Llaqui tiempocunapica ¿imashinata tranquilo ali sintirita ushapanchi?

1. Taita Diospa ‘tranquilo, ali canaca’ ¿imata can? ¿Imamandata Taita Diospa tranquilo ali canataca minishtipanchi? (Filipenses 4:6, 7).

TAITA DIOSTA sirvijcunallami Taita Dios carashca tranquilo ali canataca sintipanchi. Taita Diospa ‘tranquilo, ali canaca’ ¿imata can? Caica ima pasajushpapash Taita Diospa amigo caimanda ciertopacha tranquilo ali sintirinatami ningapaj munan. Taita Dios carashca tranquilo ali canata charishpaca, ima pasajpipash seguromi sintiripanchi (Filipenses 4:6, 7​ta liipangui). Shinallata Jehová Diosta juyaj huauquipanicunahuanbash cushillami yalita ushapanchi. Y “tranquilo ali causaiguta caraj” Taita Dioshuanbash ali amigocunami caita ushapanchi (1 Tes. 5:23). Jehová Diosta rijsishpa, paipi confiashpa y paita cazushpaca, pai carashca tranquilo ali canatami charipanchi. Shinami imapash pasajujpica na yapata preocuparishpa, tranquilo ali sintirishun.

2. Ciertopacha tranquilo ali cai ushashcataca ¿imamandata seguro capanchi?

² Llaqui tiempocunapi cashpaca ¿ciertopacha tranquilo sintirita ushapanchichu? Unguicuna ricurijpi, llaquicuna tiajpi, catiriashpa llaquichijpi o shuj shuj llaquicuna tiajpipash ¿na yapata preocuparishpa tranquilo ali caita ushapanchichu? Chashna llaquicunata charishpaca tucuicunallatami manllarishca sintirinchi. Chaimandami Jesusca paipa discipulocunamanga: “Cangunapa shungupica na pinarinachu canguichi, manllaitapash na manllanachu canguichi” nishpami consejarca (Juan 14:27). Ashtaca huauquipanicunami Jesuspa consejotaca catishca. Paicunaca Jehová Diospa ayudahuanga jatun llaquicunapi cashpapash tranquilomi sintiri ushashca.

ÑUCANCHI LLACTACUNAPI UNGUICUNA RICURIJPICA ¿IMASHINATA TRANQUILO CAITA USHAPANCHI?

3. Ñucanchi causashca llactapi o mundo enteropi shuj jatun ungui ricurishpaca ¿imata pasaita ushanman?

³ Ñucanchi llactacunapi unguicuna ricurishpa, o mundo enteropi jatun unguicuna llaquichishpaca ñucanchi causaitaca ninandami afectan. Por ejemplo, COVID-19 unguica ashtaca gentecunatami afectashca. Shuj encuestata rurashpaca, COVID-19 ungui tiempopica ashtaca gentecunami puñuitapash na ushashca ninmi. Pandemia tiempopica ashtaca gentecunami ansiedad y depresión nishca unguicunahuan ungushca. Shinallata huasipillatami maltratocunapash, paicunamandallata huañuchiringapaj munaicunapash ashtahuan mirashpa catishca. Shinallata gentecunaca ashtahuanmi ufiai callarishca, drogaritapash drogari callarishca. Quiquin causajuj llactapi unguicuna ricurijpi ama yapata preocuparingapaj y Taita Dios carasha nishca tranquilo ali canata charingapaca ¿imatata rurai ushapangui?

4. Cai último punllacunapi ima pasanata Jesús nishcaca ¿imashinata ayudan?

⁴ Jesusca último punllacunapica “shuj shuj ladocunapimi” unguicunaca tianga nircami (Luc. 21:11). Cashna llaquicuna pasanataca ña yachaimandami tranquilo sintiripanchi. Jesús nishcashnami cunan tiempocunapica tucui pactarijun. Jesusca: “Na manllarinachu canguichi” nircami. Cai consejotami último punllapi causajcunaca cazuna capanchi (Mat. 24:6).

5. a) Filipenses 4:8, 9 nishcashna ¿imatata Jehová Diostaca mañana capanchi? b) Bibliapa grabashcacunaca ¿imashinata ñucanchicunataca ayudaita ushan?

⁵ Shuj ungui ricurijpica imata ruranata na atinashca, manllaihuanmi sintirinchi. Desib shuti paniguta ima pasashcata ricupashunchi. Panigupa tiopash, primopash, y paipa doctorpash COVID-19 unguihuanmi huañurca. Chaimi paniguca contagiarishpa paipa mamatapash contagianata, trabajo illa quidanata ninanda manllajurca. Chaimandami paica: “Culqui illa quidashpaca imahuanda micunata randisha, arriendotapash imahuanda pagasha” yashpa ninanda preocuparishpa, puñuitapash na ushajurca. Pero paniguca cutinllata tranquilo sintiritaca usharcami. Chaipaca paica Jehová Diostami tranquilo sintiringapaj ayudahuai nishpa, pai imamandapacha pinarijushcata tucuita villashpa mañarca (Filipenses 4:8, 9​ta liipangui). Paniguca Jehová Diosta uyangapaca Bibliapa grabashcacunatami uyarca. Paniguca ninmi: “Bibliapa grabashcacunata uyajushpaca, tranquilo sintirishpami Jehová Dios ñucamanda preocuparishcata ricurcani” nishpa (Sal. 94:19).

6. Bibliata estudiana y reuniongunaman rinaca ¿imashinata ayudan?

⁶ Ñucanchi llactapi jatun unguicuna ricurijpica, ñucanchi causaipica tucuimi cambiarin. Pero shina pasajpipash, Bibliata estudianata, reuniongunaman rinataca na saquinachu capanchi. Ñucanchi publicaciongunapi, videocunapica ñucanchi huauquicunapash, ñucanchishnallata ashtaca problemacunata charishpapash Jehovata tucuipi cazunajushca experienciacunatami ricuita ushapanchi (1 Ped. 5:9). Reuniongunapi yachachishcacunami tranquilo, animarishca sintirichun, shujcunatapash animachun ayudan (Rom. 1:11, 12). Jehovata sirvijcuna ungushca cajpi ama manllachun, ama sololla sintirichun Jehová Dios ayudashcata pensarinami ñucanchi fe shinlliyachun, ñucanchitapash shinallata cuidanapi confiachun ayudan.

7. Apóstol Juanba ejemplomandaca ¿imatata yachajupanchi?

⁷ Huauquipanicunahuan siempre comunicaringapami esforzarina capanchi. Ñucanchi llactapi o mundo enteropi shuj jatun ungui tiajpica, shuj gentecunamanda, huauquipanicunamandapash caruyanami ricurin. Shina pasajpica apóstol Juan sintirishcashnami ñucanchipash sintirita ushapanchi. Apóstol Juanga Gayo shuti paipa amigota ñavi ñavi ricungapami munarca (3 Juan 13, 14). Pero apóstol Juanga paipa amigo Gayota na ricui ushana cashpapash, paihuan comunicaringapaca shuj cartagutami cacharca. Ñucanchipash huauquipanicunata na ricui ushashpaca, cayachishpa o shuj mensajeguta cachashpami paicunahuan comunicarita ushapanchi. Huauquipanicunahuan shina parlarishpaca na ñucanchilla sintirishpami tranquilo sintiripashun. Pero yapata preocupado sintirijushpaca huauqui ancianocunahuan parlashpa paicuna ñucanchita animachun saquipashunchi (Is. 32:1, 2).

LLAQUI APAJUSHPACA ¿IMASHINATA TRANQUILO CAITA USHAPANCHI?

8. Llaqui apajushpaca ¿imashinata sintirita ushapanguiman?

⁸ Yapata tamiashcamanda, shuj terremoto tiashcamanda o shuj incendio tiashcamanda llaqui apashca cashpaca talvez ashtaca tiempotami manllaihuan, preocupado sintiripangui. Chashna llaquicunapi shuj familia huañujpi, charishca cosasgucunatapash perdishca cashpaca llaquilla, talvez huaquinbica culirashcami sintiripangui. Pero feta na charishcamanda, cosascunata juyaimandaca na canllu. Quiquin shinlli llaquilla situaciongunapi yalishcamandami shina sintiripangui (Job 1:11). Pero ima pasajushpapash tranquilo ali sintiritaca ushapanchimi. Imashina tranquilo ali sintirita ushashcata ricupashunchi.

9. ¿Imamandata Jesús nishcata yaipi charina capanchi?

⁹ Huaquin gentecunaca cai mundopi imapash llaquicuna na pasangachu yashpami tranquilo causan. Ñucanchicunaca Jesús ima nishcata yaipi cashcamandami llaquicuna mirashpa ñucanchitapash llaquichi ushashcataca ali yachapanchi. Jesusca paipa discipulocunamanga Jehová Diospa punlla nara chayamujpillata “shinlli terremotocuna”, shuj shuj llaquicunami tianga nircami (Luc. 21:11). Shinallata nalicuna, delincuencia, violencia, ataques terroristas nishcacunapash ashtahuan miranatapashmi Jesusca villarca (Mat. 24:12). Cashna llaquicunaca solo Jehová Diosta na sirvijcunatalla afectanataca Jesús na nircachu. Taita Diosta sirvij gentecunatapashmi cai llaquicunaca ninanda afectashca (Is. 57:1; 2 Cor. 11:25). Jehová Diosca tucui llaquicunamanda milagrota rurashpaca na salvangachu. Pero ñucanchicuna tranquilo ali sintirichunmi ayudanga.

10. Imapash llaquicuna nara ricurijpillata ñamanda prepararishcalla cashpaca ¿imata ricuchinajunchi? (Proverbios 22:3).

¹⁰ Llaquicuna nara ricurijpillata ña prepararishca cashpaca llaquicuna tiajpica imata ruranataca alimi yachapashun. Shina rurashpaca Jehová Dios ñucanchita cuidanata confiashcatami ricuchishun. ¿Imamandata shina nipanchi? Bibliapica imapash llaquicuna nara ricurijpillata prepararishcalla cachunmi consejan (Proverbios 22:3​ta liipangui). Por ejemplo, Jehová Diospa organizacionga cutin cutinmi nara imapash llaquicuna ricurijpillata prepararishcalla cachun yachachin.c Chaipaca publicaciongunata, reuniongunata, congregacionbi villaicunatapashmi utilizan. Shinaca Jehová Diospi confiashpaca cunanmandallatami nara imapash llaquicuna ricurijpillata paipa instrucciongunata catina capanchi.

11. Margaret shuti panigumandaca ¿imatata yachajupanchi?

¹¹ Margaret paniguta ima pasashcata ricupashun. Panigu causajuj pushtupimi shuj incendio tiarca. Chaimi autoridadcunaca tucui gentecunata paicunapa huasicunamanda llujshishpa shuj ladoman richun mandarca. Chaimi tucuilla gentecuna llujshingapaj munajpi ñangunapash junda carca. Shinapi ninanda cushni callarijpimi paniguca paipa carropillata quidarca. Panigu paipa carterapi shuj mapa nishcata charimandami maijan ñanda rinata atinarca. Paniguca ña prepararishcalla caimandami shuj ñanda rishpa salvari usharca.

12. Imapash llaquicuna nara ricurishpallata ¿imamandata instrucciongunata cazuna capanchi?

¹² Quiquin causajuj pushtupi talvez shuj llaqui tiajpica autoridadcunaca gentecunata cuidangapaj o ama llaqui apachunmi shuj shuj instrucciongunata cuita ushan. Por ejemplo autoridadcunaca toque de queda nishcatami churaita ushan. Shuj ladoman uchalla richun o shuj cosascunata rurachunmi mandaita ushan. Huaquin gentecunaca paicuna charishca cosascunata na saquingapaj munaimandami autoridad cushca instrucciongunataca na cazun. Pero ¿Jehová Diosta sirvijcunaca chashnallatachu ruranchi? Bibliapica: “Ñucanchi Señor Jesusmandami, autoridadta charijcunataca tucuillata cazuna capanguichi. Reycunatapash cazunami capanguichi. Porque paicunaca quiquingunata yalimi can. Gobiernocunatapash cazunami capanguichi” nishpami consejan (1 Ped. 2:13, 14). Jehová Diospa organizacionbipashmi ñucanchita cuidangapaca ashtaca instrucciongunata cushca. Llaquicuna nara ricurijpillata ñucanchi datocunata anciano huauquicunaman cuchunmi cutin cutin yarichishca. Shinami imapash llaqui pasajpi huauqui ancianocunaca ñucanchicunataca cayaita ushanga. Shinaca ¿ñucanchi datocunataca ancianocunaman cupashcanchichu? Imapash llaquicuna ricurijpica Jehová Diospa organizacionga maiman rinata, imashna llujshinata, micunata imashna tarinata yachachunmi instrucciongunata cunga. O na cashpaca shujcunata imashna ayudai ushashcatapashmi ninga. Chai instrucciongunata na cazushpaca ñucanchi causaita y ancianocunapa causaitapashmi peligropi churaita ushanchi. Paicunaca ñucanchita cuidangapaj ninandami esforzarin (Heb. 13:17). Margaret paniguca: “Jehová Diospa organización cushca instrucciongunata cazushpa y ancianocunata cazushpami salvarita ushashcani” nircami.

13. Shuj shuj llaquicuna tiashcamandaca ¿imatata ashtaca huauquipanicunaca rurashca?

¹³ Shuj shuj llaquicuna, guerracuna, parocuna tiashcamandami ashtaca huauquipanicunaca shuj ladocunaman rina tucushca. Cai huauquipanicunaca paicuna chayashca pushtupi yacharingapaj y uchalla espiritual cosascunata rurangapaj ninandami esforzarin. Paicunaca punda Taita Diosta sirvijcunapa ejemplota catishpami “Taita Diospa shimimanda ali villaicunata predicashpa” catin (Hech. 8:4). Cai huauquipanicunataca Jehová Diospa gobiernomanda villachinami paicunapa problemacunapi ama yapata pensarichun ayudan. Shinami paicunaca cushilla, tranquilo ali sintirita ushan.

CATIRIASHPA LLAQUICHIJPICA ¿IMASHINATA TRANQUILO CAI USHAPANCHI?

14. Catiriashpa llaquichijpica ¿imata pasaita ushan?

¹⁴ Catiriashpa llaquichijpica reuniongunaman rita, predicaita o shuj shuj cosascunata ruraitaca ñana ushanchichu. Chaimandami tranquilo cushilla sintiritapash ñana ushapanchi. Shina llaquichijpimi jipa punllacunapica imashi ashtahuan pasanga yashpa pensarita ushapanchi. Cashna pensarinaca normalmi can. Pero catiriashpa llaquichijpi Jehovamanda ama caruyangapami cuidadota charina capanchi (Juan 16:1, 2). Shinaca catiriashpa llaquichijpi tranquilo cai ushangapaca ¿imatata rurana capanchi?

15. Catiriashpa llaquichijpica ¿imamandata na manllana capanchi? (Juan 15:20; 16:33).

¹⁵ Bibliapica: “Cristo Jesushuan shujllashna tucushpa Taita Diosta tucui shunguhuan sirvishpa causangapaj munajcunaca, tucuicunami catiriashpa llaquichi tucunga” (2 Tim. 3:12). Huauqui Andréi causajushca llactapica Jehová Diospa obratami prohibirca. Shina pasajpipash huauquiguca Jehová Diosta tucui sirvijcunatallata catiriashpa llaquichinataca na cringapaj munarcachu. Paica: “Caipica ashtaca testigocunami tian. ¿Maitashi tucuicunaca carcelpi churai tucuringa?” nishpami pensan carca. Shina pensashpapash huauquiguca tranquilo caitaca nimamanda na usharcachu. Cutin shuj huauquipanicunaca paicunapash catiriashpa llaquichi tucunata yachaimandami ima pasana cashpapash Jehovapi confian carca. Chaimi na yapata preocuparin carca. Huauqui Andreica cai huauquipanicunapa ejemplota catishpami Jehová Diospi confiarca. Shina rurashpaca paillatami tranquilo ali sintiri usharca. Y cunanbica problemacunata charishpapash cushillami causan. Ñucanchicunapashmi tranquilo ali sintirita ushapanchi. Jesusca ñucanchicunataca catiriashpa llaquichingami nircami. Shinapash, ñucanchicuna Jehová Diosta tucuipi sirvishpa cati ushashcatapashmi nirca (Juan 15:20; 16:33​ta liipangui).

16. Catiriashpa llaquichijpica ¿imamandata instrucciongunata catina capanchi?

¹⁶ Ñucanchi causajuj llactapi ñucanchi obra prohibishca cajpica, sucursal cashpa o ancianocunapash huaquin instrucciongunatami ñucanchicunamanga cunga. Shinami Bibliamanda yachajushpa catichun y usharijpica predicashpa catichunbash ayudanga. Y chai instrucciongunata na tucuita aliguta intindishpapash, cazungapami esforzarina capanchi (Sant. 3:17). Na rijsishca gentecuna ñucanchi huauquipanicunamanda o congregacionmanda informacionda mañajpica nimamanda na cunachu capanchi (Ecl. 3:7).

17. ¿Imatata apostolcunashnallata rurangapaj munapanchi?

¹⁷ Ñucanchicuna ‘Jesusmanda villachingapaj cachashcacuna’ cashcamandami Diabloca ñucanchicunataca llaquichingapaj munan (Apoc. 12:17). Diablotapash, ñucanchita llaquichingapaj munaj gentecunatapash na manllanachu capanchi. Jarcaicuna tiajpipash predicashpa y Bibliamanda yachachishpa catinaca ninandami cushichin. Autoridadta charij gentecunaca apostolcunataca ama predicashpa catichunmi mandarca. Pero apostolcunaca Taita Diosta cazuimandami predicashpa catirca. Shinami paicunaca cushilla sintirirca (Hech. 5:27-29, 41, 42). Ñucanchi causajuj llactapi Jehová Diospa obra prohibishca cajpica ali yuyashpa, cuidadohuanmi predicana capanchi (Mat. 10:16). Jarcaicuna tiajpipash predicashpa catishpaca Jehová Diosta sirvijuimanda y shujcunatapash ayudajuimandami tranquilo ali sintirita ushapashun.

‘TRANQUILO ALI CANATA CARAJ TAITA DIOSCA QUIQUINGUNAHUANMI CANGA’

18. ¿Pita tranquilo ali canataca caraita ushan?

¹⁸ Shinlli situaciongunata yalijushpapash tranquilo sintiri ushashcataca seguromi caita ushapanchi. Llaquicunahuan cashpaca Taita Dios carashca tranquilo ali canatami minishtipanchi. Y Jehová Diosllami chai tranquilo ali canataca caraita ushan. Ñucanchi causajuj pushtupi shuj ungui tiajpi, llaqui apajushpa o ñucanchita catiriashpa llaquichijpica Jehová Diospi confiapashunchi. Jehovapa organizacionbi confiashpa, Jehovapa promesacunatapash yaria causapashunchi. Shina rurajpica “tranquilo, ali canata caraj Taita Diosca” ñucanchicunahuanmi canga (Filip. 4:9). Cati temapica huauquipanicuna llaquicunahuan cashpapash Taita Diospa tranquilo ali canata sintichun, ñucanchicuna imashina ayudai ushashcatami ricugripanchi.