“Aliguta pensarishpami catina capanguichi y rijchariashnami causana capanguichi”

1. “Nali gentecuna tucuchi tucuna” tiempomanda parlashpaca Jesusca ¿imatata nirca? Y ¿ima consejotata curca?

JESÚS ña huañunalla punllacunapimi paipa chuscu discipulocunaca “nali gentecuna tucuchi tucuna tiempo chayamushcataca ¿ima señalta ricushpata yachashun?” nishpa tapurca (Mat. 24:3). Jesuspa discipulocunaca Jerusalén llactata y templo huasitapash ima hora tucuchi callarinata cuenta japingapaj munaimandami shina tapurianga. Jesús paicunata contestashpaca Jerusalén llacta y Diospa templo tucurina cashcatallaca na nijurcachu. Ashtahuangarin cunan punllacunapipash “nali gentecuna tucuchi tucuna” cashcatami nijurca. Shinallata tucuri punllamanda parlashpaca: “Ima punlla, ima hora chashna pasanataca pipash na yachanllu. Jahua cielopi angelcunapash na yachanllu. Taita Diospa Churi ñucapash na yachanichu. […] Ñuca Taitallami yachan” nircami. Chai jipaca “na puñushpa”, “siempremi chaparianshna causana canguichi” nishpami paicunataca consejarca (Mar. 13:32-37).

2. Jerusalenbi causaj cristianocunaca ¿imamandata rijchariashna causana carca?

² Punda tiempopi cristianocunaca siempre rijchariashna causashpallami salvarita ushana carca. Jesusca paipa catijcunataca Jerusalén llacta y Diospa templo ima hora tucurina cashcata yachangapaca ima cosascunatalla ricuna cashcatami intindichirca. Chaimandami paica: “Jerusalén llactata soldadocuna muyuria shayanajujta ricushpaca, chai llactata tucuchina punllacuna ña chayamushcataca yachanami canguichi” nirca. Chai shimicuna pactari callarijpica Jesús nishcashnami paipa discipulocunaca urcucunaman pacajungapaj rina carca (Luc. 21:20, 21). Jesusta cazujcunaca romano gentecuna Jerusalén llactata nara tucuchijpillata pacajushpa rishcamandami salvarita usharca.

3. Cai temapica ¿imatata ricugripanchi?

³ Ñucanchicunaca cai mundopa último punllacunapimi causanajupanchi. Chaimandami punda tiempopi cristianocunashna aliguta pensarishpa rijchariashna causana capanchi. Cai temapica cai mundopi ima pasajushcata pendiente cashpapash, Jehová Diosta sirvishpa catina ashtahuan importante cashcatami ricugripanchi. Shinallata huaquin cosascunamanda ñucanchillata cuidarina cashcata y cai mundo tucuringacaman tiempota aliguta aprovechana cashcatami ricugripanchi.

IMA PASAJUSHCATA PENDIENTE CASHPAPASH JEHOVATA SIRVISHPA CATIPASHUNCHI

4. Cai mundopi ima pasajushcataca ¿imamandata pendiente cana capanchi?

⁴ Cai mundopi pasashca cosascunaca Bibliapa profeciacuna pactarinajushcatami ricuchin. Chaimandami pendiente cangapaj munapanchi. Por ejemplo, Jesusca Satanaspa mundo ñalla tucurina cashcata yachachunga ima cosascuna pasana cashcatami ricuchirca (Mat. 24:3-14). Cutin apóstol Pedroca ñucanchi fe shinlli cashpa catichunga Bibliapa profeciacuna imashina pactarinajushcata yaipi charichunmi animarca (2 Ped. 1:19-21). Y Bibliapa último libroca cai shimicunahuanmi callarin: “Cai shimicunaca Jesucristo cunanbi ñucanchiman ricuchishca shimicunami can. Chai shimicunataca, Taita Diospa esclavocunaman ñalla pasana cosascunata ricuchingapami Jesucristoca Taita Diosmanda chasquirca” (Apoc. 1:1). Shinaca cai mundopi ima pasajushcata yachanaca normalmi can. Y cai cosascuna Bibliapa profeciacunata imashina pactachinajushcata pendiente canapash normalmi can. Huaquinbicarin cai cosascunamanda ñucanchi huauquipanicunahuan parlanata gushtanchipashchari.

5. Bibliapa profeciacuna pactarinamanda parlashpaca ¿imamandata cuidadota charina capanchi? ¿Y imatata yaria cana capanchi? (Fotocunata ricupangui).

⁵ Bibliapa profeciacuna imashina pactarinamanda parlashpaca ¿imamandata cuidadota charina capanchi? Porque ñucanchi propio yuyaicunata parlashpaca congregación unido catichunga na ayudapashunllu. Por ejemplo, gobiernocuna casilla, aliguta, imatapash na manllashpa causangapaj imatapash ruranajushcata uyapashcanchiman. Gobiernocuna shina ruranajushcamanda 1 Tesalonicenses 5:3​pi profecía ña pactarijushcata pensanapa randica, “aliguta cazushpa, aliguta pensarishpa sirvij” esclavopa chairalla llujshishca informaciongunapi imata nishcatami yaria cana capanchi. Jesús “micuna horaspi micunaguta carachun” paicunata mingashcamandami shina yaria cana capanchi (Mat. 24:45). Aliguta pensarishpa sirvij esclavopa informaciongunapi llujshishca yuyaicunamanda parlashpaca ‘tucuicuna chashnallata pensachunmi’ ayudanajupashun (1 Cor. 1:10; 4:6).

6. 2 Pedro 3:11-13​pica ¿imatata yachajupanchi?

⁶ (2 Pedro 3:11-13​ta liipangui). Apóstol Pedroca Bibliapa profeciacuna imashina pactarishcata pendiente cana importante cajpipash, Jehová Diosta sirvishpa catina ashtahuan importante cashcatami ricuchirca. Chaimandami paica “Jehová Diospa punllataca [...] siempremi yarijuna capanguichi”nirca. Cai shimicunataca Jehová Dios Armagedón punllata “ima punlla, ima hora” apamunata yachangapaj munaimandallaca na cazupanchichu. Ashtahuanbachaca chai punlla chayamungacaman ‘limpio ruraicunata rurangapaj y ñucanchi ruraicunahuan Taita Diosta tucui shunguhuan sirvishcata ricuchingapaj’ munaimandami apóstol Pedropa shimicunata cazupanchi (Mat. 24:36; Luc. 12:40). Shinaca aliguta comportarishpa ali causangapami munapanchi. Shinallata imatapash rurashpaca Jehová Diosta juyaimandami rurangapaj munapanchi. Chaita rurangapaca huaquin cosascunamandami ñucanchicunallata cuidarina capanchi.

ÑUCANCHILLATA CUIDARINA NISHPACA ¿IMATATA NINGAPAJ MUNAN?

7. Huaquin cosascunamanda ñucanchillata cuidaringapaca ¿imatata rurana capanchi? (Lucas 21:34).

⁷ Jesusca paipa discipulocunaman cai mundopi ima pasashcacunata pendiente cana canguichi nishpapash huaquin cosascunamanda cuidarina cashcatapashmi nirca. Lucas 21:34​pimi chaitaca ricuita ushapanchi (chai textota liipangui). Jesusca huaquin cosascunamandaca ‘cuidadota charinami canguichi’ nircami. Shinaca ñucanchillata cuidarina nishpaca ¿imatata ningapaj munan? Jehová Diosmanda caruyachij cosascunata ama rurangapaj cuidadota charina cashcatami ningapaj munan. Shina rurajpica Jehová Diosca ñucanchitaca juyashpami catinga (Prov. 22:3; Jud. 20, 21).

8. Pabloca ¿ima consejotata cristianocunamanga curca?

⁸ Apóstol Pablopashmi huaquin cosascunamanda cuidarina cashcata nirca. Por ejemplo, Éfeso llactamanda huauquipanicunamanga “juizu illashna portarinamandaca ninandami cuidarina capanguichi. Ashtahuangarin, ali yachajushcacunashnami portarina capanguichi” nircami (Efes. 5:15, 16). Jehová Diosmanda ñucanchita caruyachingapami Diabloca imacunatapash ruran. Chaimandami Bibliapica ‘Jehová Diospa voluntad maijan cashcata intindinami capanguichi’ nishpa consejan. Chaita intindishpallami Diablo Jehová Diosmanda caruyachichunga na saquipashun (Efes. 5:17).

9. Jehová Diospa voluntad maijan cashcataca ¿imashinata yachai ushapanchi?

⁹ Bibliapica Jehová Diosmanda caruyachij cosascunataca na tucui tucuita nijunllu. Huaquinbica Bibliapi na parlashca cosascunamandami imatapash decidina capanchi. Shinaca aliguta decidingapaca ‘Jehová Diospa voluntad maijan cashcata intindinami capanchi’. Chaita ali intindingapaca Bibliatami siempre yachajuna capanchi. Shinallata liishcapipash pensarinami capanchi. Bibliapi imatapacha ruranata na nijpipash Jehová Diospa voluntad maijan cashcata intindingapaj y ‘Cristopa pensamientotashna’ charingapaj esforzarishpaca “ali yachajushcacunashnami” caita ushapashun (1 Cor. 2:14-16). Huaquin cosascuna peligroso cashcataca ñapashmi cuenta japi ushapanchi. Pero shuj cosascuna peligroso cashcataca na fácil cuenta japi ushapanchichu.

10. ¿Ima peligroso cosascunamandata cuidarina capanchi?

¹⁰ Por ejemplo, shuj jarihuan shuj huarmihuan yangamanda asirijuna, yapata ufiana o micuna, llaquichij shimicunahuan parlana, nali cumbacunata charina, violento diversiongunata o pornografiacunata ricunaca peligroso cosascunami can (Sal. 101:3). Ñucanchita contraj Diabloca ñucanchicuna Jehová Diosmanda caruyachunga siempremi imacunatapash rurajun (1 Ped. 5:8). Ñucanchi yuyaicunata, ñucanchi shunguta na cuidajpica envidiana, na honrado cana, imatapash charingapaj ansiarina, shujcunata na ricunayachina, orgulloso cana, resentido quidana yuyaicunahuanmi Diabloca ñucanchitaca pandachita ushanman (Gál. 5:19-21). Callaripica talvez cai yuyaicunaca na yapa fuertechu canga. Pero cai yuyaicunata ñucanchi shungumanda, yuyaimanda na ñapash anchuchingapaj esforzarijpica cai yuyaicunaca ashtahuan ashtahuan mirashpami ñucanchitaca llaquichinga (Sant. 1:14, 15).

11. ¿Ima peligromandata cuidarina capanchi?

¹¹ Huaquin cosascuna peligroso cashcataca na fácil cuenta japi ushapanchichu. Por ejemplo, trabajopi na Testigo compañerota charipashcanchiman. Testigo de Jehovacuna ali gentecuna cashcata cuenta japichun munaimandami paitaca ali tratapashcanchiman. Callaripica huaquinbillami paihuan micupashcanchiman. Pero jipamanga siempremi paihuan micui callarishcanchiman. Huaquinbica chai compañeroca pinganai cosascunamanda parlashcanman. Callaripica chai cosascunata uyashpaca nali sintirishcanchiman. Pero tiempohuanga chai cosascunata cutin cutin uyashcamandami ñana imatapash sintinchiman. Shuj punllaca trabajo jipa imatapash ufiangapaj invitajpica ari nipashcanchiman. Jipamanga ñucanchi compañeroshnallata pensai callarishcanchiman. Shina rurashpaca tiempohuanga ñucanchi compañeroshnallata comportarina peligropashmi tianman. Cristianocunaca gentecunata ali tratangapaj y respetangapami esforzaripanchi. Shinapash pihuanbash cutin cutin tandanajuna costumbreta charishpaca paicunashna comportari callarina peligro tiashcataca na cunganachu capanchi (1 Cor. 15:33). Jesuspa consejota cazushpaca Jehovapa nishcacunata na respetaj gentecunahuan yapata yalinamandami cuidaripashun (2 Cor. 6:15). Shinami peligroso cosascunata ricushpaca chaicunamandaca caruyashun.

TIEMPOTA ALIGUTA APROVECHAPASHUNCHI

12. Jerusalén llacta, Diospa templo tucurina tiempo chayamungacamanga Jesuspa discipulocunaca ¿imatata rurana carca?

¹² Jerusalén llacta, Diospa templo tucurina tiempo chayamungacamanga Jesuspa discipulocunaca ¿imatapash na rurashpachu shuyajuna carca? Na, Jesusca paicunataca “Jerusalenbi, tucuilla Judea llactapi, tucuilla Samaria llactapi y mundo entero llactacunapipash” predicachunmi mandarca (Hech. 1:6-8). Jesuspa mandashcata pactachingapaca paicunaca ninandami esforzarina carca. Paicuna shina rurashpami tiempota aliguta aprovechanajushcata ricuchi usharca.

13. ¿Imamandata tiempota aliguta aprovechana capanchi? (Colosenses 4:5).

¹³ (Colosenses 4:5​ta liipangui). Tiempota aliguta utilizangapaca ñucanchillatami cuidarina capanchi. Eclesiastés 9:12​pi nishcashnaca ‘ima punlla ima tucunataca na yachai’ ushapanchichu. Ashtahuangarin na yashcapimi huaquinbica huañuitapash huañuringa.

14, 15. Ñucanchi tiempotaca ¿imashinata aliguta aprovechaita ushapanchi? (Hebreos 6:11, 12; fotota ricupangui).

¹⁴ Jehová Diospa voluntadta rurashpa paiman ashtahuan quimiringapaj esforzarishpami ñucanchi tiempotaca aliguta utilizanajupanchi (Juan 14:21). Shinallata Bibliapica cashna nishpami consejan: “Shinlli shayarishpa na cuyurinachu capanguichi. Taita Diospa obrata rurashpami siempre ocupado cana capanguichi” nishpa (1 Cor. 15:58). Shina rurashpaca ima hora huañuna tiempo chayajpi o cai nali mundo tucurina tiempo chayajpipash Jehová Diostaca ashtahuan alimi sirvina cashcasha yashpaca na arripintirinajushunllu (Mat. 24:13; Rom. 14:8).

¹⁵ Jesús nishcashnami cunan punllacunacaman paipa catijcunataca mundo enteropi Taita Diospa Gobiernomanda predicachun ayudajun. Jesusca Jehová Diospa organizacionhuanmi paita sirvijcuna imashna predicanataca yachachin. Shinallata chaita pactachichunga tucui ima minishtirishcacunata cushpami ayudan (Mat. 28:18-20). Shinaca cai nali mundo tucuringacamanga predicashpa, gentecunaman Jehová Diosmanda yachachishpami rijchariashna cana capanchi. Hebreos 6:11, 12​pi consejota catishpaca ‘ultimocamanmi’ Jehovapa promesapi confiashpa catipashun (chai textota liipangui).

16. ¿Imata rurangapata decidido cana capanchi?

¹⁶ Jehová Diosca Satanaspa nali mundota ima hora tucuchina punllataca agllashcallami charin. Chai punlla chayajpica Jehová Diosca Bibliapa profeciacunataca pactachingapachami. Huaquinbica Jehová Diospa punllaca na ucha chayamunshnami ricurita ushan. Shinapash Jehová Diospa punllaca “na unayangachu” (Hab. 2:3). Shinaca Miqueas 7:7​pi nishcashnaca ñucanchipash “Mandaj Diostami ricuriasha. Ñucata quishpichij Taita Diostami shuyasha” nipashun.