Genesis

39 Chasnami, ismaelitagunaga Joseta Egipto llactama apanaura. Chibi, Egipto llactamanda Potifar nishca runata randichinaura. Paiga faraonda cuirac soldadogunata mandac mara, reyhuan pariu mandac mara. 2 Pero, Jehovaga Josehuan maura. Chimanda, pai tucuita rashcaga alita llucshira. Egipto llactamanda paiba amuga, paiba huasita cuirachun saquira. 3 Paiba amuga Jehova Josehuan aushcata musiarira. Pai tucuita raushca alita llucshichun nisha, Jehova paita yanapashcata ricura. 4 Josega Potifarba ñuapacpi alita ricurisha, paiba amuta quiquin yanapac tucura. Chiraicu, Potifarga paiba huasita cuirachun nisha saquira, pai tucui charishcagunatahuas. 5 Paiba huasita, pai tucui charishcagunatahuas cuirachun nisha saquishcamandapacha, Jehovaga Potifarba huasita bendiciai callarira, Josehuan aushcamanda. Jehovaga, paiba huasibi, paiba chagraibi charishcagunata huinda bendiciara. 6 Chi huasha, Potifarga pai huin charishcagunata Josehua maquibi saquira. Paiga, mana imaibis yuyarina chara, micunata munashcallaibi yuyarina ara. Chasnallata, Josega ursayuc, gustu musumi tucura. 7 Chiraicu, Potifarba huarmi Joseta munasha ricui callarira. Paiga Joseta nira: “Ñucahuan siriri” nisha. 8 Pero paiga mana munac chara. Chiraicu, paiba amuhua huarmita casna nisha rimara: “Ricui, ñuca amu paiba huasibi ima pasashcata mana imaibis yuyarinzhu, ñucata charishcamanda. Pai tucui charishcagunata ñuca maquibi saquishca. 9 Cai huasibi ñucamanda mas yali mandac mana pihuas tianzhu. Ñucaga cai huasibi charishcagunahuan imatas ranata ushani, pero canhuan mana imatas rana ushanichu, can ñuca amuhua huarmi ashcamanda. Chiraicu, imasata ñucaga chasna iridsata rasha, Diosta llaquichisha uchata rashaya”. 10 Potifarba huarmiga caran punzha cutillata cutillata paihuan siririchun nisha quillachic ara, pero Josega paihuan siririnata, paihuan saquirinatas mana imallas munac chara. 11 Chasna acpihuas, shuc punzha paiba amuhua huasima tarbagahua yaicushcaibi, shuc sirvic runallahuas huasi ucuibi mana tiarachu. 12 Chiraicu, Potifarba huarmiga Joseta paiba llachapamanda apisha, casna paita nira: “Ñucahuan siriri”. Pero Josega paimanda callpasha rira, paiba llachapata chi huarmihua maquibi saquira.