Perdonanaca minishtirishcapachami can

BIBLIAPA CONSEJO: “Cangunaca, tucuicunahuan aliguta causashpa, caishuj chaishuj llaquirishpa causaichi. Cristomanda Taita Dios cangunapaj juchacunata perdonashcashnallatami, caishujmanda chaishujmanda perdonarina canguichi” (Efesios 4:32).

¿Imatata cai shimicunaca nisha nin? Bibliapica juchata ruranaca shuj dibi cuendami can ninmi. Cutin, perdonanaca dibita pagai cuendami can ninmi (Mateo 18:21-35). Bibliapa shimicunata intindichijcuna nishca shinaca, griego shimipi “perdonanaca” “dibita cungana o ima horapash na cobrana” nisha ninmi. Shinaca, ñucanchita llaquichishcamanda pitapash perdonashpaca, paipa dibita perdonashcashnami can. Shinapash, perdonanaca na nisha ninllu, llaquichishpaca alitami rurarca o ñucanchi shungupi na nanashcata. Ashtahuanbash, perdonanaca culiranapi culirashpapash ñucanchi shungu ucupi na risintirishca quedana cashcatami nisha nin.

¿Cai consejoca alichu can? Juchayu caimandaca tucuicunallatami pandarinchi (Romanos 3:23). Chaimandami shujcunata perdonanata yachajuna canchi. Ñucanchicunapashmi ima horapash perdonachun minishtishun. Ashtahuanbash, shujcunata perdonashpaca ñucanchillatami ali sintirishun. ¿Imamandata shina ninchi?

Culiralla, risintirishcalla yalishpa shujcunata na perdonashpaca ñucanchillatami nali sintirinchi. Chai nali yuyaicunaca cushilla, ali causachunga na ayudanllu. Ashtahuangarin, ñucanchi saludtapashmi huaglichin. Yoichi Chida shuti doctorpash, Psicologiata yachachij Andrew Steptoe shuti profesorpash medicinamanda parlaj revistapica escribircami: “Chairalla rurashca investigaciongunata ricujpica culiralla yalina, shujcunata millanayachishpa ricunaca cardiopatía coronaria nishca ungüimanmi apan” nishpa (Journal of the American College of Cardiology).

Shinaca, shujcunata perdonanaca ¿imashinata ayudan? Shujcunata perdonashpaca tucuicunapurami tranquilo, ali causanchi, shujcunahuanbash ali llevarinchi. Ashtahuangarin, Taita Diospa ejemplota catijushcatami ricuchinchi. Imashinami Taita Diosca ñucanchicuna juchamanda arripintirijpi perdonan, shinallatami ñucanchipash shujcunata perdonachun munan (Marcos 11:25; Efesios 4:32; 5:1).