5 ¿Maipi, ima horasta oraciondaca rurana capanchi?

ASHTACA religioncunaca maipi, ima horas oracionda rurana cashcatami yachachin. Cutin Bibliapica ¿chaitallatachu yachachin?

Bibliapica ima horascunalla Taita Diosta mañana ali cashtacami yachachin. Por ejemplo, Jesusca micunaguta nara micushpallatami Taita Diostaca pagui nishpami mañarca (Lucas 22:17). Jesuspa discipulocuna Taita Diosta adorangapaj tandanajushpaca siempremi oraciondaca ruran carca. Paicunaca sinagogacunapi, Jerusalenba templo huasipipashmi Taita Diostaca mañan carca. Jerusalenbi templo huasitami Taita Diosca “ñuca huasica, tucui llactacunapi causajcuna ñucata mañana huasimi ni tucushcami canga” nircami (Marcos 11:17).

Jehová Diosca tucuicunallata tandanajushpa pai munashcashna mañachunmi munan. Shina mañajpica Taita Diosca cushijushpami ayudanga (Hebreos 13:18, 19). Chaimandami Testigo de Jehovacunaca paicunapa tandanajuicunapica Jehová Diosta mañan. Chai tandanajuicunapi rurashca oraciongunata uyangapaj munashpaca Testigo de Jehovacunapa tandanajuicunamanmi rita ushapangui.

Bibliapica maipipacha o ima horaspipacha Diosta mañana cashcataca na ricuchijunllu. Shinapash Diosta sirvijcuna maipi cashpapash, ima hora cashpapash Diosta mañashcatami ricuchin. Jesusca caitami nirca: “Ashtahuangarin, ñavipi na ricurij canba Taitataca huasi ucuman yaicushpa, pungutapash vicharishpa mañangui. Chashna pacalla mañajujta ricujuj cambaj Taitami, tucuicuna ricujta canman caranga” (Mateo 6:6).

Tucuita ruraj Taita Diosta ima hora cashpapash, maipi cashpapash mañai ushanaca alipachami can. Jesuspashmi pailla cashpa Taita Diosta mañangapaj aprovechan carca. Shuj viajecarin shuj importante decisionda japina caimandami Jesusca tucui tuta Diosta mañashpa pacarirca (Lucas 6:12, 13).

Diosta sirvij jaricuna, huarmicunapashmi llaquicunahuan cashpa o imapash desicionda japigrijushpaca ayudachun Taita Diostaca mañarca. Talvez paicunaca paicunapa shungupilla o sinllita parlashpami mañashcanga. O talvez shuj gentecunahuan cashpa o paicunalla cashpami mañarianga. Imashna rurashca cashpapash oracionda ruranami ashtahuan importante can. Jehová Diospashmi ñucanchicunataca “mañanataca na saquinachu canguichi” nin (1 Tesalonicenses 5:17). Jehová Diosllata ñucanchicuna paita mañachun munajta yachashpaca cushillami sintirinchi. Ñucanchicuna mañajpica Taita Diosca ñucanchi oraciongunataca uyashami ninmi.

Shinapash cunan punllacunapica ashtacacunami Taita Diosta mañanaca ¿ciertopachachu ayudan? nishpa tapurishca. Talvez quiquinbash shinallata tapuripashcanguipashchari.