Juan
19 Chasnami, Pilatoga Jesusta asutingahua soldadogunata cachara. 2 Chi soldadogunaga cashamanda coronata shimbasha Jesuspa umaibi tac churanaura, morado ricuric llachapata churachinaura. 3 Paima caillayasha rimanaura: “Judiogunata mandac reyta balichichi”. Chasnallata, chi soldadoguna paiba munluspi huactanaura. 4 Pilatoga cuti canzhama llucshisha, runagunata nira: “Uyaichi. Ñucaraicu cai runa mana ima culpatas charinzhu. Chiraicu, canguna yachanauchun nisha, canzhama llucshichini”. 5 Chasnami, Jesus cashamanda coronahuan, morado ricuric llachapahuan llucshira. Pilatohuas paigunata nira: “Ricuichi. Cai balic runata”. 6 Pero mandac sacerdoteguna, guardiagunahuas paita ricusha caparinaura: “Paita huanchichi. Atun caspibi huanchichi”. Pilatoga paigunata nira: “Canguna paita apasha huanchichi. Ñucaraicu cai runa mana ima culpatas charinzhu”. 7 Judioguna paita ninaura: “Ñucanchi shuc leyta charinchi. Cai ley mandashca shina cai runa huañuna man, pai quiquinllata Diospa churi tucushcamanda”. 16 Chi huasha, Jesusta atun caspibi huanchinauchun paigunata cura. Paiguna paita apasha rinaura. 17 Jesusca, paita turmintachina caspita aparisha, Uma Tullu Pistuma llucshisha rira. Chi pistuga, hebreo shimibi Golgota nishca mara. 18 Chibi, atun caspibi paita quilabasha huarcunaura. Paiba mayambihuas, ishcai runagunata quilabasha huarcunaura. Jesus paigunahua chaupibi maura.