Proverbios
7 ima pasangarushcata mana musiaccunata ricurani, chi muntun maltagunamanda shuc yuyai illac maltata ricurani. 8 Chi malta, chi huarmi causashca mayan ñambita pasac ara, paiba huasima pactangahua puric ara, 9 indi yaicushca huasha, tutayaushcaibi, tutayangahua callarisha ansa tucushcaibi. 10 Chi huasha, chi maltata tupangahua shamuu huarmita ricurani. Chi huarmi prostituta llachapata churarishca mara, mana ali corazonhuan paima caillayara. 11 Pingai illac, pai munaita rac man. Mana ima uraspas paiba huasibi chaun. 12 Cunanga callebi maun, huasha ashca runaguna tiashca pistuibi maun, caran esquinaibi shuc runata apinata munan. 13 Chi huarmiga malta runata apishami muctin, mana pingasha ricusha, paita nin: 14 “Diosta adorangahua animalta rupachina mara. Cunan ñuca rimashcata pactachirani. 15 Chiraicu, canda mascasha tupangahua llucshirani. Cunan ña canda tuparani. 16 Gustu pachagunahuan ñuca caituta mandasha alichishcani, Egipto llactamanda gustu coloryuc telagunahuan. 17 Ñuca caituibi gustu asnac canela yacuta churashcani. 18 Shamui, tuta pagaricta punzhayanagama ashcata munanacushun, ishcandi pariulla ausha cushiyanacushun. 19 Ñuca cari mana huasibi aunzhu, carutami rira. 20 Ashca cullquita apasha rira, quilla purana punzhagama mana bulltiamungachu”. 21 Chi huarmi cai musuta sumacta quirichisha pandachin. Munanayacta shimigunata rimasha umachin. 22 Diripinti, chi maltaga chi huarmita catisha rin, huanchinama apaushca torocuinta, cashtigangahua chaqui maquita huatangaraushca mudu cuinta, 23 shuc flechahuan paiba shunguta pasacta tucsishca tucunagama. Trampaibi urmac pishcu shina, paiga mana musianzhu, caita rashcamanda huañungaraushcata. 24 Cunanga, ñuca huahuaguna, ñuca rimashcata alita uyahuaichi. 25 Chi huarmihuacma rina ñambita ama munaichu. Pai purina ñambibi ama chingarichu. 26 Chi huarmiga ashca runagunata uchaibi urmachishca, paiga manacailla ashca runagunatachu huanchishca. 27 Paiba huasiga pambana uctumami apan, ansa ucu huañuna cuartugunama iraicuchin.