Espiritualmente shinlli, experienciata charij tucungapaca causaipi ayudaj cosascunatami yachajuna capangui. Caicunata yachajunaca congregacionbi responsabilidadcunata ali pactachichun, shuj trabajota tarishpa quiquinllata o quiquinba familiata mantinichunbashmi ayudaita ushanga. Shinallata shujcunahuanbash ali llevarichunmi ayudanga. Por ejemplo liinata, escribinatami ali yachajuita ushapangui. Bibliapica Diospa Shimita cada punlla liij, liishcapi pensarij jarica cushilla y paipa causaipipash alimi causan ninmi (Sal. 1:​1-3). Shinaca Jehová Dios imatapacha pensajta yachajunami quiquin imagutapash ali yuyashpa, ali pensarishpa rurachun ayudanga (Prov. 1:​3, 4). Huauquipanicunaca espiritualmente shinlli, experienciata charij huauquicuna Bibliamanda yachachishpa, ali consejocunata cushpa ayudachunmi minishtin. Ali liinata, escribinata yachashpaca discursocunata, comentariocunatapash ali prepararishpami cuita ushapangui. Shinami huauquipanicunapash Jehová Diospi tucui shunguhuan crishpa catichun ayudapangui. Shinallata ali anotashpami quiquinllatapash tucui shungu Jehová Diospi crishpa catipangui. Shuj huauquipanicunatapashmi animaita ushapangui. w23.12 págs. 26-27 párrs. 9-11

Manllajushpaca Jehová Dios jipa punllacunapi imata ruranatami pensarita ushapangui. Por ejemplo, Jehová Dios Diablota y nali gentecunata ña tucuchijpica ¿imashina causaigutashi charishun? 2014 huatapica asamblea regionalpi shuj escenificacionda ricuchishpami Jehová Dios carashca promesacunapi pensarichun animarca. Chaipica shuj huauquigu paipa familiahuan 2 Timoteo 3:​1-5​pi nishca shimicuna paraíso alpagupi imashina pactarinatami parlanajurca: “Paraíso alpagupica cushilla causaigumi tianga. Gentecunaca paicunapura juyarishpami causanajunga. Shinallata Jehovapa yachachishcacunataca ninandami valichinga. Humilde gentecunaca Jehová Diosta respetashpami causanga. Taitamamacunata cazuj, agradecido, llaquij, familiacunata juyajcunami canga. Shinallata de acuerdo cangapapash munajcuna, shujcunamanda ali cosascunata parlajcuna, controlarinata yachajcuna, blando shungu gentecuna, alita ruranata gushtajcunami canga. Amigocunata na llaquichijcuna, ali uyangapaj munajcuna, humilde gentecuna, paicunapa munaicunata juyanapa randica Taita Diosta juyajcunami canga. Taita Diosta ciertopacha catijcunami canga. Chashna gentecunamandaca na caruyanachu capangui”. Shinaca “Familiahuan o huauquipanicunahuan cashpaca, ‘¿paraíso alpagupica ¿imashinashi causashun?’ nishpa parlana costumbreta charipanichu?” nishpa pensaripangui. w24.01 pág. 6 párrs. 13-14

Jehová Dios paipa sirvijcunahuan cushilla cajta yachashpaca ninandami cushijupanchi (Sal. 149:4). “Jehová Diosca paipa tucui sirvijcunahuan cushillami can. Pero ¿ñucahuanga cushillacha can?” nishpa pensarimandami huaquinbica desanimado sintirita ushapanchi. Punda tiempopi Jehovata sirvijcunapapashmi Jehová Dios paicunahuan cushilla cashcata crinaca na fácil carca (1 Sam 1:​6-10; Job 29:​2, 4; Sal. 51:11). Bibliapica ñucanchicuna juchayu cashpapash Jehová Diosta cushichi ushashcatami yachachin. Pero chaitaca ¿imashinata ruraita ushapanchi? Jesuspi tucui shungu crishpa y bautizarishpa (Juan 3:16). Shina rurashpami tucuicunapa ñaupapi ñucanchi juchacunamanda arripintirishcata ricuchishpa, Jehová Diospa voluntadtallami rurasha nishpa prometishcata ricuchinajupanchi (Hech. 2:38; 3:19). Caita rurangapaj esforzarishcata ricushpaca Jehová Diosca ninandami cushijun. Jehová Diosta candallami sirvisha nishpa prometishcata pactachingapaj ninanda esforzarishpaca, Jehová Diosta cushichishpami paihuan ali amigo caita ushapashun (Sal. 25:14). w24.03 pág. 26 párrs. 1-2