Jesusca Lazarotami causachirca

Jesuspa quimsa ali amigocunaca Lázaro, María y Martami carca. Paicunaca Betania pueblopi causarca y turipanicunami carca. Shuj punllaca Jesús Jordán yacu chimba ladopi cajpimi Mariapash, Martapash Jesusmanga: ‘Lazaroca huañujunmi’, ucha shamupai nishpa villachun cacharca. Shinapash Jesusca chaita yachai chayashpapash na chai rato Lazaropamanga rircachu. Ishcai punlla jipami paipa discipulocunataca: Betania puebloman jacuchi, “ñucanchi amigo Lazaroca puñujunmi. Pero paita rijchachingapami ñucaca chaiman rijuni” nirca. Shina nijpimi apostolcunaca: “Señor Jesús, puñujushpaca ali tucungamari” ninajurca. Chaimi Jesusca paicuna ali intindichun: “Lazaroca huañushcami can” nirca.

Jesús Betania puebloman chayajpica, Lazaroca ña chuscu punllacunatami huañushca carca. Marta y María llaqui llaqui tianajujpimi ashtaca gentecuna paicunata cumbangapaj rishca carca. Jesús huasipi cajta ña yachai chayashpami Martaca: “Señor Jesús, quiquin caipi cashca cajpica ñuca turiguca na huañupanmanllu carca” nirca. Shina nijpimi Jesusca: “Quiquinba turica causaringami”. ¿Quiquinga chaita cripanguichu? nirca. Chaimi Martaca: “Shamuj punllapi huañushcacunata causachijpi ñuca turigu cutin causarinataca yachapanimi” nirca. Shina nijpimi Jesusca: “Ñucami gentecunataca causachini. Ñucami gentecunamanga causaita cuni” nirca.

Chai jipami Martaca paipa ñaña Mariamanga: Jesusca ñami caipi can nishpa villarca. Chaimi Mariaca calpashpa Jesuspaman rirca y ashtaca gentecunapash paita catishpa rinajurca. María Jesuspaman chayashpaca paipa ñaupapi ninanda huacashpami: “Señor Jesús, quiquin caipi cashca cajpica, ñuca turiguca na huañupanmanllu carca” nirca. Shina huacajujta Jesús ricushpami shungu ucucaman ninanda llaquirishpa paipash huacai callarirca. Jesús huacajujta ricushpami gentecunaca: ‘Lazarotaca ninandami juyan cashca’ ninajurca. Cutin shujcunaca: ‘¿Lázaro ama huañuchunga, imagutapash nachu ruranalla carca?’ nishpa tapurinajurca. Jesusca ¿imatashi ruragrijurca?

Jesusca, Lázaro runaguta churashca cuevaman chayashpaca, shuj jatun rumihuan chai cuevata tapashcata ricurca. Chaimi Jesusca: “Chai rumita anchuchipaichi” nirca. Shinapash Martaca: “Señor Jesús, ñamari chuscu punllacunata huañushca, ña ashnajungamari” nircami. Shina nijpipash rumitaca anchuchircami. Chaimi Jesusca: “Ñuca Taitalla, ñucata uyashcamandami pagui nipani. Quiquin ñucata siempre uyajtaca yachapanimi. Pero caipi shayanajuj gulpi gentecuna ñucata quiquin cachamushcata crichunmi shina nijupani” nishpa mañarca. Shina nishca jipami Jesusca shinllita caparishpa: “Lázaro, llujshimui” nirca. Chai nishca jipallami Lazaroca maquindi, chaquindi, umatapash telahuan pillushca Ilujshirca. Shina Ilujshimujpimi Jesusca: “Pai purita ushachunga, pillushca telacunata anchuchipaichi” nirca.

Jesús shina causachijta ricushpami, ashtaca gentecunaca Jesuspi crinajurca. Cutin shujcunaca Jesús imata rurashcata ricushpa fariseocunaman villangapami rinajurca. Chai punllamandapachami fariseocunaca Jesusta y Lazarota imashina huañuchinata parlarinajurca. 12 apostolcunapuramanda Judas Iscariotemi pacalla fariseocunataca, Jesusta japichun cangunata ayudajpica, ¿mashnatashi pagahuanguichiman? nishpa tapurca. Chaimi fariseocunaca: “30 culqui monedacunatami cushun” nirca. “Chai punllamandapachami Judasca, Jesusta traicionashpa ima horas paita japichinata ricushpa purijurca”.