Jesusca ¿imamandata cutin cutin Diospa Reinomanda villachirca?

Imashinami ñaupa temapi yachajurcanchi, Jesusca Diospa Reinomanda villachinatami ninanda alicachin carca (Lucas 8:1). Chaimandami caruta rishpa Diospa Reinomanda parlan carian. Mateo, Marcos, Lucas, Juan librocunapicarin Jesús villachishcamanda parlashpami 100 viaje yalita Diospa Reinomanda parlan. Chai 100 viajecunamandaca Jesusmi ashtacatapacha Diospa Reinomandaca parlarca. Ashtacata parlashca cashpapash Jesusca shuj cosascunatapashmi Diospa Reinomandaca parlarca (Juan 21:25).

Jesuspaca ¿imamandata Diospa Reinomanda parlanaca minishtirishcapacha carca? Pundapica Taita Diosmi paipa Reinopi Rey cachun agllarca (Isaías 9:6; Lucas 22:28-30). Shinapash na mandangapaj munaimandalla o shujcuna alicachishpa ricuchun munaimandachu Jesusca Diospa Reinomanda villachirca (Mateo 11:29; Marcos 10:17, 18). Jesusca Diospa Reino paipa Taitatapash gentecunatapash ayudanata ali yachashpami Diospa Reinomanda villachirca. Cunanbipash Jesusca Diospa Reino ayudanataca alimi yachan.a

DIOSPA REINOCA ¿IMASHINATA TAITA DIOSTACA AYUDANGA?

Jesusca paipa Taitataca tucui shunguhuanmi juyan (Proverbios 8:30; Juan 14:31). Paipa Taita juyaj, llaquij, alita ruraj Dios cajpimi ninanda alicachin (Deuteronomio 32:4; Isaías 49:15; 1 Juan 4:8). Shinapash ashtacacunaca llullashcami, Taita Diosca gentecunata na juyanllu, Taita Diosmi gentecunataca llaquichin nishpa. Chai llullacunata ninanda millanayachimandami Jesusca Taita Diospa shutita limpiangapaj munashpa cutin cutin Diospa Reinomanda villachirca (Mateo 4:23; 6:9, 10). Shinapash ¿imashinata Diospa Reinoca Taita Diospa shutita limpianga?

Paipa Reinota churashpami Taita Diosca gentecuna ama sufrichunga ‘paicunapa ñavimanda tucuilla viquita fichanga’. Gentecuna ama huacachunga imamanda huacanajushca llaquicunatapashmi tucuchinga. ‘Huañuipash, llaquipash, nanaipash’ tucuringami (Apocalipsis 21:3, 4). Diospa Reino mandajpimi gentecunaca para siempre cushilla causanga.b

Diospa Reinomi Taita Dios llaquijta, tucui ushaita charijtapash ricuchinga. Chaimandami Jesusca cutin cutin Diospa Reinomanda villachirca (Santiago 5:11). Diospa Reinoca Taita Diosta ayudashpapash Jesusta ali catij gentecunatapashmi ayu

DIOSPA REINOCA ¿IMASHINATA JESUSTA CATIJCUNATACA AYUDANGA?

Nara cai Alpaman shamushpaca Jesusca ashtaca ashtaca huatacunatami paipa Taitahuan jahua cielopi causarca. Jesusmi jahua pachapi, cai pachapi tucui ima tiashcacunata rurashpa paipa Taitataca ayudarca (Colosenses 1:15, 16). Chai tucui rurashcacunamandaca gentecunatami Jesusca juyarca (Proverbios 8:31).

Juyaimandami Jesusca gentecunaman villachirca. Callarimandallatami Jesusca nirca, ayudachun minishtinajuj gentecunaman ‘ali villaita villangapami’ shamurcani nishpa (Lucas 4:18). Jesusca gentecunata juyanimi nishpapash paipa rurashcacunahuanmi juyashcataca ricuchirca. Shuj punllaca ashtaca gentecunami yachajungapaj munarca. Chaimandami Jesusca tucuillata llaquishpa yachachirca. Ungushcacunatacarin jambircami (Mateo 14:14). Cutin shuj punllaca, ungushca runagu Jesuspaman quimirishpami nirca: ‘Can munashpaca mapa illajta saquihuai nishpa’. Shina nijpimi Jesusca ‘mapa illaj cachunmi munani’ nishpa jambirca (Lucas 5:12, 13). Cutin shuj punllapash Lázaro huañujpimi Lazaropa pani Mariaca ninanda huacajurca. Chaita ricushpami ‘Jesuspash shungupi ninanda llaquirishpa huacarca’ (Juan 11:32-36). Chai punllaca ñami Lazaroca chuscu punllacunata huañushca carca. Shinapash shuj jatun milagrota rurashpami Jesusca Lazarota causachirca (Juan 11:38-44).

Chai milagrocunaca asha tiempopallami carca. Jesusca jambirishca gentecuna cutin ungunata, causarishca gentecuna cutin huañunataca alimi yacharca. Cutin Diospa Reinomanda bendiciongunaca unai unaicamanmi parana carca. Chaimandami Jesusca milagrocunata rurashpa ayudashpapash, ashtahuanga ‘ali villaicunata villashpa’ gentecunataca ayudarca (Mateo 9:35). Chai milagrocunaca shamuj punllacunapi jatun bendicionguna tianatami ricuchijurca. Maijan jatun bendicionguna tianataca Bibliapi ricupashun.

• 

  Ungüicunaca tucuringami.

  Chai punllacunapica ‘ñausacunapa ñavipash pascaringami. Na uyajcunapa rinripash pascaringami. Suchucunapash fahuangami. Upacunapash candanajungami’. “Pipash na: ‘Ñucaca huañujunimi’ ninajungachu” (Isaías 33:24; 35:5, 6).

• 

  Huañuica chingaringami.

  ‘Alita rurajcunami cai Alpataca japinga. Chaipica causaitami causanajunga.’ (Salmo 37:29, NM )

  ‘[Diosca] huañuitapash tucuchingami. Tucuicunapa ñavimandami viquita fichanga.’ (Isaías 25:8.)

• Huañushcacunaca causaringami.

  ‘Huañushcacunaca tucuillami ñuca rimajta uyashpa causaringa.’ (Juan 5:28, 29.)

  ‘Huañushcacunatapashmi Taita Diosca causachinga.’ (Hechos 24:15.)

• 

  Tucuicunami huasitapash trabajotapash charinga.

  ‘Huasicunata shayachishpami chaipi causanajunga. Uvasta tarpushpami chaipi fucushcata micunajunga. Shujcuna causanajuchunga na huasichinajungachu. Shujcuna micuchunbash na tarpunajungachu. Ñuca agllashcacunaca, paicunapa maquihuan imatalla rurashcahuanmi cushijunajunga.’ (Isaías 65:21, 22.)

• 

  Guerracunaca ñana tiangachu.

  Diosca ‘cai pachapi tucui macanajuicunatami’ tucuchinga (Salmo 46:9).

  ‘Llactapuracunapash na ashtahuan macanajungapaj Ilujshingachu. Macanajuita yachachinapash, na ashtahuan tiangachu.’ (Isaías 2:4.)

• 

  Tucuicunami micunata charishun.

  ‘Alpacunapica granocuna fucungami. Ñucanchi Taita Diosca bendiciangapachami.’ (Salmo 67:6.)

  ‘Pambapipash jahua urcu umacunapipashmi granocunaca tianga.’ (Salmo 72:16.)

• Pipash ñana pobre cangachu.

  ‘Imagupash illaj runataca na cungangachu.’ (Salmo 9:18.)

  ‘Imagupash illajcuna caparishpa mañajpica, paimi cacharichinga. Pi ayudajta na charishpa llaquilla causajcunatapashmi ayudanga. Imagu illajtapash, imaguta na charijtapash llaquingami, quishpichingami.’ (Salmo 72:12, 13.)

Shinaca chai tucui bendicionguna tiana cajpimi, Jesusca Diospa Reinomanda cutin cutin villachirca. Diospa Reinolla tucui llaquicunata anchuchina cajpimi, Jesusca yachajungapaj munaj gentecunamanga Diospa Reinomanda villarca.

¿Taita Diospa bendiciongunataca alicachipanguichu? Shinaca, ¿imashinata Diospa Reinomandaca yachajuita ushapangui? Taita Diospa bendiciongunata chasquingapaj munashpaca ¿imatata rurana capangui? Chai tapuicunataca shamuj temapimi ricuita ushapangui.