¿Imamandata tucuipi limpio cana canchi?

1. Levítico libroca ¿imashinata ñucanchitaca ayudan?

JEHOVÁ DIOSCA munanmi paita sirvijcunaca jucha illaj o tucui causaipi limpio cachun. Bibliapica cutin cutinmi tucuipi limpio canamanda parlajun. Ashtahuanbachaca Levítico libropimi tucuipi limpio canamandaca parlajun. Chaimandami cai libroca ñucanchicuna tucuipi limpio cachun ayudanga.

2. Levítico libromanda parlashpaca ¿imatata nita ushapanchiman?

² Levítico librotaca Moisesmi escribirca. Chai libropash Dios escribichishca Shimi cajpimi chai libromandapash yachajuna canchi (2 Tim. 3:16). Levítico libropa cada capitulopimi Taita Diospa shuti Jehovaca casi 10 viajeta ricurin. Chai libromanda yachajunami ñucanchitaca Taita Diospa shutita ama mapayachichun ayudanga (Lev. 22:32). Levítico libropica Taita Diosta cutin cutin “Mandaj Dios” nishpami Jehová Diosta cazunaca minishtirishcapacha cashcata ricuchijun. Chaimandami cai temapipash shamuj temapipash orotapash yali valishca yachachishcacunata Levítico libromandaca yachajushun. Chai yachajushcacunahuanmi Jehová Diostaca tucuipi limpio sirvi ushashun.

TUCUIPIMI LIMPIO CANA CANCHI

3, 4. a) Aarón armachi tucushpaca ¿imatata ricuchijurca? b) Aaronba churicuna armachi tucushpaca ¿imatata ricuchinajurca? (Callari dibujota ricupangui.)

³ (Levítico 8:5, 6, liingui.) Jehová Diosca Aarondami Israel llactapa sumo sacerdote cachun agllarca. Cutin Aaronba churicunataca sacerdotecuna cachunmi agllarca. Aaronga Jesustami ricuchijurca. Cutin Aaronba churicunaca Jesusta catij ungidocunatami ricuchijurca. Shinapash ¿imamandata Aaronga armachi tucuna carca? Aarón armashpaca ¿Jesuspash armachi tucunatachu ricuchijurca? Na. Jesusca ‘ima mapapash illaj’, jucha illajmi carca (Heb. 7:26; 9:14). Armashpa limpio quedashpami Aaronga Jesús tucuipi limpio cashcata ricuchijurca. Shinapash ¿imamandata Aaronba churicunaca armachi tucuna carca?

⁴ Aaronba churicuna armachi tucushpaca ungidocuna tucuipi limpio cana cashcatami ricuchijurca. Shinapash ¿bautizarishpachu ungidocunaca tucuipi limpio quedan? Na. Bautizarinaca juchayu canataca na anchuchinllu. Bautizarishpaca Taita Diosman mingarishpa paita sirvishpa causanatami ricuchijun. Ungidocunaca Taita ‘Diospa Shimimandami’ tucuipi limpio ricurita ushan. Chaimandami paicunaca Jesuspa yachachishcacunata catina can (Efes. 5:25-27). Taita Diospa Shimimi ungidocunataca jucha illaj, limpio cachun ayudan. Cutin ‘shuj llamagucuna’ nishcacunaca ¿imashinata jucha illaj, limpio ricurita ushan? (Juan 10:16.)

5. ¿Imamandata ninchi, Diospa Shimimandami shuj llamagucuna nishcacunapash limpio ricurita ushan nishpa?

⁵ Imashinami yachajunajunchi, Aaronba churicunaca na ‘shuj llamagucuna’ nishcacunatachu ricuchinajun (Apoc. 7:9). Shuj llamagucuna nishca gentecunapash Diospa Shimimandami limpio tucun. Paicunaca Bibliapi tucui ima nishcatami crin. Chaimandami gentecunata salvangapaj Jesús huañushcata crishpa Jehová Diostaca “tutapash punllapash” sirvishpa causangapaj munan (Apoc. 7:13-15). Ungidocunapash, shuj llamagucuna nishcacunapash cutin cutin armanshnami limpio tucuna can. Shina ruraimandami paicunaca tucui punllacuna ali portarita ushan (1 Ped. 2:12). Ungidocunapash shuj llamagucuna nishcacunapash shujllashna tandanajushpa, tucuipi limpio cangapaj empeñarishpa Jesusta cazunajujta, ali catinajujta ricushpaca Jehová Diosca ninandami cushijunga.

6. ¿Imamandata huaquinbi huaquinbica imashinata Jehovata adorajuni nishpa tapurina capanchi?

⁶ Israelita sacerdotecuna cuerpopipash limpio cashcata yarinaca ¿imashinata cunan punllacunapi ñucanchitapash ayudan? Bibliamanda yachajujcuna tandanajuicunaman rishpaca Tandanajui Huasicuna limpio cashcata ricushpa, ñucanchicunapash limpio aliguta mudarishpa rijta ricushpami alicachishpa ricun. Israelita sacerdotecunaca cuerpopi limpio cashpapash ‘Mandaj Diospa urcuman rishpa’ o Jehovata ali adorajcunahuan tandanajungapaj munashpaca limpio, ali shunguhuanmi ricurina carca (Salmo 24:3, 4, liingui; Is. 2:2, 3). Jehová Dios munashcashna paita adorangapaca ñucanchi yuyaicunapipash, shungupipash, cuerpopipash limpiomi cana canchi. Chaimandami huaquinbi huaquinbica imashinata Jehovata adorajuni nishpa tapurina canchi. Ima cambiocunata rurana minishtirijpica shinlli cajpipash cambiarinami canchi (2 Cor. 13:5). Yuyapashun. Shuj huauquica pornografiata ricuna nali cashcata yachashpapash ricujushpaca tapurinami can: ¿Ñucaca limpio cashcata ricuchijunichu? nishpa. Chai jipaca chai mapa ruraita ama ricungapami ayudata mascana can (Sant. 5:14).

LIMPIO RICURINGAPACA CAZUNAMI CANCHI

7. ¿Imashinata Jesusca Levítico 8:22-24​pi shimicunataca pactachirca?

⁷ Israel llactapi sacerdotecuna tiai callarina punlla chayajpimi Moisesca shuj jari llamapa yahuarta japishpa Aaronba, Aaronba churicunapa ali lado rinripi, ali maqui racu dedopi, ali chaqui racu dedopi yahuarta churarca (Levítico 8:22-24, liingui). Chai ruraica sacerdotecuna cazuna cashcata, paicunaman mingashcata pactachingapaj empeñarina cashcatami ricuchijurca. Jesuspash ñucanchi Sumo Sacerdote caimandaca ungidocunamanbash, shuj llamagucuna nishcacunamanbash alipacha ejemplotami saquirca. Jesusca paipa rinrihuanga Jehová Dios imata nishcatami ali uyarca. Paipa maquicunapash Jehová Diospa munaita pactachinahuanmi ocupado carca. Paipa chaquicunapash alita rurashpa purina ñanmandapash na caruyarcachu (Juan 4:31-34).

8. Jehovata sirvijcunaca ¿imatata rurana capanchi?

⁸ Ungidocuna cashpa, shuj llamagucuna cashpapash ñucanchi Sumo Sacerdote Jesuspa ejemplotami catina canchi. Bibliapi mandashcacunatapash cazunami canchi. Na cazuimanda Jehová Diospa jucha illaj espirituta llaquichingapaca na munanchichu (Efes. 4:30). Tucuicunami ñucanchi chaqui purina ñanda alichinshna ali causana canchi (Heb. 12:13).

9. a) Cuerpo Gobernantepi huauquicunahuan igual sirvinajuj quimsa huauquicunaca ¿imatata nirca? b) Chai huauquicunapa shimicunaca ¿imatata ricuchin?

⁹ Cunanga Cuerpo Gobernantepi huauquicunahuan tauca huatacunata sirvishca huauquicuna ima nijta ricupashun. Shuj huauquica ninmi: “Cuerpo Gobernantepi huauquicunahuan igual sirvinaca shuj jatun bendicionmi cashca. Huaquinbica ricunmi cariani, ungidocuna cashpapash juchayucuna cashcata. Shinapash cai tucui huatacunapica, Jehová Dios paipa llactata ñaupaman pushachun churashca huauquicunata cazungapami esforzarishcani” nishpa. Shuj huauquipash ninmi: “2 Corintios 10:5​pi shimicunaca Jesusta cazuichi nijunmi. Chai shimicunami ñaupaman pushaj huauquicunata cazuchun, apoyachun ayudahuashca” nishpa. Cutin shuj huauquipash ninmi: “Jehová imata juyashcata juyajcuna, imata millanayachishcata millanayachijcuna, Jehová Diospa ayudata siempre mascajcuna, paipa ñaupajpi ali ricuringapaj munajcunaca Jehovapa organizaciondami cazun, cai Alpapi Jehovapa munaita pactachingapaj ñaupaman pushaj huauquicunatapashmi cazun” nishpa. Chai huauquica Nathan Knorr huauquipa ali ejemplota yarishpami nin, 1925 huatapica inglés shimipimi “Nacimiento de la nación” nishca tema Villajun revistapi llujshirca. Chaipica mushuj entendimientocunami tiarca. Chai mushuj entendimientocunata huaquin huauquicuna na chasquingapaj munajpipash huauqui Knorrca ratomi chasquirca nishpa. Huauqui Knorrca jipa huatacunapica Cuerpo Gobernantepimi sirvirca. Imashinami chai huauquicunapa shimicunapi ricunchi, limpio ricuringapaj munashpaca cazunami canchi.

YAHUARMANDA IMATA MANDASHCATA CAZUSHUNCHI

10. ¿Imamandata yahuarmanda mandashcataca cazuna canchi?

¹⁰ (Levítico 17:10, 14, liingui.) Jehová Diosca israelitacunataca mandarcami ‘maijan aichamanda yahuartapash’ na micunachu canguichi nishpa. Jesusta catijcunatapash Jehová Diosca mandarcami gentecunapa yahuarmandapash, animalcunapa yahuarmandapash jarcarinami canguichi nishpa (Hech. 15:28, 29). Ñucanchicunaca ñucanchi causai llaquipi cajpipash, Jehovata na rijsijcuna, na cazujcuna atichinajujpipash Jehovapa mandashcata cazungapami munanchi. Paicuna Jehovata na juyajpipash ñucanchica Jehovata juyaimandami paita cazungapaj munanchi. Imacunamandapash Jehovapa ñaupajpi nali ricuringapaj o congregacionmanda llujchi tucungapaca na munanchichu. Yahuarta na churaringapaj munajpi gentecuna burlarijpipash Jehová Diostami cazuna canchi (Jud. 17, 18). Shinaca shujcuna atichinajujpipash yahuarta na micushachu, na churarishachu nishpa shinlli tucungapaca ¿imata ayudanga? (Deut. 12:23.)

11. Juchata Anchuchina Punllapi mandashcacunaca ¿imatata ricuchin?

¹¹ Pundapica Día de Expiación nishca punllapi o Juchata Anchuchina Punllapi ima pasashcata ricushun. Jehová Diospa yuyaipica yahuarca juchata perdonangapaj, anchuchingapami carca. Chaimandami Juchata Anchuchina Punlla chayajpica Jehová Diosca mandarca, Israel llactapa sumo sacerdotemi shuj jari huagrapa o shuj jari chivopa yahuartaca arca del pacto jahuapi tsirapachina can nishpa (Lev. 16:14, 19). Chaita rurajpimi Jehová Diosca israelitacunapa juchacunata perdonan carca. Jehová Diosca mandarcapashmi, micungapaj munashpa shuj animalta huañuchishpaca animalpa yahuartaca alpapi shitashpami alpahuan tapashpa saquina canguichi nishpa. ¿Imamandata Jehová Diosca shina mandarca? ‘Causaita tucui charijcunapa causaica paicunapa yahuarpi cajpimi’ Jehová Diosca shina mandarca (Lev. 17:11-14). Chai ishcai mandashcacunataca na ruraimandallachu rurana carca. ¿Imamandata shina ninchi? Tauca huatacuna huashamanga Jehová Diosca Noetaca mandarcami, canbash canba familiapash yahuartaca napacha micunachu canguichi nishpa (Gén. 9:3-6). Shinaca ¿imatata Jesusta catijcunaca yachajunchi?

12. Jesusta catij hebreocunaman escribishpaca ¿imatata apóstol Pabloca yahuarmandapash, juchacunata perdonanamandapash intindichirca?

¹² Jesusta catij hebreocunaman escribishpaca apóstol Pabloca nircami: ‘Mandashca shimipi nishcashna yahuarta tsirapachijpica ashacamanllami mapa illaj tucun. Yahuarta na jichashca cajpica, Diosca juchacunataca na anchuchinmanllu’ nishpa (Heb. 9:22). Chai shimicunata nishpami apóstol Pabloca intindichijurca, animalcunapa yahuarca juchacunata perdonachun ayudashca cashpapash israelitacuna juchayucuna cashcatami yarichin carca nishpa. Ashtahuangarin Pablo intindichijushca shinaca, juchacunamanda perdonaitapacha perdonai tucungapaca na animalcunapa yahuarllachu minishtirijurca. Chaimandami nirca: ‘Mandashca shimicunaca jipa punllacunapi Dios aliguta caramunatami ricuchijun’ nishpa (Heb. 10:1-4). Shinaca juchacunamanda para siempre perdonachunga ¿pipa yahuarta minishtirijurca?

13. Jesús paipa yahuarhuan ayudashcamandaca ¿imashinata sintirinchi?

¹³ (Efesios 1:7, liingui.) Jesustapash Jehovatapash juyaj gentecunaca Jesús paipa causaita cushcamandaca tucui shunguhuanmi agradicinchi (Gál. 2:20). Shinapash Jesusca huañushpa causarishca jipami ñucanchitaca juchamanda quishpichirca. ¿Imashinata chaita yachanchi? Juchata Anchuchina Punllapi ima pasashcata cutin yarishun. Leypi mandashca shinaca chai punllapimi sumo sacerdoteca animalcunapa yahuarta apashpa Santísimo nishca ucuman yaicun carca. Chaiman yaicushpami Jehová Diospa ñaupajpi ricurijuj cuenda carca (Lev. 16:11-15). Jesuspash causarishca jipami, jahua cieloman rishpa Jehová Diospa ñaupajpica paipa yahuarhuan gentecunata ayudashcata ricuchirca (Heb. 9:6, 7, 11-14, 24-28). Paipa yahuarhuan gentecunata ayudashpa Jehová Diospa ñaupajpi ricurishcata crijpimi Jehová Diosca ñucanchi juchacunata perdonan, limpio concienciatapash chari ushanchi. Jesús chashna ayudashcamandaca tucui shunguhuanmi agradicinchi.

14, 15. ¿Imamandata yahuarta na micunachu, na chasquinachu cangui nishca leyta intindina, cazunaca minishtirishcapacha can?

¹⁴ Imashinami yachajushcanchi, causaica yahuarpimi can. Diospa ñaupajpica yahuarca ninan minishtirishcapachami can (Gén. 9:4). Chaimandami Jehová Diosca ima yahuartapash na micunachu canguichi nishpa mandarca (Lev. 17:10, 14.). Ñucanchicunapash Jehová Diospa yuyaita catishpami yahuarta micunamanda, churarinamandaca jarcarina canchi. Jesús paipa causaita cushcata crishpa, Jesús paipa yahuarhuan gentecunata ayudashcata crishpallami Taita Dioshuan ali tucuita ushanchi (Col. 1:19, 20, NM ).

¹⁵ Llaquicunaca cungashcapimi ñucanchita o ñucanchi familiatapash japin. Chashna llaquicuna japijpimi yahuarta churarinata o na churarinata, fracciones de sangre nishcata chasquinata o na chasquinata, ima tratamientota catinata o na catinatapash ricuna canchi. Bibliapi mandashcata na cazushpa yahuarta chasquijpica Jehová Diosca ninandami llaquiringa. Chaimandami llaquicuna nara ricurimujpillata Jehová Diosta mañashpa, informaciongunata mascashpa imata ruranata ricuna canchi. Shinami llaquicuna japijpipash, shujcuna atichinajujpipash Jehovapa mandashcataca shinlli tucushpa cazui ushashun. Ashtaca doctorcunapash, gentecunapash yahuarta minishtinajujcuna ama huañuchun nishpami shuj gentecunataca yahuarta cuichi nishpa animan. Shinapash Jehová Diosllami nita ushan yahuarhuan imata ruranata na ruranatapash. Paipa yuyaipica ‘maijan yahuar cashpapash’ ninan valishcami can (Lev. 17:10, 14). Shinaca, yahuarta na micunachu, na chasquinachu canguichi nishpa mandajpica Jehová Diosta cazuna munaitami yaipi charina canchi. Ashtahuangarin, tucuipi limpio causajushcata ricuchishunchi. Shinami Jesús paipa yahuarhuan salvashcata agradicishun. Jesuspa yahuarmandallami juchacunamanda perdonai tucunchi, unai unaicaman causaitapash ushanchi (Juan 3:16).

¿IMAMANDATA JEHOVÁ DIOSCA ÑUCANCHICUNA TUCUIPI LIMPIO CACHUN MUNAN?

16. ¿Imamandata ñucanchicunapash tucuipi limpio cana capanchi?

¹⁶ Israelitacunata egipciocunapa maquimanda salvashpaca Jehová Diosca nircami: ‘Ñucaca cangunapa Taita Dios cangapami cangunataca Egipto llactamanda pushamuj Mandaj Dios cani. Ñuca jucha illaj cajpimi cangunapash jucha illaj tucuna canguichi’ nishpa (Lev. 11:45). Jehová Diosca jucha illaj cashpami paipa llactapash tucuipi limpio cachun munarca. Chaimandami Levítico libropi yachajushca shinaca ñucanchipash jucha illaj o tucuipi limpio cana canchi.

17. Levítico libroca ¿imashinata ayudashca?

¹⁷ Levítico libropi huaquin textocunata yachajunaca alipachami cashca. Shinami cai librota ashtahuan alicachishcanchi, imamanda tucuipi limpio canatapash ashtahuan aliguta intindishcanchi. Shinapash Levítico libropica shuj ali yachaicunapashmi tian. Shamuj temapipashmi Jehová Diosta imashina tucuipi limpio sirvinata ashtahuan yachajushun.