Celularcunata, tabletcunata ali utilizapashunchi

Celularpilla, tabletpilla yalinaca cusahuarmicunataca ayudaita o llaquichitami ushan. Cusahuarmicuna quiquingunaca cai aparatocunataca ¿imashinata utilizanajupanguichi?

• Telefonomanda, tabletcunamandaca cusahuarmicunaca ¿imatata yachana capanguichi?

• ¿Imatata rurai ushapanguichi?

• Shuj matrimoniocunaca ¿imatata nishca?

• Cusahuarmicunaca caipimi pensarita ushan

Telefonomanda, tabletcunamandaca cusahuarmicunaca ¿imatata yachana can?

• Telefonota o tabletta ali utilizanaca quiquinba matrimonio ali cachunmi ayudaita ushan. Por ejemplo, huaquin cusahuarmicunaca paicuna trabajopi cashpa o shuj ladocunapi cashpami ishcandimanda parlaringapaj telefonocunataca utilizan.

  

  Jonathanga: “canba huarmigu ‘canda juyanimi’ nishpa shuj mensajeta cachamujta ricunaca alipachami can” ninmi.

• Telefonota o tabletta nali utilizanaca ñucanchipa cazarashca causaipimi llaquichita ushan. Huaquingunaca telefonota o tablettaca tucui horascunami utilizan. Chaimi paicunapa cusaguhuan o huarmiguhuan parlaringapaca asha tiempotalla charin.

  Julissaca ninmi: “Ñuca telefonopilla yalishcamandami huaquinbica ñuca cusaguca ñucahuanga na ashta parlai ushashca” nishpa.

• Huaquingunaca, paicunapa cusaguhuan o huarmiguhuanga telefonota o tabletta utilizashpandi ali parlaita usharinllami ninmi. Shinapash gentecunapa causaimanda estudiashca Sherry Turkle shuti huarmica cashnami nin: “Ashtaca cosascunata a la vez rurai usharinllami ninaca llullami can” ninmi. Ashtaca gentecunaca a la vez ashtaca cosascunata ruranaca alimi can yanmi. Shinapash chaica na ciertochu can. Chaimandami Sherry Turkle shuti estudiashca huarmica caitapash nin: “Pipash ashtaca cosascunata a la vez rurashpaca ni shujtapash na ali ruraita ushanllu” ninmi.a

  Sara huarmiguca: “Ñuca cusaguhuan parlanataca ninandami gushtani. Shinapash shuj shuj cosascunata rurajujpi o paipa telefonohuan cajpi parlanataca na ashta gushtanichu. Paipa telefonohuan cashpaca ñucata na minishtijtashnami sintini” ninmi.

¿Imatata yachajupanchi? Caipica ñucanchi matrimoniopi ama llaqui apangapaj telefonota, tabletta ali utilizana cashcatami yachajupashcanchi.

¿Imatata rurai ushapanguichi?

Quiquingunapa causaipi ima ashtahuan importante cashcata ricupaichi. Bibliapica: “Ima ashtahuan importante cashcata cuenta japichunmi” animajun (Filipenses 1:10, TNM ). Tapuripaichi: “¿Telefonopilla o tabletpilla yalimandachu ñuca huarmiguhuan o ñuca cusahuanga na ashtahuan tiempota yalijuni?” nishpa.

Matthewca ninmi: “Shuj cusahuarmi shuj restauranteman igual micungapaj rishca cashpapash, cada uno telefonocunatara, tabletcunatara ricunajujta ricunaca llaquimi can. Ñucanchicunaca ñucanchi matrimonio tabletcunamanda, telefonocunamandapash yali ashtahuan importante cashcatami yarina capanchi” ninmi.

Ima horascuna tabletta o telefonocunata utilizanata ali ricupaichi. Bibliapica: ‘Juizu illanshna portarinamandaca ninandami cuidarina capanguichi. Ashtahuangarin ali yachajushcacunashnami portarina capanguichi. Tiempotaca aligutami aprovechana capanguichi’ nijunmi (Efesios 5:15, 16, TNM ). Tapuripaichi: “¿Mensajecuna chayamujhuanllu chai rato contestajuni? O minishtirishca cajpica, ¿jipallaguman contestangaparapashchu tiempota llujchini?” nishpa.

Jonathanga: “Ñucataca celularta silenciopi churanami ayudahuashca. Shinami imapash mensajecuna chayamujpica cutin shuj ratopi contestai ushapani. Huaquinbillapachami imapash importante llamadacuna o imapash importante mensajecunaca chayamun” ninmi.

Ñana trabajana horas cajpica, ama trabajashpa catipaichu. Bibliapica ninmi: “Tucui imapajpash, chai punllacunami chayamujun” nishpa (Eclesiastés 3:1). Cashna tapuripaichi: “Ñucapa familiahuan cashpaca trabajomanda pipash, imapapash cayachimujpica ¿chaitarachu empeñarishpa contestajuni? Chaita ruranaca ñucanchi matrimoniotaca ¿ayudajunllu? Ñuca huarmigu, ñuca cusapash, huasipipash trabajashpa catijujpica ¿imashinata sintirin?” nishpa.

Matthewca: “Telefonocuna, tabletcuna tiashcamandami cunanbica huasipica ima horaspash trabajashpa catita usharinlla” nin. “Chaimandami ñuca huarmiguhuan cashpaca ama celularta cutin cutin ricujungapaj, trabajomanda cosascunatapash ratogutallapash ladoman saquingapaj ninanda esforzarina tucushcani” nin.

Ima ratocunalla telefonota, tabletta utilizana cashcata quiquinba huarmiguhuan o cusahuan parlaripaichi. Bibliapica: ‘Pipash na quiquimbajlla ali cachun, imatapash ruranachu. Ashtahuangarin shujpajpash ali cachunmi, imatapash rurana can’ nijunmi (1 Corintios 10:24). Cusahuarmicunaca telefonota o tabletta cada uno imashina utilizanajushcamandami parlarina can. Chai jipami, cada uno imata rurana cashcata ricuita ushan. Callaripica cai temapillata llujshishca, recuadrotami cusahuarmicunaca ricuita ushan. Chaipica: “Cusahuarmicunaca caipimi pensarita ushan” nijunmi.

Danielle shuti huarmiguca ninmi: “Ñuca, ñuca cusapash imagutapash na pacashpa parlanatami gushtapanchi. Chaimi ishcandimandallata yapata telefonota o tabletta utilizanajushcata ricushpaca ama shina rurangapaj parlarinchi. Ishcandillatami chaita ruranaca llaquicunaman apajtaca ali yachapanchi. Chaimandami ishcandipa pensashcacunata respetangapaj esforzaripanchi” nin.

¿Imatata yachajupanchi? Telefonopilla, tabletpilla na yapa tiempota yalina cashcatami yachajupashcanchi.