Importante Babilonia Llactaca ¿imata can?

Bibliapica caitami yachachin

Apocalipsis libropica shuj huarmimandami parlan. Chai huarmica ‘culquimanda huainayaj famosa huarmimi’ can. Shinallata, chai huarmica ‘na intindi ushanalla’ shutitami charin. Chai shutica ‘Importante Babilonia Llactami’ can (Apocalipsis 17:1, 3, 5). Cai huarmica mundo enteropi tucui panda, nali religiongunatami ricuchin. Chai religiongunaca “Taita Diospa cabal yachachishcacunata crinapa randica, llullacunatarami paicunaca crirca”a (Romanos 1:25). Masqui diferente, diferente religionguna cashpapash tucuilla panda religiongunallatami gentecunataca causaj Taita Dios Jehovata adoranamandaca caruyachin (Deuteronomio 4:35).

Importante Babilonia Llacta cajtaca ¿imashinata cuenta japishun?

1. lmportante Babilonia Llactaca shuj comparacionllami can. Apocalipsis libropica ashtaca comparaciongunami tian. Chaimandami Apocalipsis libropi shuj huarmimanda parlashpaca, na shuj huarmimandapacha parlajushcata más bien shuj comparacionlla cashcata cuenta japipanchi (Apocalipsis 1:1). Ashtahuangarin, “ashtaca yacucuna jahuapi tiajuj” huarmi ninmi. Yacucunaca “ashtaca gentecunata, llactacunata, shuj shuj idiomacunata parlaj gentecunatami ricuchin” (Apocalipsis 17:1, 15). Maijan huarmipash yacu jahuapi tiajujtaca na ushanmanllu.

2. lmportante Babilonia Llactaca mundo enteropi shuj shuj organizaciongunatami ricuchin. Cai organizaciongunataca ‘cai alpapi tucuilla reycunata reinashna mandajuj jatun llacta’ nishpami rijsin (Apocalipsis 17:18). Shinaca, cai Importante Babilonia Llactaca mundo enteropimi imapi cashpapash pandachijun.

3. Importante Babilonia Llactamanda parlashpaca na política partemanda o negocio partemanda parlaj organización cashcataca nijunllu. Ashtahuangarin religión parte cajtami nijun. Punda tiempopi Babilonia llactaca taita Diosman nishpa ashtaca costumbrecunatami charin carca, chai llactaca brujería cosascunata y shuj shuj nali cosascunata rurashcamandami rijsishca carca (Isaías 47:1, 12, 13; Jeremías 50:1, 2, 38). Chai Babilonia llactapi causajcunaca Jehová Diosta adoranapa randica, yanga dioscunatarami adoran (Génesis 10:8, 9; 11:2-4, 8). Babilonia llactapi mandajcunaca, orgullosocunami carca. Paicunaca Jehová Diostapash yali cashcata pensashpami Jehová Diosta adoranataca nimamanda na alicachin carca (Isaías 14:4, 13, 14; Daniel 5:2-4, 23). Cunanbipash, cai importante Babilonia llactaca brujería cosascunata rurashpami panda religiongunapa parte organización cashcata ricuchin (Apocalipsis 18:23).

   Importante Babilonia Llactaca na politicapa organización canllu. ¿Imamandata shina nipanchi? Porque Bibliapica chai llacta llaquichi tucushcamandami cai “alpapi reycunaca” huacan nijunmi (Apocalipsis 17:1, 2; 18:9). Shinallata cai mundopi negociocunapa organizacionbash na canllu porque Bibliapica ‘cai alpapi negociantecunapash’ aparte cashcatami nin (Apocalipsis 18:11, 15).

4. 

   Museo Britanicomi cai fotocunataca llujchishca.

   Importante Babilonia Llactaca tucuilla panda religiongunatami ricuchin. Panda religiongunaca Jehová Diostalla adorana cashcata yachachinapa randica, yanga dioscunatara adoranatami yachachin. Chashna ruraitaca Bibliapica yanga Dioscunahuan ‘huainayana’ jucha ninmi (Levítico 20:6; Éxodo 34:15, 16). Ashtaca panda religiongunaca ñaupa Babilonia llactapi yachachishca panda yuyaicunatami yachachishpa catin. Por ejemplo, Trinidadta, huañushca jipa alma causashpa catijta, imagengunata, santocuna adorana cashcatami yachachishpa catin. Chai ruraicunaca cunangamanmi panda religiongunapa parte cashpa catin. Chai religiongunaca Taita Diostami juyanchi nishpapash, cai mundopi Satanaspa ruraicunatami juyan. Bibliapi nishcashnaca, caita rurashpaca yanga dioscunahuan huainayajujshnami juchata ruranajun (Santiago 4:4).

   Bibliapica Importante Babilonia Llactaca “morado ropatapash puca ropatapash churajushcami carca” nijunmi. Shinallata “orohuan, juyailla rumicunahuan, perlas rumicunahuan arreglarishcami carca” nijunmi. Cashna nishcacunahuanmi, Importante Babilonia llactaca panda religiongunapa parte cashcata ricuchin. Paicunami charishca cosascunahuan jariyashca cashcata ricuchin (Apocalipsis 17:4). ‘Cai alpapi millanai mapa cosascuna’. Cai mapa cosascunaca Jehová Diospa ricuipi nali ruraicuna, panda yachachishcacunami can. Chai ruraicunaca importante Babilonia llactapa ruraicunami can (Apocalipsis 17:5). Shinallata Bibliapica “ashtaca gentecunata, llactacunata, shuj shuj idiomata parlaj gentecunatami” nishpaca Importante Babilonia llactata apoyaj, panda religionba parte gentecunamandami parlajun (Apocalipsis 17:15).

Bibliapica paicunamanda parlashpaca “cai alpapi tucuilla huañuchi tucushcacunamandaca chai llactami culpata charin” nijunmi (Apocalipsis 18:24). Ashtaca huatacunatami panda religiongunaca guerracuna tiachun, gentecuna shuj shuj nali cosascunata rurachun apoyashca. Shinallata juyaj taita Dios Jehovamanda gentecunaman yachachinapipash na pactachishcachu (1 Juan 4:8). Shinami ashtaca huañuiman apashca.

Importante Babilonia Llactamanda ¿imatata Taita Diosca pensan?

Taita Diospa ñaupapica “chai llactapa pecadocunaca jahua cielocamanmi mirashca” (Apocalipsis 18:4, 5). Taita Diosca paimanda llullacunata yachachinajujpi, paipa catijcunata catiriashpa llaquichinajujpimi panda religiongunahuanga ninanda culirashca can.

Importante Babilonia Llactahuanga ¿imata pasanga?

Bibliapica Taita Diosca Importante Babilonia Llactataca ‘castigangami’ ninmi (Apocalipsis 18:20). Shuj chimbapuraita churashpami Bibliapica, Taita Diosca tucui panda religiongunataca tucuchitapachami tucuchinga ninmi (Apocalipsis 18:8). Taita Diosca ‘sacha animalmanmi’ tucui panda religiongunata atacana, tucuchitapacha tucuchina yuyaita cunga. Sacha animalca tucui cai mundopi politicacunami ricuchin (Apocalipsis 17:16, 17). Shinami Babilonia llactaca importante llacta cashpapash, jaicata tucuchi tucunga. Chai llactataca nunca más na ricuringachu (Apocalipsis 18:21). Chaimandami Taita Diospa ñaupapi ricuringapaj munaj gentecunaca panda religiongunamandaca ‘separaritapacha separarina’ can (2Corintios 6:14-17).