Jehová Diospa yachachishcacunataca ali aprovechashunchi

1, 2. a) Testigo de Jehovacunaca ¿imatata Bibliamandaca yuyanchi? b) Bibliapica ¿imata liinatata ashtahuan gushtapangui?

TESTIGO DE JEHOVACUNACA tucui shunguhuanmi Bibliataca alicachinchi. Bibliami ñucanchitaca ali sintirichun, shamuj punllacunapi ali causai tianata crichun, imata ruranata ali yachachunbash ayudan (Romanos 15:4). Bibliaca gentecunapa yuyaita charij libroca na canllu, ‘Taita Diospa Shimimi can’ (1 Tesalonicenses 2:13).

² Bibliapica ¿imata liinatata ashtahuan gushtangui? Ashtacacunaca Jesuspa rurashcacunapimi Jehovata ashtahuan ali rijsi ushanchi nishpami Mateo, Marcos, Lucas, Juan librocunata liinata gushtan (Juan 14:9). Cutin shujcunaca “ñalla ima tucunata” yachangapaj munaimandami Apocalipsis librota liinata gushtan (Apocalipsis 1:1). Ashtacacunaca Salmos librota liishpami ali sintirishca. Cutin huaquingunaca Proverbios libropi consejocunatami alicachishpa liin. Imashinami ricupanchi, Bibliaca mundo enteropi gentecunapami ali can.

3, 4. a) Bibliamanda parlaj publicaciongunata charishcamandaca ¿imatata yuyapanchi? b) Publicaciongunaca ¿picunapallata can?

³ Bibliata tucui shunguhuan alicachimandami Bibliamanda parlaj publicaciongunatapash alicachinchi. Jehová Diosca micunaguta caranshnami ashtaca librocunata, folletocunata, revistacunata shuj shuj publicaciongunatapash cushca (“¿Imatata nisha nin?” nishca recuadrota ricupangui). Chai publicaciongunami Jehová Diosman ashtahuan quimirishpa catichun, ñucanchi feta shinlliyachichunbash ayudan (Tito 2:2).

⁴ Ñucanchipa ashtaca publicaciongunaca tucui testigo de Jehovacunapami can. Cutin shuj publicaciongunaca jovengunapa, taitamamacunapami can. Internet paginapi llujshishca ashtaca temacuna, videocunaca na Testigo gentecunapami can. Chai tucui publicaciongunahuanmi Jehová Diosca ashtaca micunaguta caranshna tucui gentecunaman alipacha yachachijushcata ricuchishca (Isaías 25:6).

5. ¿Imatata seguro cana capanchi?

⁵ Testigocunaca Bibliatapash, publicaciongunatapash liingapaj ashtahuan tiempota charingapami munanchi. Shinapash huaquinbica, tucui chasquishca publicaciongunata aliguta intindishpa liingapaca tiempoca na pactanllu. Tiempo na pactajpipash Bibliata, publicaciongunata liingapaj, intindingapaj esforzarijujta ricushpa Jehová Dios cushijujtaca seguromi cana canchi (Efesios 5:15, 16, NM). Shinapash shuj panda yuyaimandami cuidarina capanchi.

6. Huaquinbica ¿imacunata pensaimandata Jehovapa yachachishcacunataca nali aprovechanajunchiman?

⁶ Cuidadota na charishpaca pensanchimanmi, Bibliapa cai textocunapi o cai publicaciongunapica na imapash importante cosascunata yachajushachu nishpa. Shinaca, “Bibliapi cai textocunaca ñuca causaipica na ayudahuanllu yashpaca ¿imatata rurashun? Shuj publicacionbi temacuna na ñucanchipa cajpica ¿imatashi rurashun? ¿Liina cashcamandachu liishun o na liishpa saquishunllachu? Na liishpaca ñucanchipallata ali cana informaciondami ladoman saquinajunchiman. Ama shina pensangapaca, chai tucuilla información Jehová Diospa cashcatami yarina canchi. Bibliapica Jehová Diosca ninmi: “Ñucami, cangunata Mandaj Taita Dios cani. Ñucami, cangunapaj ali cachun cangunata yachachini” nishpa (Isaías 48:17). Chaimandami cai temapica, Jehová Diospa yachachishcacunata ali aprovechangapaj quimsa yuyaicunata ricupashun.

BIBLIATA LIIJUSHPACA ¿IMASHINATA ALI APROVECHAI USHANCHI?

7. ¿Imamandata Bibliataca, ñucapapash sirvingami yashpa liina capanchi?

⁷ Ñucapapash sirvingami yashpami liina canchi. Bibliapi huaquin textocunaca shuj gentepalla o huaquin gentecunapalla escribishcami can. Shinapash 2 Timoteo 3:16​pica ninmi: ‘Dios escribichishca tucui Shimicunami yachachingapaj ali’ can nishpa. Chaimandami Bibliata liijushpaca ñucapapash sirvingami yashpa liina canchi (“¿Imatata nisha nin?” nishca recuadrota ricupangui). Shuj huauquica ninmi, Bibliapi huaquin textocuna ñucata ashtacata ayudanata yaringapami esforzarini nishpa. Shina pensanami chai huauquitaca tauca cosascunata yachajuchun ayudashca. Chaimandami Bibliata nara liishpallata Jehovataca mañana canchi, ñucapapash sirvingami yashpa liingapaj ayudahuangui, liishca jipa imata ruranata yachangapapash ali yuyaita carahuangui nishpa (Esdras 7:10; Santiago 1:5, liingui).

8, 9. a) Bibliata liijushpaca ¿ima quimsa tapuicunapita pensarina capanchi? b) Ancianocunaman cushca requisitocunapica ¿imatata Jehová Diosmandaca yachajupanchi?

⁸ Ñucanchillata tapurishunchi. Bibliata liijushpaca cai quimsa tapuicunapimi pensarina canchi: 1) “Cai liishcapica ¿imatata Jehová Diosmandaca yachajuni? 2) Cunan yachajushcataca ¿imashinata ñuca causaipi pactachita ushani? 3) Cunan yachajushcahuanga ¿imashinata shujcunata ayudai ushani?” nishpa. Chai quimsa tapuicunapi pensarishpami Bibliapi liishcataca ali aprovechai ushanchi. Shuj ejemplota ricupashun. Bibliapica, congregacionbi anciano cangapaj maijan requisitocunata pactachina cashcatami parlan (1 Timoteo 3:2-7, liingui). Ashtacacunami congregacionbica na ancianocuna canchi. Chaimandachari pensanchiman, chai textocunaca na ñucapachu can, ñucataca na ayudanllu nishpa. Shinapash cai parrafopa quimsa tapuicunapi pensarishpa ricupashun, imashinami 1 Timoteo 3:2-7​pi shimicunaca ñucanchita ashtacata ayudajta.

⁹ “Cai liishcapica ¿imatata Jehová Diosmandaca yachajuni?” Jehová Diosca ancianocunaman requisitocunata cushpami ricuchishca, ancianocuna paipa mandashcacunata pactachichun munashcata. Shinapash ¿imamandata paipa mandashcacunata pactachichun munan? Congregacionbi tucuilla huauquipanicunaca Jehová Diospa ñaupajpica ninan valishcacunami can. Bibliapica ninmi, Jehová Diosca paipa Churipa yahuarhuanmi gentecunataca randinshna quishpichirca nishpa (Hechos 20:28, NM). Chaimandami Jehová Diosca ancianocuna tucuilla huauquipanicunaman shuj ali ejemplota ricuchichun munan. Congregacionbi huauquipanicunata ancianocuna nali tratajpica, Jehová Diosca na yanga saquingachu. Paica ancianocuna cuidajpi tucuilla huauquipanicuna seguro, ali sintirichunmi munan (Isaías 32:1, 2). Imashinami ricupanchi, ancianocunaman cushca requisitocunapica ashtaca cosascunatami Jehová Diosmandaca yachajui ushanchi.

10, 11. a) Ancianocunaman cushca requisitocunaca ¿imashinata ñucanchi causaipi ayudan? b) Ancianocunaman cushca requisitocunahuanga ¿imashinata shujcunata ayudai ushapanchi?

¹⁰ “Cunan yachajushcataca ¿imashinata ñuca causaipi pactachita ushani?” Ancianocuna cashpaca huaquinbi huaquinbica ancianocunaman cushca requisitocunata cutin yachajushpami ashtahuan mejorangapaj esforzarina canchi. Cutin, anciano cangapaj munashpaca ancianocunaman cushca requisitocunata pactachingapami esforzarina canchi (1 Timoteo 3:1). Tucuicunallatami ancianocunaman cushca requisitocunamandaca ashtacata yachajui ushanchi. Shuj ejemplota ricupashun. Ancianocunaman cushca requisitocunapica nijunmi, ashtaca cosascunata o culquita charinataca na ansiarijunachu canguichi, shujcunata mingachinatami yachana canguichi nishpa (1 Timoteo 6:9, 10; Romanos 12:13). Ancianocuna ali ejemplota ricuchijpica shuj huauquipanicunapashmi paicunapa ali ejemplota catishpa, paicunashna feta charingapaj esforzaringa (Hebreos 13:7; 1 Pedro 5:3).

¹¹ “Cunan yachajushcahuanga ¿imashinata shujcunata ayudai ushani?” Ancianocunaman cushca requisitocunamanda parlashpami Bibliamanda yachajujcunamanbash, shuj gentecunamanbash yachachita ushanchi, congregacionbi ancianocunaca shuj religiongunapi pastorcunashnaca na cashcata. Shinallata, ancianocunaman cushca requisitocunapimi ricunchi, ancianocunaca congregaciongunapi ashtacata ayudanajushcata. Ashtacata ayudanajujta cuenta japishpami ancianocunataca ashtahuan respetashun (1 Tesalonicenses 5:13). Ashtahuan respetajpimi ancianocunapash cushijushpa congregacionbica ayudanga (Hebreos 13:17).

12, 13. a) Ñucanchi charishca ayudacunahuanga ¿ima informaciongunatata mascai ushapanchi? b) Bibliapi librocunata escribijuj tiempopi ima pasashcata yachanaca ¿imashinata ayudan? Shuj ejemplomanda parlapai.

¹² Shuj informaciongunatapash mascashunchi. Bibliata yachajujushpaca cai cati tapuicunapa informaciondami mascana canchi:

• Bibliapi cai librotaca ¿pita escribirca?

• ¿Maipi, ima horata escribirca?

• Bibliapi chai librota escribijujpica ¿imata pasarca?

Cai tapuicunapa informacionda mascashpami ñucanchipa ali cana shuj cosascunatapash yachajushun.

¹³ Shuj ejemplota ricupashun. Ezequiel 14:13, 14​pica Jehová Diosca nircami: “Cai llactapi causajcuna ñucata jariyashpa, ninandapacha na cazushpa juchata rurajpica, ñucallatami maquita chutashpa llaquichisha. Yarjai punllacunatami cachamusha. Runacunatapash, animalcunatapashmi cai llactamandaca tucuchisha. Noé, Daniel, Job runacuna cai llactapi cashpaca [alita] rurajcuna cashcamandami, paicunalla quishpirinman’ nishpa. Ashtahuan informacionda mascajpica nijunmi, Jesús shamungapaj 612 huatacuna faltajuj punllacunapimi Ezequiel 14:13, 14​pi shimicunataca escribishca nishpa. Chai huatacunapica Noepash Jobpash ña unaitami huañushca carca. Paicunaca tucuipimi Jehovataca ali sirvirca. Chaimandami Jehová Diosca paicuna huañushca cajpipash yarishpa catirca. Shinapash chai punllacunapica Danielca causajurcarami. Casi 20 huatacunatami charishcanga. Daniel joven cajpipash Jehovapaca Noeshna, Jobshna alita rurajmi carca. Shinaca ¿imatata yachajunchi? Jehová Diosca, paipa tucuilla sirvijcunata, jovengunatapash alicachishpa ricujtami yachajunchi (Salmo 148:12-14).

TUCUILLA ÑUCANCHI PUBLICACIONGUNATA ALI APROVECHASHUNCHI

14. a) Jovengunapa llujshishca publicaciongunaca ¿imashinata jovengunataca ayudashca? b) Chai publicaciongunaca ¿imashinata tucuicunata ayudaita ushan? (Callari fotota ricupangui).

¹⁴ Jovengunapa información. Imashinami Bibliapi tucuilla librocunataca tucuicuna ali aprovechai ushanchi, shinallatami tucuilla publicaciongunataca tucuicuna ali aprovechai ushanchi. Huaquin ejemplocunata ricupashun. Cai último huatacunapica ashtaca temacunata, librocunatami Jehová Diosca jovengunaman cushca^[1] (cai tema tucuripi notata ricupangui). Chai informaciongunami jovengunataca escuelapi cumbacunapa nishcata ama catichun, paicuna charishca problemacunatapash aguantachun ayudashca. Shinapash jovengunapa llujshishca temacuna, librocunaca ¿imashinata tucuicunata ayudai ushan? Jovengunapa temacunata, librocunata liishpaca jovenguna ima problemacunata charishcata yachashpami ñucanchicunapash paicunata ayudashpa animai ushashun.

15. ¿Imamandata jovengunapa llujshishca temacunataca mayorcunapash liina capanchi?

¹⁵ Ashata mayorllacuna cashpaca na pensanachu canchi, jovengunapa informacionda liinaca na minishtirinllu nishpa. Shina pensashpaca jatun tucushcacuna cashcatami ricuchishun. Mayorcunapashmi jovengunapa llujshishca temapi problemacunataca charinchi. Shuj ejemplota ricupashun. Tucuicunallatami ñucanchi crishcacunata difindina, ñucanchi munaicunata controlana, shujcunapa nishcacunata ama catingapaj esforzarina, nali cumbacunamanda cuidarina, nali diversiongunamanda caruyana canchi. Jovengunapa llujshishca informaciongunapash Bibliamanda japishcami can. Shinaca, jovenguna cashpa, mayorcuna cashpapash tucuicunami chai informaciondaca aprovechai ushanchi.

16. Jovengunapa llujshishca temacunaca ¿imashinata ayudan?

¹⁶ Jovengunapa llujshishca temacunaca Jehovaman ashtahuan quimirichunmi paicunataca ayudan (Eclesiastés 12:1, 13, liingui). Chai temacunaca ñucanchitapashmi ayudaita ushan. Shuj ejemplota ricupashun. Abril 2009 huatapi llujshishca ¡Despertad! revistapica “¿Cómo disfrutar la lectura de la Biblia?” nishca tematami jovengunapa llujshirca. Chai temapica ashtaca sugerenciacuna, shuj recuadropashmi tiarca. Chaitaca jipaman yachajungapaj nishpa cuchushpa alichinallami carca. Chai informaciongunaca ¿jovengunapallachu ali carca? Na. Huahuacunatapash charij cazada huarmiguca Bibliata liitaca na ushajurcachu. Chaimandami chai revistapi llujshishca sugerenciacunata catirca. Cunanbica Bibliapi tucui librocuna imashina shuj yuyaimanda ashtahuan intindichijtami cushijushpa liin. Paica ninmi: “Cunanmi Bibliata liinataca tucui shunguhuan alicachini” nishpa.

17, 18. Na Testigo gentecunapa llujchishca temacunaca ¿imashinata ñucanchita ayudan? Shuj ejemplomanda parlapai.

¹⁷ Na Testigocunapa llujchishca información. 2008 huatapimi Testigocunalla yachajuna temacunata charij Villajun revista llujshirca. Shinallata, na Testigocunapa temacunata charij revistapashmi llujshi callarirca. ¿Imashinata na Testigocunapa llujshishca temacunatapash aprovechai ushanchi? Shuj ejemplota ricupashun. Pitapash Tandanajui Huasiman invitashcanchiman. Shamujpica cushijushpami chasquinchi. Bibliamanda Discursota uyajujpica tal vez pensanajushunmi, ñuca invitashcaca imashinashi sintirijun, caipi uyashca información cambiachun ayudashpaca alimi canman nishpa. Chaicunapi pensarinami discursopi uyajushca informacionda ashtahuan alicachichun ñucanchitaca ayudanga.

¹⁸ Shuj gentecunapa llujchishca temacunata liijushpapash shinallatami rurana canchi. Na Testigo gentecunapa llujchishca Villajun revistapi, jw.org paginapi llujshishca temacunapi pensaripashun. Chaicunapi llujshishca informacionga na Testigo gentecuna Bibliata jahualla intindichunmi ayudan. Chai informaciongunata liishpami Bibliapi yachachishcacunata yachashpapash ashtahuan ali intindinchi. Shina intindishpami Bibliapi yachachishcacunataca ashtahuan alicachinchi. Shinallata, na Testigo gentecunapa llujchishca Villajun revistami ñucanchi crishcacunata shuj gentecunaman ashtahuan aliguta intindichichun ayudan. ¡Despertad! revistapash shinallatami ayudan. Shuj ejemplota ricupashun. ¡Despertad! revistapi llujshishca temacunami Taita Diospi crichun, tucuita pai rurashcata crichun, ñucanchi crishcacunata difindishpa parlachunbash ayudan (1 Pedro 3:15, liingui).

19. ¿Imashinata Jehová Diospa yachachishcacunata agradicishcata ricuchishun?

¹⁹ Imashinami ricushcanchi, ñucanchicuna aliguta yachajuchunmi Jehová Diosca micunaguta caranshna ashtacata yachachijun (Mateo 5:3). Chaimandami paipa tucuilla consejocunata, yachachishcacunata liingapaj, pactachingapaj esforzarina canchi. Shina rurajpica ñucanchipallatami ali canga. Ashtahuangarin, Jehová Diospa tucui yachachishcacunata agradicishcatami ricuchishun (Isaías 48:17).