BIBLIAPA TAPUICUNA

¿Ñucanchi juchacunataca Taita Diosca perdonanllu?

Bibliapica tucuicunallata Adanba huahuacuna cashcamanda juchayucuna cashcatami nin. Juchayucuna cashcamandami huaquinbica pandarinchilla y huaquinbica chai nali rurashcacunamandami arripintirinchi. Taita Diosmi paipa churi Jesuspa causaita cushpa ñucanchi juchacunamanda huañuchun cachamurca. Jesús huañushcamandami Taita Diosca ñucanchicuna arrepintirijpica perdonaita ushan (Romanos 3:​23, 24, liipangui).

Huaquingunaca jatun juchacunata ruraimandami Taita Diosca imaurapash perdonahuangacha nishpa pensarishca. Bibliapica: “Jesuscristopaj yahuarca, ñucanchipaj juchacunataca tucuillata maillan” ninmi (1 Juan 1:​7). Jehová Diosca ñucanchi juchacunata perdonangapaca dispuestomi can. Shinapash chaipaca ñucanchicunaca tucui shungumi arripintirina capanchi (Isaías 1:​18, liipangui).

Taita Dios perdonachunga ¿imatata rurana capanchi?

Taita Dios ñucanchi juchacunata perdonachunga pai imashna cashcata, paipa consejocunata, paipa mandashcacunatami rijsina canchi (Juan 17:3). Nalicunata rurashcamanda arripintirishpa cambiangapaj esforzarijpica Jehová Diosca perdonangallami (Hechos 3:19, liipangui).

Jehová Diostaca ñucanchi ruraicunahuanga cushichi ushanchimi. Paica ñucanchicuna pandari ushashcataca alimi yachan. Chaimandami Jehová Diosca ñucanchitaca llaquishpa, juyaihuan tratan. Taita Dios shuj juyaj Dios cashcata yachashpaca ¿nachu paipa ñaupapi ali ricuringapaj, paimanda ashtahuan yachajungapaj esforzarina capanchi? (Salmo 103:13,14, liipangui).