CALLARI TEMA | ¿TAITA DIOSCA QUIQUINDA YARINLLU?
¿Taita Diosca quiquinda yarinllu?
Ñaupa tiempo israelitacunapa rey Davidca nircami: ‘Llaquilla cajpipash, imagu illaj cajpipash, Mandaj Diosmi ñucataca yarihuanga’ nishpa (Salmo 40:17).
‘Gentecunaca tejamanda yacu shutunshnami’can. (ISAÍAS 40:15)
Rey Davidca ¿imamandata Taita Dios paita yarinataca seguro carca? ¿Taita Diosca quiquindapash yarijunllu? Ashtaca gentecunaca ninmi, Taita Diosca ñucataca na yarinllu nishpa. ¿Imamandata shina nin?
Huaquingunaca Taita Diosca carupimi can yashpami shina nin. Paicunaca ‘yacu shutunshna, ñutu alpashnami’ sintirin (Isaías 40:15). Taita Diospi na crij runacarin nircami: “Ninan jariyashca gentecunallami Taita Dios paicunata yarijujtaca crin” nishpa.
Cutin shuj gentecunaca yanmi, nalimi cani Taita Diosca na ayudahuangachu nishpa. Chaimandami Jim shuti runaguca nin: “Ñucaca siempremi Taita Diostaca ama yapata culirangapaj ayudahuai nishpa mañan carcani. Shinapash cungashcapimi ñapash culiranlla carcani. Taita Diospash na ayudai ushahuangachu yarcanimi” nishpa.
Shinapash ¿ciertochu Taita Diosca ñucanchita na yarin? Gentecuna juchayu cajpipash ¿Taita Diosca llaquinllu? Bibliapi Hechos 17:27pica ninmi, Taita Diosca ‘ñucanchimanda carupica na canllu’ nishpa. Imashinami Bibliapi nijun, Taita Diosca ñucanchita yarinmi. Shinaca quiquindapash yarimandaca ¿imatata Taita Diosca rurashca? Cati chuscu temacunata Bibliahuan ricupashun.