Huañushpaca ¿imata pasan?

Betania llactaca shuj uchilla pueblogumi carca. Jerusalenmanda 3.000 metro carupimi carca (Juan 11:18). Chai llactapimi Jesuspa ali amigo Lazaroca cungashcapi ungushpa huañurca.

Huañushcata yachashpami Jesusca paipa catijcunataca nirca, Lazaroca puñujunmi, rijchachingapami rini nishpa (Juan 11:11). Shinapash paipa catijcuna na intindijpimi Jesusca nirca: ‘Lazaroca huañushcami’ nishpa (Juan 11:14).

Shinami chuscu punllacunaca jipaca Betania llactaman rishpa Jesusca Lazaropa pani Martata cushichingapaj mascarca. Chaipimi Martaca nirca: “Can cai llactapi cajpica, ñuca turiguca na huañunmanllu caparca” nishpa (Juan 11:​17, 21). Marta shina nijpimi Jesusca nirca: ‘Ñucami causachini, causaita causagrinatapash carani. Ñucata crijcunaca huañushpapash causaringami’ nishpa (Juan 11:25).

Huañushcacuna causarinata crichunmi Jesusca Lazaropaman rishpa caparirca: “Lázaro chaimanda Ilujshimui” nishpa (Juan 11:43). Shina nijpimi Lazaroca tucui gentecuna ricujta huañushcacunamanda causarishpa llujshirca.

Lazarota nara causachishpaca Jesusca ñami ishcaipurata causachishcarca. Jairopa ushita causachishpapash cuitsaguca puñujunmi nircami (Lucas 8:52).

Jesusca ishcanditallata causachishpami paicunaca puñujunmi nirca. Puñujushpaca ima llaquicunatapash na yarinajunchichu. Ima nanaitapash na sintinchichu. Samanajunchimi (Eclesiastés 9:5; “Huañushpaca sumajta puñujuj cuendami can” nishca recuadrota ricupangui). Shuj libropica ninmi, Jesuspa punda catijcunaca huañushcacuna samanajujtami crin carca. Panteongunaca samana pushtucunami carca” nishpa (Encyclopedia of Religion and Ethics).a

Huañushcacuna na sufrinajujta yachashpa, puñujuj cuenda samanajujta yachashpaca cushijunchimi. Huañunataca na manllanchichu.

‘¿RUNA HUAÑUSHPACA CUTIN CAUSARINGACHU?’

Tucuicunami sumajta puñungapaj munanchi. Shinapash na para siempre puñungapaj munanchichu. ¿Huañushcacunaca Lázaro cuenda, Jairopa ushi cuenda causarita ushanllu?

Ñaupa tiempocunapi Taita Diosta sirvij Jobca ña huañugrinimi yashpami nirca: ‘¿Runa huañushpaca cutin causaringachu? nishpa (Job 14:14).

Jobca Taita Dios paita causachinata crishpami nirca: ‘Can cayajpimi tigrachisha. Chaipimi canba maquihuan rurashcataca juyangui’ nishpa (Job 14:​15).

Jesusca huañushcacunata causachishpami huañuita Taita Dios tucuchinata ricuchirca. Chaimandami Bibliapica nin: Jesusca ‘huañuipajpash llavecunata charijunmi’ nishpa (Apocalipsis 1:18). Huañuipajpash llavecunata charijuimandami Jesusca punguta pascashpa llujchinshna huañushcacunataca Lazarota cuenda causachinga.

Bibliapica cutin cutinmi nin, huañushcacunaca causaringami nishpa. Shuj angelca profeta Danieltaca nircami: ‘Samajushpapash tucurimui punllapica jatarishpami can japinataca japingui’ nishpa (Daniel 12:13). Saduceo nishcacunataca Jesusca nircami: ‘Cangunaca Dios escribichishca Shimitapash na yachashpa, pai ninan ushaita charijtapash na yachashpami pandashpa causanguichi’ nishpa (Mateo 22:​23, 29). Apóstol Pablopash nircami, alita rurajcuna, na yachaimanda nalita rurajcunapash ‘Taita Dios causachinatami cushijushpa shuyajuni’ nishpa (Hechos 24:15).

HUAÑUSHCACUNACA ¿IMA HORATA CAUSARINGA?

Daniel 12:13​pi nishca shinaca, ‘tucurimui punllapimi’ alita rurajcunapash, na yachaimanda nali rurajcunapash causaringa. Martapash nircami: ‘Tucurimui punllapi huañushcacuna causarijpimi ñuca turigupash causaringa’ nishpa (Juan 11:24).

Bibliapi ‘tucurimui punlla’ nishpaca Jesús mandana punllacunamandami parlajun. Apóstol Pabloca nircami: ‘Cristota na ricunayachijcunata chaqui sarunapi Dios churangacamanmi Cristoca mandajunga. Tucuripica huañuitapashmi’ tucuchinga nishpa (1 Corintios 15:​25, 26). Chaimandami Taita Diostaca canba Reino ucha chayamushpa, cai Alpapipash Canba munai pactarichun nishpa mañana capanchi.b

Job nishca shinaca Taita Diosca huañushcacunata causachingapami munan. Causachina punlla chayamujpica pipash na huañungachu. Pipash na ninajungachu ¿Huañushpaca imashi pasan? nishpa.