BIBLIAMANDA TAPUICUNA
¿Imamandata ashtaca gentecunaca Taita Dios tucuita rurashcata crin?
Gentecunaca shuj muyugushnami juyaillaguta vijsa ucupica viñan
Salmos librota escribij runaguca Taita Diosta nircami: ‘Ninan juyaillaguta rurashcamandami candaca alicachisha’ nishpa (Salmo 139:14). Llullu huahuacunaca shuj muyugushna juyaillagutami vijsa ucupica viñan. Ashtaca gentecunapash yanmi, Taita Diosmi gentecunataca rurashca nishpa. (Salmo 139:13-17; Hebreos 3:4, liipangui.)
Taita Diosca cai Alpatapash, cai Alpapi tucui animalcunatapash, plantacunatapashmi rurarca (Salmo 36:9). Paica gentecunapash paita rijsichunmi munan. (Isaías 45:18, liipangui.)
¿Animalcunamandachu gentecunaca shamunchi?
Gentecunapash animalcunapashmi umata, ñavita, shimita, maquicunata, chaquicunata charin. Gentecunapash animalcunapash cai Alpapi causachunmi Taita Diosca shina rurarca. Gentecunaca na animalmandachu shamunchi. Gentecunataca ñutu alpata japishpami Taita Diosca rurarca. (Génesis 1:24; 2:7, liipangui.)
¿Imamandata ninchi, gentecunaca na animalmandachu shamunchi nishpa? Gentecunaca Taita Diosta rijsita, juyaita, cazuita ushanchimi. Cutin animalcunaca na ushanllu. Shinallata gentecunataca para siempre causachunmi Taita Diosca rurarca. Cutin animalcunataca na shina rurarcachu. Adán y Eva Taita Diosta na cazujpimi gentecunaca na para siempre causai ushanchi. (Génesis 1:27; 2:15-17, liipangui.)