Quiquinllatami jipa punllacunapi imashina causanataca agllaita ushapangui

Jehová Diosca 3.500 huatacuna huashamanllatami paita sirvijcunataca, canguna ali causaiguta charingapaj munashpaca caitami rurana canguichi nishpa mandarca: “Causaitapash, huañuitapash, bendiciai tucunatapash, ninanda nalicachi tucunatapash, cangunapaj ñaupajpimi churani. Cambash, cambaj miraicunapash causangapaca, causaita agllaichiyari” nishpami mandarca (Deuteronomio 30:19).

Jipa punllacunapi ali causangapaj munashpaca Taita Diosta sirvijcunaca imata ruranataca alimi decidina carca. Ñucanchipashmi ali decisionda agllana capanchi. Bibliapica jipa punllacunapi ali causangapaj munashpaca: ‘Cangunata Mandaj Taita Diosta juyashpa, pai rimashca shimicunatapash uyashpami’ ali causaigutaca chari ushanguichi ninmi (Deuteronomio 30:20).

JEHOVÁ DIOSTACA ¿IMASHINATA JUYAITA Y UYAITA USHAPANGUI?

BIBLIAPI NISHCATAMI YACHAJUNA CAPANGUI. Jehová Diosta juyangapaca primeroca Bibliatami yachajuna capanchi. Chaipimi pai imashina cashcata villajun. Bibliaguta yachajushpami Taita Dios ninandapacha juyaj Dios cashcata, shinallata Taita Dios quiquin paita oracionbi mañachun munashcatapashmi yachajuita ushapangui (1 Pedro 5:7). Quiquin Taita Diospaman quimirijpica, Taita Diospash quiquinbaman quimiringa nishpami Bibliapica yachachin (Santiago 4:8).

BIBLIAPI YACHAJUSHCATA QUIQUINBA CAUSAIPI PACTACHIPANGUI. Taita Diosta uyangapaca, Bibliata yachajushpami yachajushcatapash causaipi pactachina capanchi. Shina rurashpallami Josué 1:8​pi nishcashnaca ali causaita chari usharinga. Chaipica: “Chashna pactachishpami, cambaj causaipipash aliguta causangui. Tucui imatalla can rurashpapash, alimi llujshinga” nijunmi.