CALLARI TEMA | TUCUICUNAMI BIBLIATACA INTINDI USHANCHI
¿Imashinata Bibliataca intindi ushanchi?
Pensaripai. Shuj llactaman chaira chayashcanguiman. Gentecunapash, costumbrecunapash, micunapash, culquipash shujmi can. ¿Nachu chaicunata na intindi ushashpaca llaquiringuiman?
Bibliapash shinallatami can. Bibliapica quiquin na rijsishca llactacunamanda costumbrecunamandami parlan. Ricungapalla, Filistea llactamanda, jahualla churashca ropata liquirinamanda, maná nishca micunamanda, dracma nishca culquimandami parlan (Éxodo 16:31; Josué 13:2; 2 Samuel 3:31; Lucas 15:9). Chaicunata chaira lii callarishpaca pensanguipashchari, na intindinichu nishpa. Shinapash imashinami shuj llactaman rijpi pipash ayudajpica cushijunguiman ¿nachu Bibliata intindichun pipash quiquinda ayudajpica cushijunguiman?
PUNDA TIEMPOPI AYUDAJCUNA
Bibliataca Jesús shamungapaj 1.513 huatacuna faltajuj tiempocunapimi escribirca. Chai tiempocunapica Moisesmi Israel llactataca ñaupaman pushajurca. Paimi Bibliapa escribishcacunataca israelitacunaman intindichin carca (Deuteronomio 1:5).
Jipa huatacunamanga Bibliapa escribishcacunata intindichij gentecunaca tiarcarami. Chaimandami Jesús shamungapaj 455 huatacuna faltajuj tiempocunapica ashtaca judiocunapash, huahuacunapash Jerusalén llactapa plazapi tandanajushca carca. Chaipimi Bibliapa escribishcacunata intindichijcuna ‘Taita Dios mandashcata escribishca librotaca, aliguta intindinallata liinajujpi tucuicuna yuyaita japishpa aliguta intindinajurca’ (Nehemías 8:1-8).
500 huatacuna jipaca Jesusllatami Bibliapa escribishcacunataca intindichijurca. Chaimandami gentecunaca yachachij nishpa Jesustaca rijsin carian (Juan 13:13). Paica huaquin gentecunamanlla cashpa o ashtaca gentecunaman cashpapash yachachinllami carca. Shuj punllaca Jesuspa alipacha yachachishcacunata uyashpami ashtaca gentecunaca manllarishpa ‘ricunman quedarca’ (Mateo 5:1, 2; 7:28). Huata 33pipash paipa ishcai catijcuna Jerusalén llactaman rinajujpimi Jesusca paicunahuan parlashpa rirca. Chaipimi ‘Dios escribichishca Shimiguta villashpaca [paicunapa] shungupi aligutapacha yarijta rimarca’ (Lucas 24:13-15, 27, 32).
Jesuspa catijcunapashmi Bibliapa escribishcacunataca intindichishpa yachachin carca. Shuj punllaca Etiopía llactamanda shuj runagumi Bibliapa escribishcata liijurca. Chaimandami Jesusta catij Felipeca quimirishpa tapurca: ‘¿Can liijushca imata nijujtapash yachai ushanguichu? nishpa. Shina nijpimi chai runaca nirca: Pipash na yachachijpica ¿imashinata yachashayari?’ nishpa. Shina nijpimi Felipeca intindichishpa ayudarca (Hechos 8:27-35).
CUNANBI AYUDAJCUNA
Imashinami punda tiempocunapica Bibliata intindichishpa ayudan carca, shinallatami cunanbi testigo de Jehovacunapash ayudanajun. Testigocunaca 239 llactacunapimi Bibliata intindichishpa ayudanajun (Mateo 28:19, 20). Cada semanami 9 millón yali gentecunataca Biblia ima nijta intindichun ayudan. Ashtaca gentecunaca Jesuspi na crij llactacunamandami can. Yachachishpaca na imatapash cobranllu. Munashpaca quiquinba huasipillata, telefonopi, Internetpi o maipi ushashcapipash Bibliataca yachajunallami capangui.
Bibliata yachajungapaj munashpaca shuj testigo de Jehovahuan parlanallami capangui. Bibliamanda yachajushpami Bibliataca intindinalla cashcata cuenta japipangui. Ashtahuangarin ‘Dios escribichishca Shimicunaca yachachingapaj, nalicuna ali purichun rimangapaj, [alita] rurashpa causanata yachachingapaj ali cajta, chaita yachajushpa ima pandatapash na rurashpa, alita rurangapaj aligutapacha alichirishcalla canatami’ cuenta japipangui (2 Timoteo 3:16, 17).