Jesuspa Chaquita Catishpa Causashunchi Yachachishunchi tandanajuipi yachajungapaj hojapa referenciacuna
3-9 DE ENERO
BIBLIAPA VALISHCA YUYAICUNA | JUECES 15, 16
“Shujcunata llaquichinaca nalipachami can”
w12-S 15/4 8 párr. 4
Cunan punllacunapica gentecunapurami ninanda llaquichirin
4 Sansonga Jehová Diosta sirvij runagumi carca. Paica Jehová Diosta sirvijcunatami filisteo gentecunamandaca salvarca. Shinapash paica Dalila shuti huarmitami ninanda juyai callarirca. Pero paica paitaca na juyanllu carca. Chaita yachashpami filisteocunata ñaupaman pushaj 5 runacunaca Dalila huarmigutaca, ‘si can Sansón imamanda ashtaca fuerzasta charishcata ñucanchiman villanguica, canmanga ashtaca culquitami pagashun’ nishpami Dalilamanga ofrecirca. Chaimi paica culquita japingapaj munaimandalla Sansondaca cutin cutin, ‘canga ¿imashpata ashtaca fuerzata charingui?’ nishpa tapujunlla carca. Chaimi Sansonga, ‘ñucaca ajchataca nunca na muchurishcanichu, chaimandami fuerzastaca charini’ nishpa villarca. Chaita ña yachai chayashpami Dalilaca Sansondaca paipa migllapi puñuchishpa, chai filisteo gentecunataca paita ajchata muchuchun cayarca (Jue. 16:4, 5, 15-21). Shina rurashpami Dalilaca paita ciertopacha ninanda juyaj jaritaca llaquichirca.
w05-S 15/1 27 párr. 4
Jueces libropa valishca yuyaicuna
14:16, 17; 16:16. Shuj persona pitapash cutin chaitallata nirijushpa o ashtahuangarin huacashpa imatapash nirijushpaca, chai personahuanga alica na causangachu (Proverbios 19:13; 21:19).
w12-S 15/4 11, 12 párrs. 15, 16
Cunan punllacunapica gentecunapurami ninanda llaquichirin
15 Cusahuarmi causaita ama huaglichingapaca ¿imatata cusahuarmicunaca rurana can? Bibliapica, “huambrara cashpa cazarashca cambaj huarmihuanlla cushijungui”. Shinallata, “tucui causaipimi cambaj juyashca huarmihuan cushijuna cangui” nijunmi (Pro. 5:18; Ecl. 9:9). Cusahuarmicunaca ashtaca tiempota igual ña causanajushpapash paicunaca siempremi randimanda pendiente cana can. Shinallata ashtahuan ali rijsirishpa, ashtahuan ali amigocuna tucushpami catina can. Shinallata cusahuarmi causaita cuidashpa, shinallata Taita Diospa ñaupapipash ali ricuringapami ninanda esforzarina can. Chaipaca Bibliagutami ishcandillata tiarishpa liina can. Shinallata predicangapaj, Jehová Diosta mañangapapash ishcandimi chai cosasgucunataca rurajuna can.
JEHOVÁ DIOSTACA TUCUI SHUNGUHUANMI JUYANA CANCHI
16 Huaquinbica congregacionmanda huauquipanicuna jatun juchacunata rurajpimi paicunataca censurana tucushca. Shinapash chaitaca paicuna “alipacha crishpa catichun” o shinlli feta charishpa catichunmi shina ruran (Tito 1:13). Shinapash huaquinbica, juchata rurashcamanda na arripintiringapaj munajpimi chai huauquita o chai panitaca expulsana tucushca. Shina expulsashpami paicuna espiritualmente cutin ali cachun huauquicunaca ayudan (Heb. 12:11, TNM). Shinapash aunque ñucanchi familiar o ñucanchi amigo expulsai tucujpipash, ñucanchica Jehová Diostami cazushpa catina capanchi. Porque Jehová Diosca expulsai tucushcacunahuanga na tandanajunachu canguichi nishpami mandashca (1 Corintios 5:11-13 liipangui).
Bibliapa Valishca Yuyaicunata Mascashunchi
w05-S 15/3 27 párr. 6
Jehová Dios ayudajpimi Sansonga misharca
Sansón runaguca Gaza shuti puebloman chayashpaca culquimanda huainayaj shuj huarmipa huasimanmi chayarca. Shinapash chai huasiman chayashpaca imapash nali munaihuan, mapa yuyaicunahuanga na rircachu. Ashtahuangarin chaiman rishpami paica Taita Diospa contracunahuanga macanajui ushana carca. Chaimandami chaimanga rirca.
10-16 DE ENERO
BIBLIAPA VALISHCA YUYAICUNA | JUECES 17-19
“Taita Diospa mandashcacunata na cazunaca llaquimanmi apan”
it-2-S 398
Miqueas
1. Miqueas runaca paipa mamataca ashtaca culquitami shuhuarca. Shinapash jipamanga paipa mamamanmi cutin chai culquita tigrachirca. Chaimi Miqueaspa mamaca cashna nirca: “Ñuca huahualla, napacha llullashpami cashna nini: Cai culquitaca, canmandami Mandaj Diosman shicanyachircani. Labrashpa rurashca imamambash rijchaj diostapash, chai culquita yacuyachishpa imamambash rijchaj shuj diostapash rurachunmi shicanyachircani”. Chai jipaca ‘paipaj mamaca, asha culquita japishpami, imatapash yacuyachishpa ruraj runaman curca. Chai runami, labrashpa rurashca imamambash rijchaj diostapash, culquita yacuyachishca diostapash rurarca. Chaicunataca, Miqueas shuti runapaj huasipimi churarca’. Miqueasca “dioscunapaj shuj huasitami charirca. Shinallata efod nishcatapash, terafín nishca dioscunatapashmi rurachirca. Chashna rurashpaca, paipaj churicunamanda shuj churitami, paipaj cura cachun agllashpa churarca”. Taita Diosca yanga dioscunataca ama adoraichichu nishpami mandarca. Aunque Miqueas runaca Taita Diosta adorasha yashpami chaicunataca rurarca, pero shina rurashpaca pandaitami pandarijurca (Éx 20:4-6; Jue 17:1-6; Dt 12:1-14). Jipamanga Moisespa familiamanda Jonatán runatami sacerdote cuenda sirvichunmi churarca (Jue 18:4, 30). Miqueas runaguca alita rurajuni yashpami, “Mandaj Diosca tucui imapipash” bendiciahuanga nircami (Jue 17:7-13). Jonatán runaguca Aaronba familiamandaca na carcachu, chaimandami sacerdote shinaca na sirvita usharcachu (Nú 3:10).
it-2-S 399 párr. 1
Miqueas
Miqueas runaca ashtaca gentecunahuan tandanajushpami, Dan shuti aillupa miraicunataca catiriashpa rirca. Chaimi paicunaca Miqueas runataca, ¿imashpata ñucanchicunataca catiriajungui? nishpa tapurca. Chaimi Miqueasca, “cangunaca, ñuca rurashca dioscunatapash, ñuca curatapashmi apashpa rinajunguichi. Imapash illajtamari saquihuanguichi. Chashna jahuachu: ‘¿Imatata nijungui?’ nishpa tapuhuanguichi nircami”. Shina nijpimi paicunaca, ‘ama ñucanchita caparishpa catimujuichi. Si catiriashpa catimunguica, candapash, canba gentecunatapash huañuchishpami saquishun’ nishpami nirca. Chaimi Miqueasca paicunatapash yali ashtahuan shinllicuna cajta ricushpa huasiman tigrarca (Jue 18:22-26).
Bibliapa Valishca Yuyaicunata Mascashunchi
Cai Bibliaca shungumanmi chayan
6 Cunanbica, Diospa Shuti imamanda Bibliapi cana cashcataca ashtahuan alimi intindishcanchi. Inglés shimipi Traducción del Nuevo Mundo revisashca Bibliapica, 7 mil 216 viajemi Diospa Shutica ricurin. Cai revisashca Bibliata 1984pi llujchishca Bibliahuan ricujpica, Diospa Shutica 6 viajetami ashtahuan ricurin. ¿Imamandata Diospa Shutica 6 viajeta ashtahuan ricurin? Rollos del mar Muerto nishcata ricujpica, 1 Samuel 2:25; 6:3; 10:26; 23:14, 16 textocunapimi 5 viajeta Diospa Shutica ricurin. Chai rollocunataca chairallami gentecuna ricuchun saquishca. Ashtahuanbash, callaripi Dios escribichishca Shimicunata ali investigashpaca, Jueces 19:18pipash Diospa Shutita churana cashcatami yachashcanchi.
17-23 DE ENERO
BIBLIAPA VALISHCA YUYAICUNA | JUECES 20, 21
“Na imatapash rurashpallata Jehovapa guiata mascapashunchi”
w11-S 15/9 32 párr. 2
Finehás runagupa ejemplota catipashunchi
Guibeah shuti puebloca benjaminitacuna causaj pueblo ucupillatami carca. Shuj viajeca Guibeah shuti pueblomanda runacunami, shuj levita runapa huarmita violashpa, llaquinaita huañuchirca. Chaimandami israelitacunamanda chaishuj tribucunaca benjaminitacunahuan macanajungapaj tandanajurca (Jue. 20:1-11). Shinapash nara macanajungapaj rishpallatami paicunaca Jehová Diospa guiata, Jehová Diosta ayudahuai nishpa mañarca. Shinapash paicunaca benjaminitacunahuanga pirditami pirdirca (Jue. 20:14-25). Chaishuj israelitacunaca Jehová Diospa ayudata mañashpapash benjaminitacunahuan pirdishcamandaca ¿Jehová Diostaca yangami ayudahuai nishpa mañashcanchi nishpacha pensarishcanga?
w11-S 15/9 32 párr. 4
Finehás runagupa ejemplota catipashunchi
Ancianocuna congregacionbi imapash problemacunata na uchalla arreglai ushashpaca ¿imatata rurana capanguichi? Talvez congregación ucupi imapash problemacunata arreglangapaj esforzarishpa, Jehová Diostapash cutin cutin oracionda rurashpa mañajujpipash chai problemata na arreglai ushashpapash na shaijunachu capanguichi. Más bien Jesús nishcatami yarina capanguichi. Jesusca, “Diosta mañaichi, paica carangallami. Mascaichi, taringuichimi. Punguta huactachishpa cayaichi, paica pascangallami” nircami (Luc. 11:9). Jehová Diosca ñucanchitaca na ayudajunllu yashpami talvez pensarita ushapanchi. Shinapash na shinachu pensana capanchi, porque Jehová Diosca pai imahora chai problemata arreglana tiempo cajta ricushpami chai problemataca arreglanga.
Bibliapa Valishca Yuyaicunata Mascashunchi
¿YACHAPASHCANGUICHU?
Punda tiempocunapica ¿imashinata huaracacunahuan macanajun carca?
Davidca shuj huaracahuan rumita shitashpami Goliat shuti jatun runataca huañuchirca. Davidca llamacunata michijushpami huaracata ali utilizanataca yachajushcanga (1 Samuel 17:40-50).
Egiptomanda, Asiria llactamanda gentecunapashmi huaracahuan macanajun carca. Huaracataca shuj pezado telahuan o carahuan rurashpami ishcandi ladocunamanga jamzilla caviahuan huatan carca. Huaracahuan rumita shitangapaca chaupipimi 5 centímetros ó 8 centímetros vali, 250 gramosta pezaj llambulla rumita churan carca. Chai jipaca jamzilla caviacunamanda japishpami uma jahuapi ninanda muyuchishpa, shuj lado caviata cacharin carca. Shinami rumica tucui fuerzahuan caruta rin carca.
24-30 DE ENERO
BIBLIAPA VALISHCA YUYAICUNA | RUT 1, 2
“¿Imamandata shujcunataca ninanda juyana capanchi?”
Jehovapa ali cumbagucunapa ejemplota catishunchi
5 Moab llactaman tigrashpaca, paipa huasipimi Rutca caita ushanman carca, paipa familiapash ayudaita ushanmanmi carca, pai rijsishca costumbrecunatallami catinman carca, pai parlashca shimitallatami parlanman carca. Shinapash Israel llactaman Noemihuan rishpaca chai tucuilla ayudacunataca na charinmanllu carca. Ashtahuangarin, Israel llactapi shuj ali cusata o ali familiata mascashpa ayudaitapash Noemica na ushanmanllu carca. Chaimandami Noemica Ruttaca canba llactaman tigrailla nirca. Imashinami yachajuparcanchi, Orpaca ‘paipa llactaman, paipa dioscunapamanmi tigrarca’ (Rut 1:9-15). Shinapash Rutca chaita rurangapaca na munarcachu.
Jehovapa ali cumbagucunapa ejemplota catishunchi
6 Rutca paipa cusa o paipa suedra Noemí parlajpimi Jehovataca rijsishcanga. Moab llactamanda dioscunahuan ricujpi Jehová Dios shican cashcatami Rutca alimi cuenta japirca. Chaimandami Jehovata juyai callarishpa, paitalla juyangapaj, adorangapaj munashpa Noemitaca nirca: “Cambaj llactapash, ñuca llactami canga. Cambaj Taita Diospash, ñuca Taita Diosmi canga” nishpa (Rut 1:16). Ñucanchicunaca Noemita juyashcata yachashpami Ruttaca alicachinchi. Shinapash, Jehovata juyashcamandami Ruttaca ashtahuan alicachinchi. Jehovata tucui shunguhuan juyajta ricushpami Boazca Ruttaca nirca, Taita Diospa “alas” ucupi pacajunatami mascashcangui nishpa (Rut 2:12, liingui). Boazpa shimicunata liishpaca, shuj huahua pajarogu taitamamapa alas ucupi pacajujujtami pensarinchi (Salmo 36:7; 91:1-4). Shina juyashcamanda, confiashcamandami Jehová Diosca shuj taita cuenda Ruttaca ayudarca, cuidarcapash. Noemita catishpa rina decisionda agllashcamandaca Rutca nunca na arripintirircachu.
Bibliapa Valishca Yuyaicunata Mascashunchi
w05-S 1/3 27 párr. 1
Rut libropa valishca yuyaicuna
1:13, 21. ¿Jehová Dioschu Noemí huarmigutaca llaquicunata cachamushpa llaquichirca? Na, ashtahuangarin Noemí huarmiguca Taita Diostaca pai charishca llaquicunamandaca na culparcachu. Shinapash Noemica Jehová Diosmi ñucapa contra tucushca nishpami pensarca. Shinallata Noemí causashca tiempopica huahuacunata charinaca Taita Diospa bendición cashcatami gentecunaca ricun carca. Ña cutin huahuagucunata na charita ushashpaca, Jehová Dios paicunata maldecishcatami crin carca. Chaimandami Noemi huarmiguca paipa ishcai churicuna paiman nietocunata na cushpallata huañushcamandaca, Taita Diosmi ñucataca llaquichihuashca yashpa pensan carca.
31 DE ENERO—6 DE FEBRERO
BIBLIAPA VALISHCA YUYAICUNA | RUT 3, 4
“Quiquin ali gente cashcata ricuchipangui”
w12-S 1/10 22 párr. 4
“Shuj ali huarmigumi carca”
Boaz runaguca, Rut huarmigumanga cashnami nirca: “Ñuca huahualla, candaca Mandaj Dios bendiciapachun. Canga, chairalla viñaicunataca, imagupash illajtapash, charijtapash na mascangapaj rishpami, cambaj suedrahuanga ali rurashcangui. Shinallata chaitapash ashtahuan yali ali cajtami ricuchihuashcangui” (Rut 3:10). Caipica Rut huarmigu Noemí huarmiguta Israel llactaman cumbashpa rishcamanda, paita cuidashcamanda ninanda juyashcatami ricuchin. Shinallata Boaz runagupashmi, Rut huarmigumanda parlashpaca paica ricurcami de que Rut huarmiguca joven cashcamandaca shuj joven runahuan rico cashpa o pobre cashpapash cazarashpa ri ushashcata. Shinapash Boazca Rut huarmigu Noemí huarmiguta Israel llactaman cumbashpa rishcatami ricurca. Shinallata paipa huañushca cusapa shuti ama chingarichun, Noemí huarmiguhuan rishcatami ricurca. Chaimandami Boaz runaguca chaicunata ricushpa Rut huarmigutaca ninanda alicachirca.
w12-S 1/10 23 párr. 1
“Shuj ali huarmigumi carca”
Boaz runaguca Rut huarmigutaca, “canga, shuj ali huarmigu cangui” nishpami nirca. Chaitaca tucuicunami cuenta japishca nircami. Seguramente Rut huarmiguca Jehová Diosta ali sirvingapaj munaimandami paica ali huarmigu nishpami rijsi tucurca. Rut huarmiguca Noemita ayudangapaj munaimanda, paita na saquingapaj munaimandaca shuj mushuj culturaman adaptarina tucurca. Si ñucanchi Rut huarmigupa ejemplota catinchica ñucanchipashmi congregacionbi shuj huauquipanicunapa culturaman adaptarishpa paicunataca respetohuan trataita ushapashun. Shina rurashpaca paicunaca ñucanchitapash alicachishpami ricunga.
w12 1/10 24 párr. 2
“Shuj ali huarmigumi carca”
Boaz runaguca Rut huarmiguhuanmi cazararca. Shinallata imashinami Bibliagupica nin: ‘Mandaj Diosca, chai huarmigu vijsayu tucushpa, shuj jari huahuaguhuanmi’ bendiciarca. Shinallata tiempohuanga Rut huarmigupa huahuaca rey Davidpa familiami tucurca, porque rey Davidca Rut huarmigupa huahuapa miraimandami llujshirca (Rut 4:11-22). Shinallata Jesucristoca rey Davidpa miraimandami shamurca (Mateo 1:1).
Bibliapa Valishca Yuyaicunata Mascashunchi
w05-S 1/3 29 párr. 3
Rut libropa valishca yuyaicuna
¿Imashpata Rut 4:6pica “na randi ushapanichu, ñuca charishcacunaca chingangami” nin? Si shuj israelita imagupash illa quidashpaca, pai charishca alpa herenciataca pimanbash jatuita ushanallami carca. Pero chaitaca solo paipa familia mas cercanollami randita ushana carca. Randidorca Jubileopa mashna huatacuna faltajta ricushpami chai alpamandaca culquita pagana carca (Levítico 25:25-27). Chaimandami randidorca herencia alpata jatushpaca pirditami pirdin carca. Y Rut huarmigupa casopi pensarishpaca paipa churimi herenciataca japina carca y na randidorpa parientecunaca.
7-13 DE FEBRERO
BIBLIAPA VALISHCA YUYAICUNA | 1 SAMUEL 1, 2
“Quiquin imashna sintirijujtaca tucuita Jehová Diosman villapangui”
ia-S 55 párr. 12
Tucui shunguhuanmi Jehová Diostaca mañarca
12 Ana huarmigupa ejemplomi Jehová Dios paita imashina mañachun munashcata ricuchin. Jehová Diosca imashinami shuj uchilla huahua paipa taitaman nimata na pacashpa tucui tucuita villan, ñucanchipash chai huahuagushna tucui tucuita villachunmi Jehová Diosca munan (Salmo 62:8 y 1 Tesalonicenses 5:17 liingui). Apóstol Pedroca Jehová Dios yarichijpimi, Jehová Diosta mañanamanda cai juyailla shimicunata escribirca: “Diosmi cangunataca cuidajun. Shina cajpimi ima llaqui japijpipash, paiman mingashpa saquina canguichi” nishpa (1 Ped. 5:7).
w07-S 15/3 16 párr. 4
Ana huarmiguhuanga ¿imata pasarca?
Ana huarmigupa causaimandaca yachajupanchimi Jehová Diostaca imatapacha ñucanchi minishtishcata mañai ushashcata, ñucanchi imashapacha sintirijushcata villai ushashcata. Shinallata de pronto imapash problemacunata charishpa, chai problemacunata na arreglai ushashpaca tucuita Jehová Diospa maquipi saquina cashcata (Proverbios 3:5, 6).
Bibliapa Valishca Yuyaicunata Mascashunchi
w05-S 15/3 21 párr. 5
Primero de Samuel libropa valishca yuyaicuna
2:10. Israel llactapi ni shuj rey tiajpipash ¿imamandata Ana huarmiguca chai reymanga ‘ushaita cupangui’ nishpa Jehová Diostaca mañarca? Moisespa Leypica israelitacunaca shuj reytami charinga nishpami nijurca (Deuteronomio 17:14-18). Chaimandallata parlashpami Jacob runaguca nara huañushpallata cashna nirca: “Judá mandana vara caspitaca, na quichungachu” nishpa (Génesis 49:10). Shinallata Sara huarmigumanda parlashpami, Jehová Diosca “paimandami, gentecunata jatun mandajcunapash miranga” nircami (Génesis 17:16). Shinaca Ana huarmiguca jipa punllacunapi israelitacuna shuj reyta charinata yachashpami, Jehová Diostaca chai reymanga ‘ushaita cupangui’ nishpa mañajurca.
14-20 DE FEBRERO
BIBLIAPA VALISHCA YUYAICUNA | 1 SAMUEL 3-5
“Jehová Diosca tucuicunatami considerashpa tratan”
Poderta charishpapash Diosca llaquishpami tratan
3 Samuelca uchillagumandapachami tabernáculo huasipi Jehová Diosta sirvirca (1 Sam. 3:1). Shuj tutaca ña puñujushpami Samuelca paita cayajujta uyarca (1 Samuel 3:2-10, liingui). Chaita uyashpaca sumo sacerdote Elí runagumi cayajun nishpa Samuelca pensarirca. Chaimi Elí puñujuj ucuman calpashpa rishpa cashna nirca: “Caipimi capani. ¿Imapajta cayahuarcangui?” nishpa. Shina nijpimi Elí runaguca ñucaca na cayarcanichu nirca. Shinapash Samuelca cutin paita cayajujta uyashpami cutin Elí runagupaman rirca. Ña quimsa viajeta rijpimi Elí runaguca Jehová Dios Samuelta cayajushcata cuenta japirca. Chaimi, Elí runaguca Samueltaca cashna nirca: “Canda servij ñucaca uyajupanimi, rimahuailla” ningui nishpa. Cutin cayajta uyashpaca Samuelca Elí runagu imata nishcatami rurarca. Shinapash tapurinchipashchari, Jehová Diosca ¿imamandata pai cayajushcataca Samuelmanga na ucha villarca? nishpa. Imamanda na villashcataca Bibliapica na imatapash ninllu. Talvez Samuelta llaquimanda, paipi pensarimandami Jehová Diosca na uchalla villashcanga.
Poderta charishpapash Diosca llaquishpami tratan
4 (1 Samuel 3:11-18, liingui). Jehová Dios cushca Leypica nijurcami, mayorlla gentecunata o ‘llactapuracunata mandajcunatapash’ uchilla huahuacunaca respetanami can nishpa (Éx. 22:28; Lev. 19:32). Shinaca Taita Diosca llaquichigrinmi nishpa Eliman villanaca Samuelpaca shinllimi cashcanga. Chaimi Bibliapica cashna nin, “Samuelca, muscuipishna ricushpa uyashcata, Eliman parlangapaca manllarcami” nishpa. Shinapash Samuelta Jehová Dios cayajujta cuenta japishpami Elí runaguca cashna nirca: “Taita Diosca, ¿imatata canman villarca? Pai imatalla nishcataca, ama pacashpa villahuailla” nishpa. Shina nijpimi Samuelca “imatallapash na pacashpa tucuita” sumo sacerdote Elimanga villarca.
Bibliapa Valishca Yuyaicunata Mascashunchi
w05-S 15/3 21 párr. 6
Primero de Samuel libropa valishca yuyaicuna
3:3. ¿Samuelca Santísimo ucupichu puñun carca? Na, porque Samuel runaguca, cohatita aillupura familiamandami carca (1 Crónicas 6:33-38). Chaimandami paica Santísimo ucupi Jehová Diospa ‘shicanyachishcacunata quilpanajujpica, na yaicuita ushana carca’ (Números 4:17-20). Samuelca tabernáculo carpa huasimandaca patiomanllami yaicuita ushana carca. Chaipimi paica talvez puñun cashcanga. Shinallata Elí runagupash, tabernáculo carpa huasimandaca shuj patiogupimi paipash puñun cashcanga. Shinaca Samuelca, Mandaj Diospa huasipillata shuj ucupimi puñujurca nishpaca Taita Diospa carpa huasi enteromandami parlajurca.
21-27 DE FEBRERO
BIBLIAPA VALISHCA YUYAICUNA | 1 SAMUEL 6-8
“¿Pita ñucanchipa rey?”
it-2-S 813 párr. 2
Taita Diospa Reino
Israelitacunaca pipash paicunata mandachunmi mañan. Israelitacunaca Egipto llactamanda 400 huatacuna llujshishca jipami, ‘ñucanchita mandachun shuj reyta churai’ nishpa Jehová Diostaca mañanajurca. Shina mañashpami Jehová Dios paicunata na mandachun munashcata ricuchinajurca (1Sa 8:4-8). Jehová Diosca Abrahanman y Jacobman israelitacunata mandachun shuj reyta churasha nishpa nishcamandami, israelitacunaca Jehová Diostaca ‘ñucanchita mandachun shuj reyta churapai’ nishpa mañanajurca. Shinapash Jehová Diosca imashina, shinallata imahora israelitacunata mandachun shuj reyta churanataca na villashca carcachu. Chaimandami israelitacuna ‘ñucanchita mandachun shuj reyta churapai’ nishpa mañashpaca Jehová Diostaca na respetashcata ricuchinajurca.
w11-S 1/1 27 párr. 1
Llaquicuna ricurijpipash ñaupamanmi catirca
Ima pasashcata Jehová Diosman villajpimi, Jehová Diosca Samueltaca cashna nirca: “Gentecuna imata mañashcata cazushpa, tucuita rurailla. Paicunaca, na candaca yangapi churanajunllu. Ashtahuangarin ñucatami yangapi churanajun. Paicunata na ashtahuan ñuca mandachun munashpami” cashna ninajun. Shina nishpami Jehová Diosca Samuel runagutaca ama yangaca llaquilla sintirijuchun nirca. Shina nishpaca Jehová Diostami israelitacunaca yangapi churanajurca, na Samuel runagutaca. Shinapash Jehová Diosca Samuel runagutaca, israelitacunataca cangunata mandachun shuj reyta mañashcamandaca, canguna charishca reycunahuanga llaquicunatami charigringuichi nishpa villachun mandarca.
w10-S 15/1 30 párr. 9
Jehová Diospa Gobiernollami ali causaitaca apamunga
9 Tiempohuanga israelitacunaca paicunata mandachun reycunatami charirca. Shinapash Jehová Dios nishcashnami, paicunaca jipamanga ashtaca llaquicunata charirca, porque israelitacunata mandaj reycunaca Jehová Diosta na cazushpami causanajurca. Shinapash cunan punllacunapipash gobiernocunaca, “ali causaitami apamugrinchi” ninajujpipash, chaica na ciertochu can. Paicunaca na Jehová Diospa favortaca charinllu (Sal. 2:10-12).
Bibliapa Valishca Yuyaicunata Mascashunchi
w02-S 1/4 12 párr. 13
¿Imashpata bautizarina capanchi?
13 Pipash como testigo de Jehová bautizaringapaj munashpaca, primeroca paipa causaipimi cambiocunata rurana can. Shinami paillata voluntariamente Jesucristota catingapaj decidirina can. Shinaca ‘nalita rurashpa causajushcata huashaman saquishpami’ cunanga Taita Diospa ñaupajpi alita rurangapaj esforzarishpa causana can (Hechos 26:20). Shinaca panda religionda saquinaca minishtirishcami can. Shinallata Taita Diospa mandashcacunata cazuna, Taita Diostalla tucui shunguhuan sirvinami can (Deuteronomio 30:2, 8-10; 1 Samuel 7:3).
28 DE FEBRERO—6 DE MARZO
BIBLIAPA VALISHCA YUYAICUNA | 1 SAMUEL 9-11
“Saulca humilde, ali runagu cashpapashmi, jipamanga cambiarca”
Na jariyashpa causapashunchi
11 Saúl joven cai horasca paica humildemi carca. Humilde caimandami rey tucuitaca na ushashachu nirca (1 Sam. 9:21; 10:20-22). Shinapash ña rey tucushpaca orgullosomi tigrarca. Paica Jehová Diosman sacrificiocunata cuna derechotaca na charircachu. Shinapash shuj punllaca profeta Samuelta shuyanapa randica pairami sacrificiota curca. Shinami Jehová Diospi na confiashcata ricuchirca. Chaimi Jehová Diosca canga ñana israelitacunata mandanachu cangui nirca (1 Sam. 13:8-14). Rey Saulshnaca na canachu capanchi.
Diospa munaitara pundapi churashunchi
8 Rey Saulpa ejemplota ricushpami yachajunchi, Taita Diospa munaita huashaman saquinaca nali cashcata. Chairalla rey tucushpaca Saulca ali alimi carca, na jariyashcachu carca (1 Sam. 9:21). Saúl rey tucujpica huaquin israelitacunaca Saulca na rey canachu can nishpami huashalla rimanajurca. Rey caimanda israelitacunata castiganalla cashpapash Saulca na imatapash rurashpami saquirca (1 Sam. 10:27). Ammonitacunahuan macanajungapaj rijushpapash Taita Diospa espíritu santo ayudachunmi saquirca. Ammonitacunata mishashca jipapash nircami, Taita Dios ayudajpillami mishai usharcanchi nishpa (1 Sam. 11:6, 11-13).
w95-S 15/12 10 párr. 1
Ammonitacunaca nalitami rurarca
Ammonitacunaca Jehová Diosta na cazushpami nalita rurangapaj munarca. Chaimandami Nahás shuti runa israelitacunata amenazajpica, Saúl shuti runaguca ninanda culirarca. Chaimandami Jehová Diospa espíritu santo Saúl runaguta yarichijpi, Saúl runaguca 330 mil soldadocunata tandachirca. Shinami paicunaca, ammonita gentecunataca llaquichirca. Chaimi ammonita gentecunaca, ‘maijanllapash na ishcaipura quidarca’ (1 Samuel 11:6, 11).
Bibliapa Valishca Yuyaicunata Mascashunchi
w05-S 15/3 22 párr. 8
Primero de Samuel libropa valishca yuyaicuna
9:9. “Dios ricuchishcata villaj runagutami, cunan punllacunaca Dios imata nishcata villaj nin”. Chaica ¿imata significan? Punda tiempocunapica Taita Diospa profetacunataca, “Dios ricuchishcata villaj” nishpami rijsin carca. Shinapash Samuelpa punllacunamanda vichaica, paicunataca “profeta” nishpami rijsi callarirca. Chaimandami Samuel runagutaca, “primer profeta” nishpa rijsin (Hechos 3:24).