Gentecunaca tapunmi

Templo huasitaca ¿picunata cuidan carca? ¿Imacunatallata ruran carca?

Templo huasipica na tucui levitacunachu sacerdotecuna shina sirvin carca. Huaquingunaca policiacuna cuenda o soldadocuna cuendami templo huasipica sirvin carca. Paicunataca templo huasita mandajcunami ricun carca. Filón shuti escritor judioca cai levita policiacuna imacunatalla ruraj cashcamanda parlashpaca cashnami nin: “Huaquin levitacunaca temploman yaicuna entradacunatami cuidan carca. Cutin shujcunaca santuario ñaupapimi na yaicuna gentecuna ama yaicuchun jarcashpa shayanajun carca. Shinallata shujcunaca tuta y punlla turnarishpami templo huasitaca cuidan carca” nishpa.

Sanedrinmanda mandajcunami cai soldadocunataca mandan carca. Romanocunaca cai soldadocunatallami armacunata apashpa purichun saquin carca.

Joachim Jeremias shuti estudiashca jarica ninmi: “Jesusta prezo japingapaj rijpica Jesusca, Diospa huasi ucupi canguna ricunajujta yachachijujpica imashpata na japihuarcanguichi nircami. Cai jaricuna na templo huasimanda soldadocuna cashcajpica Jesusca cai shimicunataca na ninmanllu carca” nishpa (Mat. 26:55). Joachim Jeremias jarica ninbashmi: “Shuj tiempo huashamanga templo huasimanda soldadocunallatami Jesustaca prezo japingapaj rishcarca” nishpa (Juan 7:32, 45, 46). Shuj tiempo jipaca, templo huasita cuidajcunata mandajcunapash, soldadocunapashmi Jesuspa apostolcunataca Sanedrinmanda mandajcunapaman aparca. Talvez cai soldadocunallatami apóstol Pablotapash templo huasimanda aisashpa llujchishcanga (Hech. 4:1-3; 5:17-27; 21:27-30).