Jehová Dios cushilla sintirichunga ¿imashinata adorana capanchi?

Imashinami chaishuj leccionbi ricuparcanchi, Jehová Diosca na tucui religiongunata alicachinllu. Pero, Jehovata cushichingapaca, pai munashcashna adoraitaca ushanchimi. Shinapash “ima mapapash illa” adoraj religionga ¿maijanshi can? (Santiago 1:​27). Biblia ima nijta ricupashunchi.

1. ¿Maipishi Jehová Diosta imashina adorana cashcataca yachachin?

Jehová Diosta imashina adorana cashcataca Bibliapimi yachajuita ushapanchi. Jehová Diosmanga cashnami Jesusca nirca: ‘Quiquinba parlashcacunaca ciertomi can’ (Juan 17:17). Ashtaca religiongunaca Taita Diospa Shimipi cabal yachachishcacunataca na catinllu. Chaipa randica paicunapa propio yachachishcacunata, gentecunapa costumbrecunatarami catin. Shinapash Jehová Diosca paipa ‘mandashcata ladoman saquijcunataca’ na ricunayachinllu (Marcos 7:​9, liipangui). Pero Bibliapi ima nijta cazushpa, shinallata chaipi tiashca consejocunatapash catingapaj esforzarishpaca, Jehová Diostaca ninandami cushichishun.

2. Jehová Diostaca ¿imashinata adorana capanchi?

Jehová Diosmi ñucanchitaca rurarca. Chaimandami paitalla adorana capanchi (Apocalipsis 4:​11). Ñucanchicunaca paitallami juyana, alabana capanchi. Jehová Diosta adorangapaca imapash imagenguna o santocunaca na minishtirinllu (Isaías 42:​8, liipangui).

Jehová Diostaca paiman ‘shuj sacrificiota caranshnami’ adorana capanchi (Romanos 12:1). Chaipaca paipa mandashcacunata cazushpami causana capanchi. Por ejemplo, Jehová Diosta juyaimandami cazarashcacunaca Jehová Dios mandashcashna causangapaj esforzarin. Shinallata limpio causangapaca tragota na ufianllu, drogacunata, tabacocunatapash na fumanllu.a

3. ¿Imamandata Jehová Diosta cazungapaj munajcunahuanlla tandanajushpa paita adorana capanchi?

Reuniongunaman rinaca ‘alitalla rurajcunahuan tandanajushpa’ Jehová Diosta adorai ushachunmi ayudan (Salmo 111:​1, 2). Chai reuniongunapica Jehová Diostaca canticocunata candashpami alabanchi (Salmo 104:​33, liipangui). Jehová Diosca ñucanchi alipallata cashcamanda, ñucanchita juyaimandami shujcunahuan tandanajushpa paita adorachun munan. Chaita ruranami para siempre cushilla causachun ayudanga. Reuniongunapica tucuicunallatami randimanda animaripanchi.

ASHTAHUAN YACHAJUPASHUNCHI

4. Taita Diosta adorangapaca santocunataca na utilizanachu capanchi

VIDEO: ¿Santocunata utilizashpachu Taita Diosca paita adorachun munan? (3:26)

• Punda tiempopi gentecunaca orohuan rurashca shicuta utilizashpami Jehová Diosta adorarca. Shina rurashcamandaca ¿imata pasarca?

Huaquingunaca Taita Diosman quimiri ushangapaj nishpami imagengunata utilizan. Pero chaicunata utilizashpaca ¿nachu Jehová Diostaca ladoman saquijuj cuenda can? Éxodo 20:​4​manda 6​caman y Salmo 106:35 y 36​ta liishpa, cai tapuicunata contestapangui:

• Gentecunaca Diosta adorangapaj nishpaca ¿imalaya imagengunata o santocunatata utilizan?

• Santocunata o imagengunata utilizanamandaca ¿imatata Jehová Diosca nin?

• Chaicunata utilizanamandaca ¿imatata yuyapangui?

5. Jehová Diostalla adorashpaca, panda yachachishcacunataca ñana catishunllu

VIDEO: Bibliata yachajunami cushilla causachun ayudahuarca (5:​16)

Salmo 91:14​ta liishpa, cai tapuita contestapangui:

• Jehová Diostalla adorajpi, paitalla juyashcata ricuchijpica, paica ¿imatata ñucanchimandaca rurasha nin?

6. Jehová Diostaca reuniongunapimi adorai ushapanchi

Reuniongunapi comentashpaca Jehová Diostami alabanajupanchi. Shinallata randimandami animarinchi. Salmo 22:22​ta liishpa, cai tapuicunata contestapangui:

• Reuniongunapi huauquipanigucuna comentajta uyashpaca ¿imashinata sintiripangui?

• ¿Quiquinbash shuj comentariota prepararingapaj munapanguimanllu?

7. Quiquin yachajushcata shujcunaman parlajpica Jehová Diosca ninandami cushijun

Bibliapi imata yachajushcataca shujcunamanbashmi parlaita ushapangui. Salmo 9:1 y 34:1​ta liishpa, cai tapuita contestapangui:

• Bibliapi yachajushcacunamandaca ¿maijan yuyaicunamandata shujcunaman parlapanguiman?

YARINGAPAJ

Jehová Diostalla adorashpa, tandanajuicunapi comentashpa, paimanda imatalla yachajushcata shujcunaman parlashpapashmi Jehová Diostaca cushichinchi.

¿Imatata yachajupashcanchi?

• Jehová Dios munashcashna adorana cashcataca ¿maipita aliguta intindichin?

• ¿Imamandata Jehová Diostalla adorana capanchi?

• Jehová Diosta adorangapaca ¿imamandata paita cazungapaj munajcunahuanlla tandanajuna capanchi?

CAITAPASH RICUPAI

Santocunata adoranata saquishcamanda imashina shuj huarmigu cushilla sintirishcata ricupai.

“Cunanga ñana santocunata adorashpa causanichu” (Villajun revista, 1 de julio de 2011)

Reuniongunapi comentangapaj imashina prepararinata ricupai.

“Tandanajuicunapi Jehová Diosta alabashunchi” (Villajun revista, enero de 2019)

Reuniongunaman rina imashina shuj jovenguta ayudashcata ricupai.

Jehová Diosca ninandami ñucataca llaquin (3:​07)

Tauca gentecunaca Jesusta catijcunami cruzta utilizana can ninmi. Pero ñucanchicunaca ¿chaita utilizanachu capanchi?

“Testigo de Jehovacunaca ¿imamandata cruztaca na utilizan?” (jw.org paginapi ricupangui)