¿Apocalipsis libropi chuscu caballocunamanda yachajunaca minishtirinllu?

Bibliata liijujpica chuscu shinlli caballocunapi tiarishcacuna ninanda calpanajujmi ricurin. Pundapica, yuraj caballomi ricurin. Chai caballopi tiajujca chairalla rey tucushcami can. Jipaca, puca caballomi ricurin. Puca caballopi tiajujca, cai Alpapi causajcunata casilla, ali causaita quichuna ushaitami charin. Chai jipaca, yana caballomi ricurin. Chai caballopi tiajujca shuj balanzatami charijun. Shinallata paica yarjai tianatami villajun. Ultimopica, quillu caballomi ricurin. Chai caballoca ungüicunata, huañuitami ricuchin. Chai caballopi tiajuj huañuita ricuchijpimi, Hades nishcapash o huañushcacunata pambana pushtupash chai caballopi tiajujta catishpa, ashtaca ashtaca gentecunata huañuchijun (Revelación [Apocalipsis] 6:1-8).

Crystal shuti huarmica ninmi: “Apocalipsis libropi chuscu caballocunapi tiajujcunamanda liishpaca ninandami manllarin carcani. Juicio Punllami ña chayamujun ñucaca chai punllapaca nara listo canichu, huañugrini yarcanimi” nishpa.

Ed shuti jarica ninmi: “Apocalipsis libropi shuj shuj color chuscu caballocunapi tiajujcunamanda yachajunataca ninandami gushtarcani. Cada uno imata ningapaj munashcata ali yachajushpaca, imamanda shina nishcatami intindircani” nishpa.

¿Nachu quiquinbash paicuna shina yuyapashcangui? Imashinami ricunchi Bibliapi Revelación o Apocalipsis libropi chuscu caballocunapi tiajujcuna calpanajujtaca casi tucuicunami rijsin. Chai chuscu caballocunapi tiarishpa calpanajujcunamanda ali yachajushpaca, quiquinbashmi beneficiarita ushapangui. Apocalipsis libropi profeciacunata liishpa imata ningapaj munashcata intindishpa, chaicunata causaipi pactachishpaca cushilla causaita charinatami Taita Diosca yachachin (Apocalipsis 1:1-3).

Apocalipsis libropi chuscu caballocunapi tiarishcacuna calpajujta liishpaca huaquin gentecunaca manllarinmi. Shinapash pitapash manllachingapaca na canllu. Ashtaca gentecunataca chaita liinami paicunapa feta shinlliyachichun, shamuj punllacunapi ali causai tianata crichunbash ayudashca. Quiquinbashmi shinallata beneficiarita ushapangui. Cati temapimi ashtahuan chaimanda yachajushun.