Shuj valishca regalo

JORDANGA barco cuenda sacapuntatami charijun. Chai sacapunta yangashnalla ricurijpipash paipaca ninan valishcami can. Jordanga ninmi: “Ñuca uchilagu cajpimi ñuca familiapa amigo Russell chai sacapuntataca carahuarca” nishpa. Russell huañushca jipami Jordanga paipa abuelopa, paipa taitamamacunapa ali amigo cashcata, imapash llaquicunata charijpi ayudashcata yachaj chayarca. Chaimandami Jordanga cashna nin: “Russell imashina cashcata yachashpaca, pai carashca uchila sacapunta regalogutaca ashtahuanmi alicachini” nishpa.

Cai ejemploca ricuchinmi, imapash regalota carajpi huaquingunapa na yapa valishca cajpipash, agradicinata yachaj gentecunapaca ninan valishca cashcata. Bibliapica shuj ninan valishca regalomanda parlashpami cashna nin: “Taita Diosca, cai pachapi causajcunata ninanda juyashpami, paipaj shujlla Churita caramurca. Pipash paita crishpaca, na chingaita chingagringachu, ashtahuangarin causaitami causagringa” nishpa (Juan 3:16).

Cai regalota chasquijcunaca para siempre causaitami chasqui ushan. ¿Imapash ashtahuan valishca regalo tianlla? Ashtaca gentecuna cai regalota na valishcata shina ricujpipash, Jesusta ali catijcunapaca cai regaloca “ashtacapacha valishcami” can (Salmo 49:8; 1 Pedro 1:18, 19). Shinapash ¿imamandata Taita Diosca paipa Churita gentecunamanda huañuchun cachamurca?

Apóstol Pabloca ninmi: “Juchata ruranaca, shujlla runamandami cai pachapica callarirca. Chai juchamandami, huañuipash callarirca. Shinallatami tucuicuna juchata rurashcamandaca, huañuipash tucuicunapajman yalijun” nishpa (Romanos 5:12). Adanga yachashca jahua Taita Diosta na cazushpami juchayu tucushpa huañurca. Shinaca Adanba culpamandami tucui gentecuna huañun.

‘Juchaca huañushpa chingagrinatami cujun. Jesusmandami causaita causagrinata Taita Diosca caramun’ (Romanos 6:23). Gentecunata huañuimanda salvangapami, Taita Diosca paipa jucha illaj Churita cai Alpapi huañuchun cachamurca. Jesús huañushcamandami paipi feta charijcunaca salvarishpa, para siempre causanga (Romanos 3:24).

Jesús huañushcamanda Taita Dios paita sirvijcunaman ima bendiciongunatalla caranata parlashpaca apóstol Pabloca nircami: ‘Na parlai ushanallata caramushcamandami, Diostaca pagui ninajushun’ nishpa (2 Corintios 9:15). Taita Dios paipa Churipa causaita cushpa tucuicunata salvashpaca tucui regalocunamanda yali ali carashcami can. Shinapash ¿imamandata tucui regalocunamanda ashtahuan yali ali can? Taita Dios carashcacunamandaca ¿imamandata cai regaloca diferente can?a ¿Imatata ñucanchica rurana canchi? Cai tapuicunataca cati temacunami yachachinga.