LECCIÓN 30
Rahabmi ishcai jaricunata ayudarca
Jericó llactata ricungapaj rishca ishcai jaricunaca, Rahabpa huasimanmi chayarca. Jericó llactamanda rey chaita yachaj chayashpaca soldadocunatami cacharca. Chaimi Rahab huarmica chai ishcai jaricunataca paipa huasi jahuapi pacashca jipami soldadocunamanga: Chai jaricunaca na caipichu can shuj pushtucunapi mascagrichilla nirca. Chai jipaca Rahab huarmica chai ishcai jaricunataca: ‘Cai alpata Jehová Dios quiquingunaman cunata alimi yachani. Por favor, Jehová Diospa shutipi jurahuaichi, imashinami ñuca quiquingunata ayudarcani shinallata quiquingunapash ñuca familiata ayudapanguichi’ nircami.
Chaimi chai ishcai jaricunaca Rahabtaca cashna nirca: “Cai alpaman ñucanchi yaicunajuj horasca ñucanchita uriajuchishca ventanapimi, cai puca puca cabiata huarcuchina cangui”. Shinami canba familiaca salvaringa.
Rahab huarmica chai ishcai jaricunataca ‘paipa huasi ventanapi shuj cabiata huarcuchishpami’ Jericó llactamanda llujshichun ayudarca. Chai ishcai jaricunaca quimsa punllacunata urcucunapi pacajushpa yalishca jipami Josuepaman tigrarca. Chai jipami israelitacunaca Rio Jordanda yalishpa chai alpacunata japingapaj prepararinajurca. Jericó llactatami pundapica israelitacunaca macanajushpa mishagrinajurca. Chaimi Jehová Diosca israelitacunataca nirca: ‘Cai pueblotaca punllapi shuj viajetallami muyuna canguichi. Chaimi israelitacunaca 6 punllacunata chai llactataca muyunajurca. Cutin séptimo punlla tucujpica, chai pueblotaca 7 viajetami muyunajurca’. Chai jipaca, sacerdotecunami trompetacunata shinllita huacachirca. Shinallata soldadocunapash shinllita caparirca. Chaimi Jericó llactapa pircacunaca urmarca. Shinapash Rahab huarmipa huasi pircacunaca na urmarcachu. Shinami Rahab, paipa familiapash Jehová Diospi confiaimanda salvarirca.
‘Shinallata ¿nachu Rahab shuti huarmi, pacalla chapangapaj rishca jaricunata aliguta chasquishpa, paicunata shuj ñanda richun ayudashcamanda, alita rurajmi can ni tucurca?’ (Santiago 2:25).