Gentecunaca tapunmi

Proverbios 24:16​pica: “[Alita] ruraj runaca, canchiscaman urmashpapash, cutin jatarinllami” ninmi. ¿Cai shimicunaca pipash juchacunata cutin cutin rurajpipash Jehová Dios cutin cutin perdonajtachu ningapaj munan?

Na chaita ningapaj munanllu. Cai versopica pipash tauca problemacunata charishpapash aguantashpa catingapaj esforzarijtami ricuchin.

Caita ali intindingapaca cai versopa punda y cati versotapash ricupashunchi: “Diosta na manllaj runalla. [Alita] ruraj runapaj carpataca, ama pacalla chapajuichu. Paipaj huasi ucucunapi ima tiashcatapash, ama llujchishpa apaichu. [Alita] ruraj runaca, canchiscaman urmashpapash, cutin jatarinllami. Ashtahuangarin Diosta na manllajcunaca, jatun llaquipimi urmanga. Canda fiñaj runa llaquipi urmajpica, ama cushijunguichu. Nitijanshna pandarijpipash, shungupillapash ama cushijunguichu” (Prov. 24:15-17).

Huaquingunaca verso 16​manda parlashpami pipash cutin cutin juchapi urmashpapash Dios perdonajpi cutin Diosta sirvishpa catinamanda parlajun ninmi. Gran Bretañamanda ishcai sacerdotecunapashmi “pundapi, cunanbi Diosmanda villachijcunapashmi cai textocunataca cashna yuyaihuanllata utilizashca” ninmi. Chai sacerdotecunaca nircapashmi: “shuj ali runa cutin cutin juchapi urmashpa cutin arrepintirijpica Taita Diosca chai runataca juyashpami catin”. Shina pensanaca juchacunata ruranamanda gentecuna caruyachunga na ayudanllu. Taita Diosca perdonahuangallami nishpa pensanaca cutin cutin juchacunataca rurai ushana cashcatami crichin.

Pero verso 16​pica na chaita yachachinllu.

Verso 16 y 17​pi ‘urmana’ shimica hebreomanda japishcami can. Cai shimitaca urmaitapacha urmashcamanda parlangapami utilizan. Por ejemplo, shuj toro ñanbi urmajta, pipash shuj altibajo huasimanda urmajta o maimandapash shuj rumi urmajta ningapami cai shimitaca utilizai usharin (Deut. 22:4, 8; Amós 9:9). Cai shimitaca pipash urmajuj cuenda parlangapapashmi utilizai usharin. Shuj textopica “Mandaj Diosmi, runa imashna causanataca ricuchijun. Paimi, chai causaitaca alicachishpa ricujun. Maijan runa urmashpapash, na chaipi quidangachu. Paitaca, Mandaj Diosmi maquimanda charijun” ninmi (Sal. 37:23, 24; Prov. 11:5; 17:20).

Cai shimimandallata parlashpami Comentario Bíblico Beacon nishca libropica urmana nishca shimica “juchata rurashcamanda na parlajunllu” ninmi. Shinallata verso 16​manda parlashpami Bibliamanda shuj ali yachajushca jaripash cashnami nin: “Diosta sirvijcunaca llaquichi tucushpapash ñaupamanmi catinga. Shinapash nali gentecunaca na ñaupaman catingachu”.

Shinaca Proverbios 24:16​pi ‘urmana’ nishpaca juchata ruranamandaca na parlajunllu. Ashtahuangarin shuj shuj problemacunata charishcamandami parlajun. Cai nali mundopi causanajuimandami Diosta sirvijcunaca ungüicunahuan, problemacunahuan causanajun. Huaquingunatacarin autoridadcunami catiriashpa llaquichinajun. Cashna llaquicunahuan cashpapash Jehová Dios ñaupaman catichun ayudanataca seguro caita ushapanchi. Jehová Diosca paita sirvishpa causajcunata siempre ayudajtaca seguromi capanchi. ¿Imamandata shina nipanchi? Bibliapica “Mandaj Diosca, tucui urmanajujcunatami charijun. Llaquichi tucushpa causajcunatapashmi, tucuicunata jatarichijun” ninmi (Sal. 41:1-3; 145:14-19).

Chaimandami shujcuna problemacunahuan cajpica “[alita] ruraj runaca” na cushijunllu. Ashtahuangarin “Taita Diosta manllashpa causajcunapaca, tucui ali Ilujshinatami” ali yachan (Ecl. 8:11-13; Job 31:3-6; Sal. 27:5, 6).