Josueca gabaonitacunatami ayudarca

Canaanmanda shuj llactacunapashmi Jericó llactapi ima pasashcata yachaj chayarca. Chai llactacunamanda reycunaca ‘Josuepa, israelcunapa contra tucushpa macanajungapami tandanajurca’. Cutin Gabaón llactamanda gentecunaca manllaimandami mauca mauca ropata churajushpa Josuepaman rishpa: “Ñucanchica, caru caru llactamandami shamupanchi”. Jehová ‘Dios Egiptopi y Moab llactapi cangunamanda imatalla rurashcata yachashpami shamunajupanchi’. Ñucanchicunata na llaquichijpica “quiquingunapa sirvientecunami tucupashun” nircami.

Shina nijpimi Josueca paicunata crishpa, na imatapash rurashunllu nirca. ‘Chashna ari nishcamanda quimsa punllacuna jipallami chai runacunaca paicunapa ladolla causanajujta yachaj chayarca’. Chaimandami Josueca gabaonitacunataca, “¿imashpata ‘caru caru llactamandami canchi’ nishpa umachircanguichi?” nirca. Chaimi paicunaca: Jehová Dios cangunata ayudajtaca alimi yachaparcanchi. Chaimandami, ‘ñucanchita huañuchinata ninanda manllashpa chashna rurarcanchi’ nirca. Josueca paipa nishcata pactachishpami paicunataca na imatapash rurarca.

Asha tiempo jipaca Canaán llactamanda picha reycunami paicunapa soldadocunandi gabaonitacunata macanajushpa mishangapaj rirca. Chaita uyashpami Josueca paipa soldadocunandi tuta entero gabaonitacunata salvangapaj rirca. Paicunaca cayandi punllami macanajui callarirca. Canaán llactamanda gentecunaca ninanda manllarishpami caita chaita rinajurca. Chaimi Jehová Diosca jahua pachamanda rundu rumicunata paicunapa jahuapi urmachirca. Chai jipaca Josueca Jehová Diostaca: Gabaón pueblo vichaipilla indita shayachipai nishpa mañarca. Indica nunca na chai pushtupilla quedashca carcachu. Shinaca Josueca ¿imashpata Jehovata chashna mañarca? Josueca Jehová Diospi tucui shunguhuan confiashcamandami shina mañarca. Chai punllaca israelitacuna Canaán llactamanda reycunata, paicunapa soldadocunatapash mishangacamanmi indica chashna shayarirca.