Congregacionbi responsabilidadcunata charingapaj esforzaripaichi
1. Jaricunaca ¿ima horamandata 1 Timoteo 3:1pi shimicunata pactachi callarinalla can?
1 Congregacionbi jaricuna ashtahuan responsabilidadcunata pactachichunmi 1 Timoteo 3:1pica nin, huauquicunata ‘yachachingapaj munashpaca, aligutami rurangapaj’ munajupanguichi nishpa. Shinapash congregacionbi responsabilidadcunata pactachingapaca na mayor canachu minishtirin. Ñamandallatami ucha yachajushpa siervo ministerial tucungapaj requisitocunata pactachita ushanguichi (1 Tim. 3:10). Ña bautizarishca cashpaca ¿imatata congregacionbi ashtahuan sirvingapaca rurana canguichi?
2. Shujcunata ayudana munaita charingapaca ¿imatata rurana canguichi?
2 Shujcunata ayudanatami munana canguichi. Congregacionbica na privilegiocunata charinamandallachu responsabilidadcunataca charingapaj munana canguichi. Shujcunata aliguta ayudangapaj munaimandami responsabilidadcunata charinata yana canguichi. Shinallata shujcunata ayudangapaca Jesuspa ejemplotami catina canguichi (Mat. 20:28; Juan 4:6, 7; 13:4, 5). Shujcunata ayudana shinlli cajpica Jehovatami ayudahuai nishpa mañana canguichi (1 Cor. 10:24). Pensarijunami capanguichi mayorllagucunata, ungushcacunataca imashinata ayudai ushani nishpa. Shinallata, Tandanajui Huasita limpianapi o Tandanajui Huasipa jardingunata arreglanapipash ayudanami canguichi. Bibliamanda Yachachingapaj Escuelapi asignacionda charij huauqui na shamujpica chai asignacionda cungapajpash listomi cana canguichi. Shujcunata sirvishpaca ninandami cushijungui (Hech. 20:35).
3. Congregacionbi sirvingapaca ¿imata ashtahuan minishtirishca can? ¿Imashinata ashtahuan sirvita ushapanguichi?
3 Espiritualmente shinlli caichi. Huaquingunaca imatapash ali ruranllami. Shinapash espiritualmente shinlli canami ashtahuan minishtirishca can. Espiritualmente shinllicunaca Jehovapa Jesuspa ejemplotami catin (1 Cor. 2:15, 16). Taita Diospa espíritu yachachishcatami causaipipash ricuchin (Gál. 5:22, 23). Shinallata, Diospa Reinota pundapi churashpami tucui shunguhuan villachina canguichi (Mat. 6:33). Shuj ali estudio personaltapash charishpami cada punlla Bibliata liina canguichi, Villajun revistata, ¡Despertad! revistatapash liinami canguichi. Tandanajuicunapajpash prepararinami canguichi, tandanajuicunamanbash na faltashpami rina canguichi (Sal. 1:1, 2; Heb. 10:24, 25). Timoteoca chaira viñaj huambragumi carca. Pai espiritualmente ñaupaman catichunmi Pabloca nirca: ‘Imata yachachinatapash aligutapacha yaringui’ nishpa (1 Tim. 4:15, 16). Shinaca, Bibliamanda Yachachingapaj Escuelapi shuj asignacionda charishpa, shinallata villachingapajpash alimi prepararina cangui. Precursor tucusha yashpa, Betelpi sirvigrisha yashpa o Escuela Bíblica para Varones Solterosman risha yashpami esforzarina cangui. Espiritualmente shinlli cashpaca chaira viñajcunapa nali munaicunamandaca caruyai ushanguimi (2 Tim. 2:22).
4. ¿Imamandata aliguta pactachishpa tucuipi cazunaca minishtirishca can?
4 Aliguta pactachishpa tucuipi cazuichi. Apostolcunapa punllacunapica ashtaca huauquicuna yarjai pasanajujpimi apostolcunaca ‘tucuipi alicachi tucushca’ huauquicunata agllarca. Chai huauquicunami tucuillacunaman micunaguta carana carca. Chai huauquicuna aliguta ricuna cashcata yachashpami apostolcunaca ashtahuan importante cosascunapi preocuparirca (Hech. 6:1-4). Shinaca, shuj asignacionda chasquishpaca alimi pactachina canguichi. Noepa ejemplota catishpami instrucciongunataca tucuipi catina canguichi (Gén. 6:22). Tucuipi cazushpa espiritualmente shinlli cajta ricushpaca ninandami Jehová Diosca cushijun (1 Cor. 4:2; “Shujcunata ayudapaichi” nishca recuadrota ricupangui).
5. ¿Imamandata congregacionbi jovengunaca ashtahuan responsabilidadta charingapaj munana can?
5 Bibliapi nishca shinaca, ashtacacunami cunanbica yachajungapaj munanajun (Is. 60:22). Cada huatami casi 250.000 gentecuna bautizarinajun. Ashtaca mushujcuna congregacionbi miranajujpimi congregacionbi responsabilidadta pactachichun ashtaca jaricuna minishtirin (1 Cor. 15:58). Shinaca jovenguna, congregacionbi responsabilidadta charingapaj esforzarinajushpaca alitami munajunguichi.
[Epigrafe de página 2]
Ashtaca mushujcuna congregacionbi miranajujpimi congregacionbi responsabilidadcunata aliguta pactachingapaj munaj jaricuna minishtirin
[Epigrafe de página 3]
Shujcunata ayudapaichi
Congregacionbi jovengunaca ancianocuna imata ruranata nichun, imashina ruranata yachachichunmi munan. Shuj ejemplota ricupashun. Shuj superintendente de circuito huauquica tandanajui tucurishca jipami shuj publicadorta animashpa plataformapi tiajurca. Shuj uchilla huambragu paicunapa ladopi shayajujpimi nirca, ñucahuan parlangapachu munajungui nishpa. Shina nijpimi huambraguca tandanajuicuna jipa plataformata fichapangui nishpa ancianocuna mingajpimi shuyajuni nirca. Taitamamacuna ucha jacu ninajujpipash fichashpa risha nishpami shuyajurca. Shina nijpimi superintendenteca fichapailla nishpa ladurca. Jipamanga superintendente huauquica nircami: “Chai congregacionmanda ancianocunaca jovenguna espiritualmente ashtahuan aliguta sirvichun munashpami paicunamanga imagucunatapash rurachun mingan. Chaimandami cada viaje congregacionda visitajpica shuj huauqui siervo ministerial cachun recomendacionda cun carca” nishpa.