajungui nishpa felicitajpica ninanda cushijuni. Shina felicitajpimi ñaupaman catingapaj ashtahuan animarini. Chai nishcacunahuanga Jehová ñucata juyashcatami sintini” nircami. Chairallami shuj anciano huauquiguca shuj huauquitaca ali shimicunata nishpa cushichirca. Chai huauquiguca paillami paipa ishcai huahuacunata viñachijushca carca. Shina cushichijpica ¿imata pasarca? “Chai huauquigu shina ali shimicunata nijpica shungucamanmi munailla sintirircani” nircami. Ancianocuna shungumanda felicitashpa cushichijpica huauquipanicunaca animarishpami cushilla sintirin. Shinallata Jehová Diostapash na shaijushpa, cushilla sirvishpa catichunmi ayudan (Is. 40:31).

‘LLAMAGUCUNATA MICHINSHNAMI CUIDANA’ CAN

10, 11. a) Ancianocunaca ¿imashinata Nehemiaspa ejemplotaca catita ushan? b) Huauquipanicunata nara visitashpallata ¿ima tapuicunapita ancianocunaca pensarina can?

¹⁰ Superintendente huauquicunaca congregacionmanda huauquipanicunata juyashcata ricuchishpa ashtahuan cushichingapaca ¿imacunatallata ashtahuan rurana can? Ancianocunaca llaquilla cajcunata animangapami tiempota llujchina can (Hechos 20:28, liipangui). Shina rurashpaca punda tiempopi Diosta sirvijcunapa ejemplotami catinajun. Por ejemplo, Bibliapica Nehemías shujcuna desanimarishca cashcata ricushpaca uchallami paicunataca animashca ninmi (Neh. 4:​14). Shinallatami cunanbi ancianocunapash pipash desanimarishca, llaquilla cajta ricushpaca paicunata ayudangapami uchalla imatapash ruran. Chaimandami usharijpicarin paicunapa huasicunapi visitashpa Jehovapa yachachishcacunahuan huauquipanicunataca animan (Rom. 1:​11). ¿Anciano huauquicuna huauquipanicunata visitashpa aliguta animaita ushachunga imata ayudanga?

¹¹ Anciano huauquicunaca nara visitangapaj rishpallatami maijan huauquihuan parlagrijushpapash paicunapi aliguta pensaringapaj tiempota llujchina can. Ancianocunaca cai tapuicunapimi pensarina can: “¿Chai huauquigu o paniguca ima llaquicunatata charin? ¿Animachingapaca imatata nina cani? ¿Bibliapa maijan textocunatata ricuchina cani? ¿Bibliapica paishnallata pipash llaquicunata charishcacunamandaca parlanllu?”. Shina tapurishpami huauquipanicunataca aliguta ayudai ushanga. Chashna visitajpimi huauquipanicunaca paicuna imashina sintirishcataca shungumandapacha parlanga. Shina parlajujpica ancianocunaca aligutapachami uyana can (Sant. 1:19). Shuj paniguca: “Ñuca parlajujpi anciano turigu ali uyajta ricushpaca ninandami animarini” ninmi (Luc. 8:18).

12. Congregacionbica ¿imashpata tucuicunallata animachun minishtin?

¹² ¿Picunatata visita de pastoreo nishcataca rurana can? Pabloca huauqui ancianocunataca cashna nishpami consejarca: ‘Tandanajuj tucui crijcunataca [...] cuidanguichi’ nircami. Congregacionmanda tucui huauquipanicunallatami animachun minishtin. Publicadorcunapash, ashtaca huatacunata precursor shina sirvishpa causaj huauquipanicunapashmi animachunga minishtin. Pero ¿imashpata ashtaca huatacunata Jehová Diosta sirvij huauquipanicunaca ancianocuna animachun minishtin? Porque cai mundopi causanajushcamandaca paicunatapashmi llaquicunaca desanimachita ushan. Rey Davidpashmi paita animachun minishtirca. Tucuicunallatami pipash animachun minishtinchi.

‘ABISAI RUNAGUMI DAVIDTA AYUDANGAPA CHAYARCA’

13. a) ¿Imamandata Isbí-benobca Davidtaca ñalla misharca? b) ¿Imashpata Abisaica Davidta salvaita usharca?

¹³ Davidta israelitacunapa rey cachun agllashca jipallami paica Goliathuan macanajungapaj shayarirca. Goliatca refaím nishca jatun jatun razamandami carca. Shinapash Davidca na manllashpami Goliat runataca huañuchirca (1 Sam. 17:4, 48-51; 1 Crón. 20:5, 8). Huaquin huatacuna jipaca Davidca cutinmi shuj guerrapi shuj jatun jatun filisteohuan macanajungapa shayarirca. Paipa shutica Isbí-benobmi carca (2 Sam. 21:16). Pero chai jatun jatun runaca ñallapachami Davidtaca mishagrijurca. ¿Imamandata mishagrijurca? David paita manllajushcamandaca na carcachu sino pundashna fuerzata ñana charishcamandami mishagrijurca. Bibliapica Davidca ninanda shaijushca cashcata ricushpami Isbí-benobca Davidta mishangapa oportunidad tiashcata ricurca ninmi. Pero shinapipachami “Sarvia shuti huarmipaj churi Abisai runami, Davidta ayudangapaj chayashpa, chai filisteo runataca chugrichishpa huañuchirca” (2 Sam. 21:15-17). Ashagumandami salvarirca. Abisai runaguca Davidmanda pendiente cashcamandami Davidtaca huañunamanda salvai usharca. Chaimandami Davidca Abisaihuanga ninan agradecido sintiririanga. ¿Imatata cai ejemplomandaca yachajui ushapanchi?

14. a) Goliatshna jatun jatun llaquicunata aguantashpa catichunga ¿imata ayudanga? b) Llaquicunata aguantashpa cushilla catichunga ¿imashinata ancianocunaca ayudan? Shuj ejemplomanda parlapai.

¹⁴ Satanás y paita ayudajcuna ashtaca trampacunata churajpipash Diospa reinomanda villachinataca na saquishcanchichu. Huaquingunaca Goliatshna jatun jatun problemacunatami charishcanchi. Shinapash Jehovapa ayudahuanga mishaita ushashcanchimi. Cai mundopi causajushcamandaca ashtaca problemacunata, llaquicunata y shuj shuj jarcaicunatami mishana tucushcanchi. Chaimandami huaquinbica shaijushca sintirishcanchi. Shaijushca, llaqui llaqui sintirijushpaca tranquilo, ali cashca punllacunapishnaca aguantaitaca na usharingachu. Shina tiempocunapipachami anciano huauquicunapa animashca shimicunaca cutin shinlli tucushpa catichun ayudanga. 65 huatacunata charij precursora paniguca ninmi: “Shuj tiempotaca na cushilla sintirijurcanichu. Predicacionbashmi ninanda shaijuchihuan carca. Shina sintirijujta ricushpami anciano turiguca imata pasajun, alillachu cangui nishpa tapuhuarca. Turigu parlashpaca Bibliata utilizashpa, ali shimicunahuan parlashpami animahuarca. Paipa consejocunata catinaca ninandami ayudahuarca. Ñucata ayudangapa pendiente cashcamandaca ninandami agradicini”. Abisai runagushna shujcunamanda preocuparij ancianocunata charishcamandaca ninandami cushijupanchi.

CANGUNATA “NINANDA JUYAJUJTA YACHACHUNMI ESCRIBIMURCANI”

15, 16. a) ¿Imashpata tucui huauquipanicunaca Pablotaca ninanda juyarca? b) ¿Imashpata ñucanchi huauqui ancianocunatapash juyapanchi?

¹⁵ Congregaciongunata ñaupaman ricuriashpa pushanaca shinlli trabajomi can. Anciano huauquicunaca, huauquipanicunamanda ninanda preocuparishpami paicunamanda mañashpa, shinallata paicunata espiritualmente ayudangapa munashpami huaquin viajecunacarin na puñushpa pacarishca (2 Cor. 11:27, 28). Shinallata Pablopa ejemplota catishpami paicunaman mingashcataca cushijushpa pactachinajun. Paicunaca Pabloshnami sintirin. Pabloca: “Cangunapaj ali cachunmi, ñuca imaguta charishcatapash, ninanda cushijushpa tucuchisha” nircami (2 Cor. 12:15). Pabloca huauquipanicunata ninanda juyaimandami paicuna cushilla, espiritualmente shinlli cachunbash ninanda ayudarca (2 Corintios 2:4, liipangui; Filip. 2:17; 1 Tes. 2:8). Chaimandami tucuilla huauquipanicunallata Pablotaca ninanda juyarca (Hech. 20:31-38).

¹⁶ Tucuicunallatami anciano huauquicunataca ninanda juyapanchi. Shinallata ñucanchi oraciongunapipashmi Jehová Diostaca anciano huauquicunata caramushcamanda ninanda agradicipanchi. Anciano huauquicuna ñucanchimanda ninanda preocuparishcamanda, ñucanchita cushichingapa visitamushcamandapash cushillami sintirinchi. Cai mundopi causajushcamanda imapash llaquicuna ricurimujpi, imaguta minishtijujpipash ayudangapa listo cashcata yachashpaca ninandapachami cushijupanchi. Chaimi paicunataca ñucanchi ‘cushijuipa’ ‘ayudajcuna’ can nipanchi.