Jovenguna, Marcospa y Timoteopa ejemplota catipaichi

1, 2. Jehová Diosta ashtahuan sirvichunga ¿imashi Marcosta y Timoteotaca jarcaita ushanman carca?

JOVENGUNA ¿nachu Jehová Diosta ashtahuan sirvingapaj y congregacionbipash ashtahuan ayudangapaj munapashcanguichi? Ashtaca jovenguna, huauquipanicunata ayudangapaj munajta ricushpaca ninandami cushijupanchi (Sal. 148:​12, 13). Pero huaquin jovengunaca, “¿imashinashi causasha? o ¿Jehová Diosca maimanshi cachahuanga?” yashpami Jehovata ashtahuan sirvinataca manllan. Cutin shujcunaca “experienciata na charinichu” yaimandami, congregacionbi huaquin responsabilidadcunata na chasquishca. Quiquinbash chashna situacionbi cashpaca na manllanachu capangui. Punda tiempopica shuj jovengunapashmi quiquinshnallata sintirirca.

² Por ejemplo, Marcos y Timoteoca paicunapa causaipi ima pasanata na yachashpapash, experienciata na charishpapash Jehová Diosta ashtahuan sirvingapami esforzarirca. Caru llactacunapi predicangapaj apóstol Pablo y Bernabé invitashca ratopica, Marcosca paipa mamahuanmi tranquilo, ali causajurianga (Hech. 12:​12, 13, 25). Marcosca paipa mamahuan causajushpapash, Jehovata ashtahuan sirvingapaj munaimandami primeroca Antioquía llactaman rirca. Jipamanga Pablohuan y Bernabehuanmi caru llactacunapi predicangapaj rirca (Hech. 13:​1-5). Timoteopash Pablo predicangapaj invitashca ratopica, paipa taitamamahuanmi causajushca yarin. Predicangapaj invitajpica Timoteoca “yapa jovenmi cani, na experienciata charinichu” yashpami pensashcanga (1 Corintios 16:​10, 11​huan y 1 Timoteo 4:12​huan comparashpa ricupangui). Shina pensashpapash Pablohuan predicangapaj rimandami Timoteoca ashtaca bendiciongunata charirca (Hech. 16:​3-5).

3. a) Marcosta y Timoteota apóstol Pablo ninanda juyashcataca ¿imashinata yachapanchi? (2 Timoteo 4:​6, 9, 11; dibujocunata ricupangui). b) Cai temapica ¿ima tapuicunatata yachajupashun?

³ Marcos y Timoteoca joven cashpallatami congregacionbi huaquin responsabilidadcunata pactachinata yachajurca. Pabloca Marcosta y Timoteotaca ninandami juyarca. Chaimandami Pabloca huañungapaj ashalla faltajujpica, ñucata ricungapaj shamuichi nirca (2 Timoteo 4:​6, 9, 11​ta liipangui). ¿Imamandata Pabloca Marcosta y Timoteotaca ninanda juyarca? Jovenguna ¿imashinata Marcospa y Timoteopa ejemplota catita ushapanguichi? Shinallata ¿imashinata Pablopa consejocunaca cunanbi jovengunatapash ayudaita ushan?

MARCOSHNAMI SHUJCUNATA SIRVINA CAPANGUI

4, 5. ¿Imashinata Marcosca shujcunata ashtahuan sirvingapaj munashcata ricuchirca?

⁴ Shuj libropica “sirvina” palabraca, shujcunata ayudangapaj esforzarina cashcata y shinlli cajpipash ayudashpa catingapaj esforzarina cashcatami intindichijun. Marcosca siempremi sirvishpa catingapaj esforzarirca. Pabloca paipa segundo viajepica Marcostaca na pushangapaj munarcachu. Shina pasajpica Marcosca llaquilla y culirami sintirishcanga (Hech. 15:​37, 38). Shina sintirishpapash huauquipanicunataca animashpa, ayudashpami catirca.

⁵ Shinallata Marcosca paipa primo Bernabehuanmi shuj ladopi sirvingapaj rirca. 11 huatacuna jipapash, Roma llactapi Pablo preso cajpimi Marcosca Pablota ayudashpa catirca (Filem. 23, 24). Chaimandami apóstol Pabloca Marcosta tucui shungu agradicishpa, paica ninandami ñucataca consolahuashca nirca (Col. 4:​10, 11).

6. Jehová Diosta ali sirvinajuj huauquicunahuan tiempota yalinaca ¿imashinata Marcostaca ayudarca? (Notata ricupangui).

⁶ Marcosca Jehová Diosta ali sirvinajuj huauquicunahuan tiempota yalimandami ashtaca ali experienciacunata charirca. Apóstol Pablohuan Roma llactapi cashca jipaca, apóstol Pedrohuan tuparingapami Marcosca Babilonia llactaman rirca. Marcos y Pedroca ali ali amigocunami tucurca. Chaimandami Pedroca, Marcosca ‘ñuca churishnami’ can nirca (1 Ped. 5:13). Ishcandicuna igual cashca tiempopica, Pedroca Jesuspa causaimanda y Jesús imasha predicashcatapashmi Marcosmanga parlashcanga. Chaicunata uyashpami Marcosca Bibliapi Marcos librota escribishcanga.a

7. Shuj joven huauquiguca ¿imashinata Marcospa ejemplota catirca? (Fotota ricupangui).

⁷ Marcosca Jehová Diosta ashtahuan sirvishpa y Jehová Diosta ali sirvinajuj huauquicunahuan llevarishpami ocupado yalin carca. Jovenguna ¿imashinata Marcospa ejemplota catita ushapanguichi? Jehová Diosta ashtahuan sirvingapaj munaimanda congregacionbi siervo ministerial o anciano cangapaj munashpapash chai responsabilidadta nara charishpaca pacienciatami charina capangui. Pero chaicamanga Jehová Diosta y huauquipanicunata ashtahuan sirvingapami esforzarina capangui. Seung-Woo shuti anciano huauquipa experienciata ricupashun. Joven cashpaca, paipa edadtallata charij jovengunahuanmi compararin carca. Chaimandami chai huauquicunata anciano nombrajpica paica llaquilla, desanimado sintirin carca. Chaimi pai imashina sintirishcataca ancianocunaman parlarca. Chaimandami shuj ancianoca, chaicunapi preocuparinapa randica shujcuna na cuenta japijpipash huauquipanicunata ayudangapami esforzarina cangui nirca. Shina nijpimi, Seung-Woo huauquiguca mayorlla huauquipanicunata ayudangapaj y reunionman ringapaj ayudata minishtinajujcunataca carropi apangapaj esforzarirca. Chai tiempota yuyarishpami huauquiguca cashna nin: “Huauquipanicunata aliguta sirvinatami yachajurcani. Shinallata huauquipanicunata imagupipash ayudashpa ashtahuan cushilla cai ushashcatami cuenta japircani” nin.

TIMOTEOSHNAMI SHUJCUNAMANDA PREOCUPARINA CAPANGUI

8. ¿Imamandata Pabloca Timoteota agllarca? (Filipenses 2:​19-22).

⁸ Apóstol Pabloca paita na ricunayachishca llactacunapi cutin predicagringapaca na manllaj huauquicuna paita cumbachunmi minishtirca. Chaimandami primeroca ashtaca experienciata charij Silas shuti huauquita agllarca (Hech. 15:​22, 40). Jipaca Timoteotapashmi agllarca. Pabloca ¿imamandata Timoteota agllarca? Huauquipanicuna Timoteomanda alicunata parlajpimi paitaca agllarca (Hech. 16:​1, 2). Shinallata, shujcunamanda tucui shungu preocuparij cashcamandami Timoteotaca agllarca (Filipenses 2:​19-22​ta liipangui).

9. Huauquipanicunamanda Timoteo preocuparij cashcataca ¿imashinata yachapanchi?

⁹ Timoteoca Pablohuan sirvi callarishcamandapachami paipilla preocuparinapa randica, shuj huauquipanicunapi tucui shungu preocuparishcata ricuchirca. Chaimandami apóstol Pabloca, Berea llactapi mushuj huauquipanicunata Timoteo animanataca seguro carca. Seguro caimandami Timoteotaca Berea llactapi saquirca (Hech. 17:​13, 14). Silashuan Berea llactapi quidashca tiempopica Timoteoca ashtacatami Silasmandaca yachajushcanga. Tiempohuanga Tesalónica llactapi huauquipanicunata shinlliyachichunmi apóstol Pabloca Timoteotaca paitalla cacharca (1 Tes. 3:2). Timoteoca 15 huatacuna jipapash huauquipanicunataca ashtahuan ashtahuanmi juyarca. Ninanda juyaimandami huauquipanicuna huacanajujpica paipash llaquirishpa huacan carca (Rom. 12:15; 2 Tim. 1:4). Jovenguna ¿imashinata Timoteopa ejemplota catita ushapanguichi?

10. Woo Jae shuti huauquiguca ¿imashinata shuj huauquipanicunamanda preocuparinata yachajurca?

¹⁰ Woo Jae shuti huauquiguca shuj huauquipanicunamanda ashtahuan preocuparinatami yachajurca. Joven cashpaca mayorlla huauquipanicunahuan parlaitaca na ushanllu carca. Chaimandami mayorlla huauquipanicunataca “buenos días o buenas noches” nishpalla Salón del Reinopica saludan carca. Chai huauquiguta ayudangapaj munashpami shuj ancianoca, huauquipanicuna ima ali cosasgucunata ruranajujta ricushpami agradicita ushangui nirca. Shinallata huauquipanicuna gushtashca cosascunamandami parlaita ushangui nirca. Chaimi chai huauquiguca anciano imata nishcata rurarca. Woo Jae shuti huauquiguca cunanga ancianomi can. Paica ninmi: “Cunanbica jovengunahuan, mayorcunahuanbash facilllami parlani. Huauquipanicunahuan parlaimandami paicuna ima problemacunata charijta yachashpa imagupipash ayudaita ushapashcani” nin.

11. Huauquipanicunata ayudangapaca ¿imatata jovengunaca ruraita ushapanguichi? (Fotota ricupangui).

¹¹ Joven, quiquinbashmi shujcunamanda preocuparishcataca ricuchita ushapangui. Tandanajuicunapica tucuicunahuan parlashpami paicuna imashina cashcata tapushpa imata nijta aliguta uyana capangui. Shinami paicunata imapi ayudai ushashcata cuenta japita ushapangui. Mayorlla cusahuarmigucuna JW Library^® aplicacionhuan paicunapa tabletpi o celularpi ayudachun minishtinajujta yachashpaca ayudanami capangui. Shinallata, mayorlla huauquipanigucuna predicangapaj na cumbata charijta yachashpaca cumbanami capangui. Huauquipanicunata chashna ayudashpami congregacionbica shuj ali ejemplo caita ushapangui.

PABLOPA CONSEJOCUNACA QUIQUINDAPASHMI AYUDAITA USHAN

12. Timoteoman cushca consejocunamanda beneficiaringapaca ¿imatata rurana capangui?

¹² Pabloca Timoteotaca paipa churitashna juyaimandami aliguta causachun y Taita Diostapash aliguta sirvichun consejarca (1 Tim. 1:18; 2 Tim. 4:5). Timoteoman cushca consejocunaca ¿imashinata quiquindapash ayudaita ushan? Pablopa consejocuna ayudachunga 1 Timoteo y 2 Timoteopi tiajuj consejocunatami quiquinman escribishcatashna liina capangui. Chai consejocunata imashina pactachinatapashmi pensarina capangui. Timoteoman Pablo ima consejocunata cushcata ricupashunchi.

13. Taita Diosta tucui shunguhuan ali sirvingapaca ¿imatata rurana capanchi?

¹³ “Taita Diosta tucui shunguhuan ali sirvingapami shinllita esforzarina [o entrenarina] cangui” (1 Tim. 4:7b, nota). Taita Diosta tucui shunguhuan sirvina nishpaca, Taita Diosmanda nunca na caruyanata, pai gushtashca cosascunata ruranatami shina nin. Shinaca Taita Diosta tucui shunguhuan ali sirvingapaca ¿imatata rurana capanchi? Apóstol Pablo nishcashnaca “entrenarinami” capanchi. Griego idiomapica “entrenarina” palabrataca competenciapi participangapaj shinllita esforzarina cashcata ningapami utilizan carca. Participantecuna ganaita ushangapaca, huaquin cosascunata rurashpami paicunallata shinllita esforzarina carca. Shina cuendallatami ñucanchicunapash Jehová Dioshuan ashtahuan ali amigocuna cangapaca huaquin cosascunata rurana capanchi.

14. Bibliataca ¿ima munaihuanda liina capanchi? Shuj ejemplomanda parlapai.

¹⁴ Por ejemplo, Bibliata cada punlla liinaca minishtirishcapachami can. Bibliata liishpaca Jehová Dioshuan ali amigo cana munaihuanmi liina capangui. Chaipaca ¿imatata rurana capangui? Shuj charij jovenhuan Jesús tuparijpi ima pasashcata pensaripai (Mar. 10:​17-22). Chai jovenga Jesús Mesías cashcatami crirca. Shinapash na shinlli feta charimandami Jesuspa discípulo tucunataca manllarca. Pero Jesusca chai jovendaca juyaihuanmi tratarca. ¿Imamandashi Jesusca chai jovendaca juyaihuan tratarca? Jesusca chai joven ali decisionda japichun munaimandami juyaihuan tratarca. Shinaca ¿imatata Jehová Diosmandaca yachajuita ushapangui? Jesusca paipa Taitashnami carca. Chaimandami chai jovenda juyaihuan tratashpaca Jehová Diospash chai jovenda juyashcata Jesusca ricuchirca (Juan 14:9). Shinaca chai jovenmanda Bibliapi liijushpaca, paipa causaita quiquinba causaihuan comparashpami, “Jehová Diosman ashtahuan quimiringapaj y shujcunata ashtahuan ayudangapaca ¿imatata rurana capani?” nishpa pensarita ushapangui.

15. ¿Imamandata jovengunaca ali ejemplo cana can? (1 Timoteo 4:​12, 13).

¹⁵ ‘Taita Diosta tucui shunguhuan sirvijcunamanga ali ejemplotami ricuchina cangui’ (1 Timoteo 4:​12, 13​ta liipangui). Timoteotaca Pabloca aliguta liingapaj, aliguta yachachingapami esforzarina cangui nircami. Shinallata juyangapaj, feta charingapaj, limpio shunguhuan causangapami esforzarina cangui nishpapashmi consejarca. ¿Imamandata Timoteotaca shina consejarca? Ashtacata parlajunapa randica ñucanchi ruraicunahuanmi ali ejemplota ricuchipanchi. Por ejemplo, ashtahuan predicachun animangapaj shuj discursota cuna capashcanguiman. Ashtahuan predicangapaj esforzarijuimandami chai discursotaca na pinganayachishpa facillla cuita ushapanguiman. Huauquipanicunapash quiquinba ali ejemplota ricushpami ashtahuan predicangapaj munanga (1 Tim. 3:13).

16. a) Jovengunaca ¿ima 5 cosascunata rurashpata ali ejemplo caita ushan? b) Parlanapi ali ejemplo cangapaca ¿imatata jovengunaca ruraita ushan?

¹⁶ Ali ejemplo cangapaj munaj jovengunamanga apóstol Pabloca 1 Timoteo 4:12​pi nishca shimicunatami consejarca. Chaipica aliguta parlashpa, aliguta causashpa, juyashpa, feta charishpa, limpio shunguta charishpami causana cangui nijunmi. Chai 5 yuyaicunataca quiquinba estudio personalpimi quiquinllata aliguta estudiaita ushapangui. “Aliguta parlanapi” mejorangapaj munashpaca shujcunata imashina animanatami pensarina capangui. Por ejemplo, huasipi quiquinba taitacunahuan causashpaca, paicunata ashtahuan agradicingapami esforzarita ushapangui. Reuniongunapi cashpaca, quiquinba propio shimicunapi comentangapami esforzarita ushapangui. Cutin reunionguna tucurishca jipaca, huauquipanicunata paicunapa asignacionmanda felicitangapami esforzarita ushapangui. Quiquinba parlohuan ali ejemplo cangapaj esforzarijujta ricushpami huauquipanicunaca Jehová Diosta ashtahuan ali sirvijujta cuenta japinga (1 Tim. 4:15).

17. Jehová Diosta ashtahuan sirvingapaca ¿imacunatata jovengunaca ruraita ushan? (2 Timoteo 2:22).

¹⁷ ‘Jovenguna charishca munaicunamandaca caruyanami cangui y alita ruranatami mascana cangui’ (2 Timoteo 2:22​ta liipangui). Imapash munaicuna Jehovata ashtahuan sirvichun jarcajujpi o Jehovamanda caruyachijujpica, chai munaicunataca huashamanmi saquina cangui nishpami Pabloca Timoteotaca consejarca. Huaquin cosascunaca na malo cashpapash Jehová Diosta sirvichunmi jarcaita ushan. Pensaripai, ejerciciota rurashpa, internetta utilizashpa, videojuegocunata pugllashpaca ¿mashna tiempotata yalijuni? nishpa. Chai tiempotaca Jehová Diosta ashtahuan sirvingapaj, huauquipanicunata ashtahuan ayudangapami utilizaita ushapangui. Shinallata Salón del Reinopi mantenimientota cushpa ayudangapaj o predicación publicapi participangapami ofrecirita ushapangui. Chaipimi Jehová Diosta ashtahuan sirvichun ayudaj amigocunata tarita ushapangui.

SHUJCUNATA SIRVISHPACA ASHTACA BENDICIONGUNATAMI CHARIPANGUI

18. ¿Imamandata Marcos y Timoteoca cushilla causaita y juyailla experienciacunatapash charirca?

¹⁸ Marcos y Timoteoca shujcunata ayudangapaj ashtahuan esforzarimandami, shuj cushilla causaita y juyailla experienciacunatapash charirca (Hech. 20:35). Marcosca huauquipanicunata ayudangapami shuj shuj llactacunaman rirca. Shinallata Jesuspa causaimanda parlaj Marcos librotapashmi escribirca. Cutin Timoteoca huauquipanicunata animashpami ayudarca y Pablotapash mushuj congregaciongunata callarichichunmi ayudarca. Marcos y Timoteo ashtahuan sirvingapaj esforzarinajujta ricushpaca Jehová Diosca cushijushcami carianga.

19. a) ¿Imamandata Pablo cushca consejocunataca yaipi charina capangui? b) Pablopa consejocunata pactachishpaca ¿imashinashi causapangui?

¹⁹ Timoteoman Pablo escribishca cartacunapica ¿imatata yachajupanchi? Pablo paipa amigo Timoteota ninanda juyashcatami yachajupanchi. Shinallata Jehová Dios quiquinda juyajta, quiquin cushilla, ali causachun munashcatami yachajupanchi. Chaimandami apóstol Pablopa consejocunata pactachingapaj y huauquipanicunata ashtahuan sirvingapaj esforzarina capangui. Shina rurashpami cunan punllacunapipash cushilla causaita ushapangui y shamuj punllacunapipash ‘ciertopacha ali causaiguta charita ushapangui’ (1 Tim. 6:​18, 19).